Luka 16 - Ilagano Ipya Lya

Kigemenghejo cha mikijiwa nyecha

¹ Hangi ubawila bahemba bakwe giki, Walali ho munhu nsabi ubiza na mikijiwa uyo akabulwa giki, akuponanjaga shikolo shakwe.

² Nanghwe ungʼwitana ungʼwila giki, Ni mhayo ki uyo nigwaga kuli bebe? balaga bubiki wako; iki utudula kwikala uli mikijiwa wane hangi.

³ Mikijiwa wilunjalunja mu moyo gwakwe giki, Nite kinahe? iki seba wane waningijaga bubiki wane. Kulima natudula; kwilombeleja, nachile minala.

⁴ Namanile iyo nalite, ibize aho nupejiwa mu bubiki, babizunegeleja mu kaya jabo.

⁵ Ubitana bose abali na bugasa kuli seba wakwe umo umo, ungʼwila wa kwandia giki, Uli na bugasa ki kuli seba wane?

⁶ Uhaya giki, Ngelekelo igana ja maguta ga nzeituni. Ungʼwila giki, Anukulaga cheti yako, wigashe wangu, andikaga makumi atano.

⁷ Huna lulu ungʼwila ungi giki, Nangho uli na bugasa ki? Uhaya giki, Ngelekelo igana ja ngano. Ungʼwila giki, Anukulaga cheti yako, andikaga makumi anane.

⁸ Na seba unkumilija mikijiwa nyecha iki wali wita kisala: iki bana ba ikanza lyenili bali ba masalasala mu kibyalilwe chabo kutinda bana ba isana.

⁹ Na Nene namuwila giki, Nwanagi bunwani na sabo iyiti ya butungilija, ibize aho ilagaya ho, bangʼwegeleje mu wikalo wa welelo.

¹⁰ Uyo ali ngʼwishigwa mu kinhu kido, nu mu kitale ali ngʼwishigwa; na uyo ali nyecha mu kinhu kido, nu mu kitale ali nyecha.

¹¹ Kulwa iyo, ulu ngʼwali muti bishigwa mu sabo iyiti ya butungilija, nani akumusanya na busabi wa nghana?

¹² Hangi ulu ngʼwali muti bishigwa mu i sha bangi, nani akungʼwinha ishili shingʼwe?

¹³ Ati ho ntumami uwadula kubatumamila baseba babili; iki nulu akunkolwa umo, na kuntogwa ungi; nulu akudimana na umo, na kundalaha ungi. Mutudula kuntumamila Mulungu na sabo.

¹⁴ Bafarisayo abali bikumva ba feza nabo bigwa iyo yose, bunugulanugula.

¹⁵ Nanghwe ubawila giki, Bingʼwe muli abo mukwitungiligijaga benekele mu miso ga banhu; aliyo Mulungu amanile ngholo jingʼwe; iki iyikumiligije mu banhu yene ya malofu mu miso ga Mulungu.

¹⁶ Shilagilo na bahangi shali shili ho kushisha kuli Yohana; kufuma henaho evangeli ya butemi wa Mulungu ikulomelagwa, na buli munhu aliwingila na kwigaganija.

¹⁷ Aliyo ili changu igulu na si kubita ho kutinda kadone kamo ka shilagilo kugwa.

Kwilekanya mu butoji gitumo kuli

¹⁸ Buli munhu ose uwampeja nke wakwe, untola ungi, washihaja; nanghwe uwantola uyo waapejiwa na ngoshi wakwe, washihaja.

Munhu nsabi na Lazaro

¹⁹ Walali ho munhu nsabi, uwaazwalaga ngʼwenda gwaza na kitani, wikala uyega mu bunyemezu buli lushiku.

²⁰ Hangi walali ho kunese umo lina lyakwe Lazaro, ubyuponyiwa ha mita gwakwe, okalile malonda.

²¹ Wikumbulilwa kwigutiwa na malagalikwa agugwa kufuma ha meza ya nsabi; kushisha na mva jiza julamba malonda gakwe.

²² Yubiza giki, kunese uyo ucha, ubuchiwa na bamalaika kushisha mu kikuba cha ngʼwa Abrahamu. Nsabi nanghwe ucha, ujikwa.

²³ Mu kulimu ulangamila miso gakwe, aliluhaluhiwa; umona Abrahamu kule, na Lazaro ali mu kikuba chakwe.

²⁴ Ngʼwenuyo uhamuka uhaya giki, Baba Abrahamu, nichilage kigongo, untume Lazaro akinde ku mhelo ya lwala lwakwe mu minzi, alupoje lulimi lwane; iki nasatiwa mu moto uyu.

²⁵ Abrahamu uhaya giki, Ngʼwana bebe, izukagwa, bebe wali wanukula sha wiza shako mu bulamu wako, na Lazaro giko sha bubi; aliyo haha wei alilungujiwa, nangho ulisatiwa.

²⁶ Hangi kutinda iyi yose hagati ya biswe na bingʼwe lili ho lishimayenze itale lyadimiwa ho, giki, abatogilwe kubita kufuma kunu kuja ku bingʼwe, batudula, nulu batudula kufuma uko kubita kwiza ku biswe.

²⁷ Uhaya giki, Nahene Baba, nakwikumbilija untume ku numba ya ngʼwa baba;

²⁸ Iki ndi na bana ba ngʼwiswe bagosha batano, giki, abakanile no batiziza nabo ngʼwipande ili lya kuluhiwa.

²⁹ Abrahamu ungʼwila giki, Bali na Musa na bahangi, leka bigwe benabo.

³⁰ Uhaya giki, Yaya, Baba Abrahamu, aliyo umo wa bafu, ulu uja kubo, bakoya.

³¹ Ungʼwila giki, Ulu batungʼwigwa Musa na bahangi, nulu umo wa mu bafu ulu ujuka, nahene batalazunya.