Luka 11 - Ilagano Ipya Lya

Yesu ulanga kulomba

¹ Ikabiza aho ulomba ngʼwipande limo, aho oya, umo wa bahemba bakwe ungʼwila giki, Seba, tulangage biswe kulomba, gitumo Yohana nanghwe wali ubalanga bahemba bakwe.

² Ubawila giki, Aho ngʼulomba hayagi giki, Siswe uli ngʼwigulu, lina lyako likujiwe; butemi wako wize, iyo utogilwe yitwe, mu si giti ngʼwigulu.

³ Twinhage buli lushiku migati yiswe ya kutwigela.

⁴ Utulekeje shibi shiswe; iki na biswe tukunekejaga buli munhu ose uyo ali na bugasa ku biswe: utizututwala mu kugengʼwa; aliyo utupije muli uyo mi.

⁵ Ubawila giki, Nani mu bingʼwe uyo ali na nwani ngʼwiye, ulu uja kuli wei bujiku hagati, na ungʼwila giki, Nwani ngʼwichane, nigobishage migati idatu,

⁶ Iki nwani ngʼwichane ngʼwanigenihaga afumile mu lugendo, nane nati na kinhu cha kuntengela.

⁷ Na uyo ali mu numba ushosha uhaya giki, Utizunikoyakoya; haha luwigi lulugalile, na bana bane balalaga hamo na nene ha bulili, natudula kubuka kukwinha.

⁸ Namuwila giki, Nulu atubuka kungʼwinha kulwa ali nwani ngʼwiye, aliyo kulwa kugumiila kwakwe akubuka na kungʼwinha yose iyo wayigongela.

⁹ Na Nene namuwila giki, Lombagi na mukwinhiwa; kobagi na mukubona; komagulagi na mukwigulilwa.

¹⁰ Iki buli munhu uyo ulomba, wanukula; na uyo ukoba, ubona; na uyo ukomagula, akwigulilwa.

¹¹ Nani mu bingʼwe uyo ali ise, ulu ngʼwana wakwe unomba ngati, akungʼwinha iwe? Nulu unomba ndilo, ha lwande lwa ndilo akungʼwinha nzoka?

¹² Nulu unomba igi, akungʼwinha nghomi.

¹³ Nahene ulu bingʼwe aba muli ba bubi, mumanile kubinha bana bingʼwe shinhu sha wiza, angu, Singʼwe ali ngʼwigulu atutinda no kubinha Moyo Ngʼwela a benabo abunomba.

Kibi cha kunduka Moyo Ngʼwela

¹⁴ Na wali ulipeja isamva, nalyo lyali lili lya kimumu. Ikabiza giki, aho isamva lyinga, uyo walali kimumu ulungalunga, na mabita gukumya.

¹⁵ Aliyo bamo buhaya giki, Akupelaga masamva mu budula wa Beelzebuli, ntale wa masamva.

¹⁶ Bangi bungema, bukoba kimanikijo cha kufuma ngʼwigulu.

¹⁷ Aliyo iki umana maganiko gabo, ubawila giki, Buli butemi uwilekanya wenekele, wiyita dalali; numba iyilekanya yenekele, yugwa.

¹⁸ Ulu Shetani nanghwe wilekanya ngʼwenekele, butemi wakwe bukwimila kinahe? Iki bingʼwe mulihaya giki, Nene nakupejaga masamva mu budula wa Beelzebuli.

¹⁹ Aliyo Nene ulu nakugapejaga masamva mu budula wa Beelzebuli, bana bingʼwe bakugapejaga mu budula wa ngʼwa nani? Kulwa iyo, boi bakubiza balekanya bingʼwe.

²⁰ Aliyo Nene ulu nakugapejaga masamva na lwala lwa Mulungu, huna lulu butemi wa Mulungu wangʼwiziila bingʼwe.

²¹ Aho munhu wa nguzu itungile shilanga akulindilaga kaya yakwe, shikolo shakwe shili mhola:

²² Aliyo wa nguzu kutinda aho ungʼubukila na umpyena, untagija shilanga shakwe shose isho walashisanije, ugabanya shasonzwa shakwe.

²³ Uyo ati ku lwande lwane ali ngʼwanishi wane: na uyo atukumingaga hamo na Nene usalanghanya.

Kuleba ho kwa wibeleja

²⁴ Moyo nsoso aho gungʼwinga munhu, gubita mu mapande agati na minzi gukobakoba ha kwifulila; aho gutubona, guhaya giki, Nakushoka mu numba yane iyo nali ninga mo.

²⁵ Aho gushika ko, guyisanga ipyagulile na imalilile.

²⁶ Hunaho guja gwenha mioyo yingi mpungati ya bubi kutinda goi, nayo yingila na yikala mo; nghalilo ya munhu ngʼwenuyo yubiza ya bubi kutinda u wandijo.

²⁷ Ikabiza aho ulungalunga mihayo iyi, nkima umo ngʼwibita, uhayila higulya ungʼwila giki, Ili ya lubango nda iyo yali yukubucha, na mbele ijo wali ongha.

²⁸ Aliyo Wei uhaya giki, Aliyo kutinda, bali ba lubango abakwigwaga mhayo gwa Mulungu na bugudima.

