Luka 12 - Ilagano Ipya Lya

Kibimbya cha Bafarisayo

¹ Ngʼwikanza lyenilo aho banhu shiku na shiku bibilingila hamo, kushisha bipandagila, Wei wandia kubawila bahemba bakwe kwandia giki, Ilanghanagi ku kibimbya cha Bafarisayo, i chene wibeleja.

² Iki guti ho mhayo ugukundikigije, ugutalakundulwa, nulu uyo gubisile ugutalamanika.

³ Kulwa iyo, yose iyo ngʼwahaya mu giiti, iligwiwa ngʼwisana; na iyo ngʼwalungalunga mu kutu ku mbele ya numba, ilalomelwa higulya ha numba.

⁴ Nene namuwila bingʼwe banwani bane giki, Mitizubogoha abubulaga mili, na hanuma yaho gubagaya gwa kwita kutinda ho.

⁵ Aliyo nakungʼolekeja uyo mulangʼogohage: Ngʼogohagi Uyo, aho wamala kubulaga, ali na budula kuponya mu Gehena: ali chene, namuwila giki, Ngʼogohagi Ngʼwenuyo.

⁶ Angu, nzwi itano jitajinjiwagwa na senti ibili? aliyo nulu imo yajo itibilagwa mu miso ga Mulungu.

⁷ Aliyo nulu nzwili ja mitwe yingʼwe najo jibalilwe jose. Kulwa iyo, mutizogoha: bingʼwe mujikilile no nzwi ningi?

⁸ Nene namuwila giki, Uyo ose wanizunya na kunitambula ku butongi wa banhu, ngʼwenuyo Ngʼwana wa munhu nanghwe alantambula ku butongi wa bamalaika ba Mulungu;

⁹ Aliyo uyo ose wanilema ku butongi wa banhu, ngʼwenuyo alalengʼwa ku butongi wa bamalaika ba Mulungu;

¹⁰ Na uyo ose unghaya kibi Ngʼwana wa munhu, alalekejiwa; aliyo uyo unduka Moyo Ngʼwela, ngʼwenuyo atalalekejiwa.

¹¹ Aliyo aho balamutwala mu mabilingilo na ku butongi wa basugi na ba budula, mutizikoyakoya umo mulilwililila, nulu iyo mulahaya;

¹² Iki Moyo Ngʼwela alamulanga ngʼwikanza lyenilo iyo yingʼwigelile kuhaya.

Kwikumva kwa sabo umo kuli

¹³ Umo wa ngʼwibita akangʼwila giki, Nangi, ngʼwilage ngʼwana wa ngʼwiswe kugabanha wingiji na nene.

¹⁴ Aliyo Wei ungʼwila giki, Munhu bebe, nani wanituula ho kubiza nekanya nulu nyanguji ku bingʼwe?

¹⁵ Nanghwe ubawila giki, Ilanghanagi, ngʼwilinde ku kwikumva; iki bupanga wa munhu buti mo mu wingi wa shikolo isho ali nasho.

¹⁶ Ubawila kigemenghejo, uhaya giki, Ngunda gwa munhu nsabi umo guponeka wingi.

¹⁷ Widedekanya mu moyo gwakwe, uhaya giki, Nite kinahe, iki nati na ha kubikila matwajo?

¹⁸ Uhaya giki, Nakwita giki, nakusambula mabikilo gane, nakuzenga gangi matale kutinda, na umo nakubika magesa gane na sha wiza shane.

¹⁹ Huna lulu nakubuwila bupanga wane giki, Bupanga wane, bebe uli na sha wiza shingi shabikagwa sha miaka mingi, ifulage, lyaga, ngʼwaga, uyege.

²⁰ Aliyo Mulungu ungʼwila giki, Mbuuli bebe, bujiku ubu bupanga wako bakubulomba hali bebe; na isho washilongije shikubiza sha ngʼwa nani?

²¹ Giko na ngʼwenuyo akwibikilaga sabo, aliyo ati nsabi kuli Mulungu.

²² Ubawila bahemba bakwe giki, Kulwa nguno iyi, namuwila giki, Mutizikoyela bupanga wingʼwe giki, Mukulya ki; nulu mibili yingʼwe giki, Mukuzwala ki.

²³ Ambu, bupanga bukilile shiliwa, nago mili gukilile shizwalo.

²⁴ Iganikagi ku makungulu giki, gatabibaga mbiyu, nulu gatagesaga, nago gati na ifuma nulu ibikilo, na Mulungu ugalisha. Na bingʼwe mujikilile noni himba nghangala jinga?

²⁵ Nani mu bingʼwe mu kwikoyela wadula kongeja nkono gumo ku bulihu wakwe?

²⁶ Kulwa iyo, ulu mutuguduja nulu mhayo ndo, mukwikoyelaga iyo yingi ni buli?

²⁷ Iganikagi ku mabonji gitumo gakakulaga; gatatumamaga, nulu gatalukaga; aliyo namuwila giki, Solomoni ngʼwikujo lyakwe lyose walatuzwalichiwa giti limo lyago.

²⁸ Aliyo ulu Mulungu ugazwalicha giko maswa ga kwitogolo agali ho lelo, na ntondo guponyiwa mu liko, angu, atungʼwitila kutinda no, bingʼwe ba kuzunya kudo?

²⁹ Na bingʼwe mutizukoba icho mukulya nulu icho mukungʼwa, nulu mutizubuchabuchiwa.

