Luka 14 - Ilagano Ipya Lya

Yesu umpija nsatu ha Sabato

¹ Ikabiza aho wali wingila mu numba ya ntale umo wa Bafarisayo ha Sabato kulya shiliwa, buntega malege.

² Na lolaga, walali ho munhu umo ku butongi wakwe asatile safula ya kududuma.

³ Na Yesu ushosha ubawila balangi ba shilagilo na Bafarisayo, uhaya giki, Angu, ilagilile kupija ha Sabato?

⁴ Aliyo boi bufulika du. Huna undima, umpija, unaga.

⁵ Na ushosha, ubawila giki, Nani mu bingʼwe ali na nzobe nulu ngʼombe, igwilile mu lwinzi, atuyinja haho na haho ha lushiku lwa Sabato?

⁶ Nabo buduma kunshokeja mihayo iyi.

Kukoba masumbi ga butale

⁷ Aho ubona gitumo abali bulalikwa bitangija masumbi ga butale, ulungalunga nabo kigemenghejo, ubawila giki,

⁸ Aho ulalikwa na munhu ku bukombe, utizigasha kwisumbi lya butale, itizubiza hamo ali ho uyo wa ikujo kutinda bebe walalikwa nanghwe.

⁹ Na uyo wamulalika bebe na wei, wiza kuli bebe, ukuwila giki, Ungʼwingile uyu; hunaho wandia kusola isumbi lya ku nghalikijo, wagokaga.

¹⁰ Aliyo aho ulalikwa, jaga ukigashe kwisumbi lya ku nghalikijo, ibize giki, aho wiza uyo wakulalika, akuwile giki, Nwani wane, egelaga kunu higulya; hunaho ukubiza na ikujo mu miso ga bose abigashije nangho ku shiliwa.

¹¹ Iki buli munhu ose uwikumilija ngʼwenekele aladohelejiwa; na uyo widoheleja ngʼwenekele akukumilijiwa.

¹² Hangi ungʼwila uyo uwanalika giki, Aho ubeja shiliwa sha kwikula nulu sha kulagila, utizubitana banwani biyo, nulu bana ba ngʼwingʼwe, nulu baduguyo nulu bazenganwa biyo basabi, giki, batizukulalika bebe hangi, na kukukuulila.

¹³ Aliyo aho ubeja sha buhondo, ubalalike bakunese, na balema, na bachigiji, na baboku;

¹⁴ Na bebe ukubiza na lubango; iki boi bati nasho sha kukukuulila, iki ulakuulilwa mu bujuko wa batungilija.

¹⁵ Umo wa benabo bali bigashije hamo nanghwe ku shiliwa, aho wigwa iyo, ungʼwila giki, Ali wa lubango uyo alalya shiliwa mu butemi wa Mulungu.

Kigemenghejo cha shigukulu

¹⁶ Wei ungʼwila giki, Munhu umo akabeja sha kulagila sha buhondo na ubalalika bingi.

¹⁷ Untuma nsese wakwe ngʼwikanza lya kulagila kubawila abali bulalikwa giki, Nzugwi, iki shose shilongije.

¹⁸ Nabo bose bandia na moyo gumo kwiyandayanda, balekelwe. Wa kwandia ungʼwila giki, Nagulaga ilale, nane shinigelile kuja kulilola; nakwikumbilija nilekage.

¹⁹ Na ungi uhaya giki, Nene nagulaga nziku ikumi ja kutumama, nane naja kujigema; nakwikumbilija nilekage.

²⁰ Nu ungi uhaya giki, Nene nantolaga nkima, kulwa mhayo uyu natudula kwiza.

²¹ Aho nsese ngʼwenuyo ushoka, unsombolela seba wakwe mihayo iyi. Hunaho namugi usaya, ungʼwila nsese wakwe giki, Jaga wangu mu mapalapala, na mayila ga nzengo, ubenhe kunu bakunese, na balema, na bachigiji, na baboku.

²² Huna nsese uhaya giki, Seba, yitagwa gitumo walagila, na hatali ho ngʼwanya.

²³ Seba ungʼwila nsese giki, Jaga ku nzila nyawagendwa na ku mapanda ubahadike kwingila, numba yane yizule.

²⁴ Iki namuwila giki, Bagosha benabo abali bulalikwa batalaloja sha buhondo shane, nulu umo yaya.

Kunondela Yesu

²⁵ Hunaho mabita matale gubyuja hamo nanghwe; ugaluka, ubawila banhu giki,

²⁶ Munhu ulu wiza kuli Nene, na atunkolwa ise, na nina, na nke, na bana, na bana ba ngʼwawe, bagosha na bakima, hangi nu bupanga wakwe ngʼwenekele, atudula kubiza nghemba wane;

²⁷ Hangi uyo ose atubuchaga nsalaba gwakwe, na kunilondela, atudula kubiza nghemba wane.

²⁸ Iki nani mu bingʼwe ulu atogilwe kuzenga numba ndihu, atigasha tame kubala mpango gwayo, ulu ah nasho sha kuyimala?

²⁹ Himba ulu wamala kuzenga musingi na uduma kuyimala, bose abuyibona bandia kumbyeda,

³⁰ Buhaya giki, Munhu uyo akandia kuzenga, uduma kuyimala.

³¹ Nulu ntemi nani ulu ajile kulwisha bulugu na ntemi ungi, atigasha tame kulomana mihayo, ulu wadula na bashilikale 10,000 kumanhya na uyo izile kwilwisha nanghwe na bashilikale 20,000?

³² Aliyo ulu itudulika, aho atalali kule no, utuma banamhala, ubuja nzila ya mhola.

³³ Giko lulu, munhu ose mu bingʼwe uyo atilecha ngʼwenekele shose isho ali nasho, atudula kubiza nghemba wane.

³⁴ Munu gwene gwa wiza, aliyo ulu munu gusuka gukunoniwa na ki?

³⁵ Gutubela kutuulwa nulu mu si nulu mu mbolela; buguponya hanze. Uyo ali na matu ga kwigwa, leka igwe.