Luka 18 - Ilagano Ipya Lya

Kigemenghejo cha nchilwa wa lugumi

¹ Akabawila kigemenghejo giki, shibigelile kulomba gwa, koloha yaya.

² Uhaya giki, Walali ho nekanya mu nzengo nebe, atangʼogohaga Mulungu, nulu kundilila munhu yaya.

³ Mu nzengo gwenuyo walali mo na nchilwa, nanghwe ubiziza kuli wei, uhaya giki, Unitile butungilija kuli ngʼwikobeja wane.

⁴ Nanghwe walatatogilwe i kwandia; aliyo hanuma uhaya mu moyo gwakwe giki, Nulu natangʼogohile Mulungu nulu kundilila munhu yaya;

⁵ Nahene kulwa nchilwa uyo unikoyakoyela, nakungʼwitila butungilija, akije kuninoja kulwa kwiza kwakwe gwa gwa gwa.

⁶ Seba uhaya giki, Igwagi umo wahayila nekanya ngʼwenuyo ati ntungilija.

⁷ Mulungu, angu, atalabitila butungilija bakongʼwa bakwe abanilila limi na bujiku, nanghwe akwiyumilijaga kubo?

⁸ Namuwila giki, Akubitila butungilija wangu. Nahene, Ngʼwana wa munhu aho aliza, angu, alakusanga kuzunya kuli ho mu si?

Kigemenghejo cha kalombele ka Mfarisayo na Ntobisha

⁹ Bamo abali bisanya benekele giki, bali batungilija, na bubadalaha bangi bose, ubawila kigemenghejo iki, giki,

¹⁰ Banhu babili bakalinha kuja mu hekalu kulomba; umo Mfarisayo, ungi ntobisha.

¹¹ U Mfarisayo wimila wilomba wei ngʼwenekele giki, E, Mulungu, nakulumba, iki nene nati giti banhu bangi bose, bataja, bahunga, bashihani, nulu giti ntobisha uyu.

¹² Nene nakudilaga nzala nghangala ibili buli mfungo; nakufunyaga imo ya ngʼwikumi ya shose isho nabona.

¹³ Na ntobisha wimila kule walatatogilwe nulu kubucha miso kwigulu, aliyo witulagula kikuba chakwe, uhaya giki, E, Mulungu, unichile kigongo nene wa shibi.

¹⁴ Namuwila giki, Uyo wika, kuja ku kaya yakwe ntungiligijiwa kutinda ngʼwenuyo; iki buli munhu uwikumilija ngʼwenekele, aladohelejiwa; nanghwe uwidoheleja ngʼwenekele, alakumilijiwa.

Yesu ubasungulila lubango banigini

¹⁵ Bakangʼwenhela na bana banigini abadime ho; aliyo bahemba bakwe aho bubona iyi, bubalemeja.

¹⁶ Aliyo Yesu ubitana bize kuli Wei, uhaya giki, Bazunilijagi bana banigini bize kuli Nene, mutabalemejage, iki abali giti aba, butemi wa Mulungu wene wabo.

¹⁷ Nghana namuwila giki, Uyo ose akwanukula butemi wa Mulungu giti ngʼwana nigini, atalawingila mo na hado.

Budumi wa nsumba nsabi

¹⁸ Nsugi umo umuja uhaya giki, Nangi wa wiza, nite ki nawingile bupanga butushila?

¹⁹ Yesu ungʼwila giki, Wanitana wa wiza ni buli? Ati ho wa wiza, ulu ati umo, Ngʼwene Mulungu.

²⁰ Ambu ushimanile shilagilo, Utalizushihya, Utalizubulaga, Utaliziba, Utalizukanila ya bulomolomo, Bakujage so na noko.

²¹ Nanghwe uhaya giki, Ishi shose nakashidimaga kufumila mu buyanda wane.

²² Yesu aho wigwa mihayo iyi, ungʼwila giki, Gutali gusagile ho mhayo gumo; jinjaga shose isho uli nasho, ubagabile bahabi, nangho ulabiza na wibikija ngʼwigulu: huna lulu wize unilondele.

²³ Aliyo aho wigwa mihayo iyi, upinihala no; iki walali na sabo ningi no.

²⁴ Aho Yesu umona apinihalile no, uhaya giki, Kilambu kinahe abali na sabo kwingila mu butemi wa Mulungu!

²⁵ Ili changu ngamila kushepa mu kapundu ka lushinge, kutinda nsabi kwingila mu butemi wa Mulungu.

²⁶ Abo abigwa iyi buhaya giki, Ni nani lulu wadula kupijiwa?

²⁷ Uhaya giki, Iyi itudulika ku banhu, kuli Mulungu yadulika.

²⁸ Huna Petro uhaya giki, Lolaga, biswe twaashileka shose kukulondela.

²⁹ Nanghwe ubawila, Nghana namuwila giki, Ati ho munhu uwaaleka numba, nulu babyaji, nulu bana ba ngʼwabo, nulu nke, nulu bana, kulwa nguno ya butemi wa Mulungu,

³⁰ Uyo akukija kwanukula nghangala ningi kutinda ngʼwikanza lya haha, na ngʼwikanza liliza bupanga butushila.

Yesu ukuhanga hangi kucha na kujuka kwakwe

³¹ Huna ubatwala abo ikumi na babili, ubawila giki, Lolagi, tulilinha kuja Yerusalemi, huna ikushikilijiwa yose yaangʼwandikilwa Ngʼwana wa munhu mu bahangi;

³² Iki akwinhiwa ko ku bana mahanga, akwigimbijiwa, akudalahwa; akuswilwa mate.

³³ Aho bakumala kuntula mikoba, bakumulaga; na ku lushiku lwa kadatu akujuka.

³⁴ Nabo bali batitegeleja mihayo yeniyi nulu na hado: na mhayo uyu gwali gubisile kubo, nulu bali batimana iyali yuhayiwa.

Moku upijiwa (Mt. 20.29-34; Mk. 10.46-52)

³⁵ Ikabiza aho wegela Yeriko, moku umo wali wigashije ha nzila wilombeleja;

³⁶ Aho wigwa ibita likubitaga, ubuja mhayo uyu guli kinahe?

³⁷ Bunsombolela giki, Yesu wa Nazareti alibita.

³⁸ Nanghwe uhamuka, uhaya giki, Yesu, Ngʼwana wa ngʼwa Daudi, unichile kigongo.

³⁹ Nabo abatongelile bunemeja giki, afulike, aliyo wei ongeja no kuhamuka giki, Bebe, Ngʼwana wa ngʼwa Daudi, unichile kigongo.

⁴⁰ Yesu wimila, ulagila bangʼwenhe kuli Wei; aho ungʼwegela umuja,

⁴¹ Uhaya giki, Utogilwe nakwitile ki? Nanghwe uhaya giki, Seba, ninhiwe kubona.

⁴² Na Yesu ungʼwila giki, Winhiwa kubona; kuzunya kwako kwakupijaga.

⁴³ Haho na haho winhiwa kubona, unondela, akunkujaga Mulungu. Na banhu bose aho bubona mhayo uyu, bunkumilija Mulungu.