Kimanikijo cha Yona

²⁹ Aho mabita gali gibilinga gishita di, akandia kuhaya giki, Kibyalilwe iki kili cha bubi; kikukobaga kimanikijo, aliyo kitinhiwa kimanikijo ulu iti kimanikijo chene nghangi Yona.

³⁰ Iki giti Yona wali ubiza kimanikijo ku bana Nineve, Ngʼwana wa munhu nanghwe alabiza chene ku kibyalilwe iki.

³¹ Ntemi nkima wa dakama alimila mu kulekanyiwa nsango hamo na banhu ba kibyalilwe iki, alabenheleja kubona nsango; iki akiza kufuma ku mhelo ja si kwigwa masala ga ngʼwa Solomoni; na lolaga, ntale wa kunkila Solomoni ali ho aha.

³² Banhu ba Nineve balimila mu kulekanyiwa nsango hamo na kibyalilwe iki, na balachenheleja kubona nsango; iki bali boya kuhva kulomela kwa ngʼwa Yona, na lolaga, ntale wa kunkila Yona ali ho aha.

Kigemenghejo cha tala

³³ Ati ho munhu aho ubacha tala, uyituula ngʼwipande lya kwigeniha, nulu kuyigubanikija na ikililijo, aliyo uyituula ha ikindikilo lya tala, abingila mo babone isana.

³⁴ Tala ya mili yene liso: aliyo aho liso lyako Usonga wima, mili gwako gose gukubizaaka isana; aliyo ulu liso lyako lili lya bubi, mili gwako gose gukubiza giiti.

³⁵ Kulwa iyi ilanghanage i lisana ilili mo muli bebe Utizubiza giiti.

³⁶ Aliyo ulu mili gwako gose gukubizaaka isana, nago guti na lwande ululi na giiti, gose gukubizaaka isana, gitumo tala ikukumulikilaga na isana lyayo.

Yesu ubolomya Bandiki na Bafarisayo

³⁷ Aho walatali ulungalunga Mfarisayo umo ungʼwitana kulya ikule nanghwe; nanghwe wingila wigasha ku shiliwa.

³⁸ Aliyo Mfarisayo aho ubona iyo, ukumya iki atakalabile aho atali kulya.

³⁹ Aliyo Seba ungʼwila giki, Giisi, bingʼwe Bafarisayo mukojaga kunze ya kikombe na sahani, aliyo mugati yingʼwe ngʼokalile bunyecha na buhunga.

⁴⁰ Bingʼwe babuuli; Uyo akabeja kunze, angu, walatabegije nu mugati?

⁴¹ Aliyo funyagi sha kwinha shingʼwe sha mu isho sha mugati, na lolagi, shose shikubiza shela ku bingʼwe.

⁴² Aliyo ngʼwasangwa, bingʼwe Bafarisayo, iki mukufunyaga imo ya ngʼwikumi ya nana na mchicha na buli ikubi, aliyo kulekanya mu wima na butogwa wa Mulungu mukushihungaga; yeniyi shali shingʼwigelile kuyita, na yeniyo yingi kuyileka yaya.

⁴³ Ngʼwasangwa bingʼwe Bafarisayo, iki mutogilwe masumbi ga ku butongi mu mabilingilo, na kugishiwa mu nghungʼwano.

⁴⁴ Ngʼwasangwa bingʼwe, bandiki na Bafarisayo, bibeleja, iki ngʼwikolile na mashigila agatabonagwa, na banhu abakushiminzilaga higulya yago batagitegelegije.

⁴⁵ Umo wa balangi ba shilagilo ushosha, ungʼwila giki, Nangi, mu kuhaya giko, ngʼwatudalaha na biswe.

⁴⁶ Aliyo Wei uhaya giki, Ngʼwasangwa na bingʼwe, balangi ba shilagilo, iki mukubasesejaga banhu miligo iyili kilambu kubuchiwa, na bingʼwe benekele mutuyichegenya na lwala lumo lwingʼwe.

⁴⁷ Ngʼwasangwa bingʼwe, iki mukuzengaga mashigo ga bahangi, aliyo bakulugenji bingʼwe bubabulaga.

⁴⁸ Giko mukushikanilaga na kushizunilija shitile sha bakulugenji bingʼwe; iki boi bali bubabulaga nghana, na bingʼwe mukuzengaga mashigo gabo.

⁴⁹ Kulwa iyo, masala ga Mulungu nago gakahaya giki, Nalabatumila bahangi na batungʼwa, na balababulaga bamo babo na kubapeja.

⁵⁰ Gakowe kuholwa ku kibyalilwe iki mininga ga bahangi bose agali gusejiwa kufuma kubumva kwa si;

⁵¹ Kufuma ku mininga ga ngʼwa Abeli kushisha ku mininga ga ngʼwa Zakaria uyo akabulagwa hagati ya ngʼwalilo na hekalu.

⁵² Ngʼwasangwa bingʼwe, balangi ba shilagilo, iki ngʼwalwingije lufungulo lwa bumani, bingʼwe benekele mutingilile, na abali buhaya kwingila ngʼwabajigije.

⁵³ Aho walatali ulungalunga nabo mihayo iyi, bandiki na Bafarisayo bandia kungʼwikobya na nguzu, na kunyombyanyombya mihayo mingi;

⁵⁴ Buntega malege, bukoba kudima mhayo ugulafume mu nomo gwakwe, bamule.