³⁰ Iki bana mahanga ba si bakakobaga ishi shose; aliyo Singʼwe amanile giki, Shingʼwigelelilwe ishi shose.

³¹ Aliyo hambuhambu kobagi butemi wa Mulungu, na ishi shose mulongegejiwa.

³² Mutizogoha, bingʼwe idale ido, iki Singʼwe wayega kungʼwinha bingʼwe butemi.

³³ Jinjagi isho muli nasho, mufunye sha kwinha; ibegejagi tubogoshi tutukuluhala, busabi ubutalashila ngʼwigulu, uko ngʼwibi ategela, nulu mbalabapu jitukenagula.

³⁴ Iki busabi wingʼwe uko buli, ngholo yingʼwe nayo ikubiza ho.

Kunindila kushoka kwa Seba

³⁵ Ikalagi ngʼwitungile mikimbili yingʼwe, na tala jingʼwe jibakile:

³⁶ Na bingʼwe mubize giti banhu bakunindilaga Seba wabo, aho alashoka kufuma bukombe, ibize aho wiza na kukomagula, banugulile haho na haho.

³⁷ Bali ba lubango basese abo, Seba wabo alabasanga bali miso aho aliza. Nghana namuwila giki, Alitunga ngʼwenekele, na kubigasha ku shiliwa, nanghwe alabegela kubinhilija.

³⁸ Na ulu wiza mu bulindi wa kabili, nulu wiza mu bulindi wa kadatu, na ubasanga chene, bali ba lubango basese benabo.

³⁹ Aliyo managi mhayo uyu, ulu namugi ni walamanile ngʼwikanza ki ngʼwibi akwizila mo, ni wali wikala miso, ni walatuleka numba yakwe kudululwa.

⁴⁰ Kulwa iyo ningʼwe bizagi mumalilile; iki ngʼwikanza ilo mutiganikilaga Ngʼwana wa munhu aliza.

Kigemenghejo cha miki na batumami

⁴¹ Petro ungʼwila giki, Seba, ulilungalunga kigemenghejo iki ku biswe, nulu ku bose?

⁴² Seba uhaya giki, Miki ngʼwishigwa na wa masala ali nani lulu, uyo seba wakwe alantuula ho kubiza nindi wa kaya yakwe, kubinha ngelo gwa shiliwa ngʼwikanza lyasho?

⁴³ Ali wa lubango nsese ngʼwenuyo, seba wakwe aho aliza alansanga akwitaga giko.

⁴⁴ Nghana namuwila giki, Alantuula higulya ya shikolo shakwe shose.

⁴⁵ Aliyo nsese ngʼwenuyo ulu uhaya mu ngholo yakwe giki, Seba wane wapilaga kwiza, na wandia kubatula basese, bagosha na basese bakima, na kulya na kungʼwa na kukolwa shikoji.

⁴⁶ Seba wa nsese ngʼwenuyo aliza mu lushiku ulo atiganikaga, na mu saa iyo atamanile, nanghwe alantandula hagati, alantuulila ngabo gwakwe hamo na batuzunya.

⁴⁷ Nsese ngʼwenuyo walamanile iyo seba wakwe atogilwe, na walatamalilile ngʼwenekele, nulu kwita gitumo iyo atogilwe, ngʼwene alatulwa mingi.

⁴⁸ Aliyo uyo walatamanile, na wita iyo igelelilwe milanga, ngʼwene alatulwa migehu. Uyo ose winhiwa shingi, alakowa shingi; na uyo bali bamikila shingi, ngʼwenuyo balanomba shingi kutinda.

Kristo uhanga kulekana kwa banhu

⁴⁹ Nakiza kuponya moto mu si, na ulu haha gwabakaga natogilwe ki?

⁵⁰ Aliyo ndi na kubatijiwa nabatijiwe nako, na Nene napimiila kinahe kushisha kulashikilijiwa.

⁵¹ Ngʼwiganika giki, Nali niza kwinha mhola mu si? Namuwila giki, Yaya; aliyo kulekana.

⁵² Iki kufuma haha bakubiza ho batano mu kaya imo, balekanile, badatu babahangija babili, babili babahangija badatu.

⁵³ Bakulekana ise kunghangija ngʼwana wakwe; na ngʼwana kunghangija ise; nina kunghangija ngʼwana wakwe ngʼwaniki; na ngʼwana ngʼwaniki kunghangija nina; nina buko kunghangija ngʼwinga wakwe, na ngʼwinga kunghangija nina buko.

⁵⁴ Ugawila na mabita giki, Aho ngʼwabona ilunde lililinha ku ngʼweli, haho na haho ngʼwahaya giki, Mbula iliza; na yubiza chene.

⁵⁵ Na aho nyaga gwa dakama guhemba, ngʼwahaya giki, Bukubiza ho busebu no; na yubiza chene.

⁵⁶ Bingʼwe bibeleja, mumanile kupima chikolile cha si na igulu; aliyo mutupimaga ikanza ili ni buli?

⁵⁷ Nulu mu mioyo yingʼwe benekele mutalekanyaga iyo ya butungilija ni buli?

⁵⁸ Iki aho ujile na ngʼwanishi wako kuli nsugi, komelaga kutungulwa nanghwe aho mutali muli mu nzila; atizukuduta ku butongi wa nekanya, nanghwe nekanya ukwinha ko kuli nshilikale, na nshilikale ukutunga mu jela.

⁵⁹ Nakuwila giki, Utalinga mo na hado kushisha ulamala kufunya nulu senti ya kumalija.