Luka 10 - Ilagano Ipya Lya

Yesu ubatuma bahemba 70 kulomela

¹ Hanuma ya mihayo iyi, Seba wali ubatuula ho hangi makumi mpungati, ubatuma babili babili, batonge ku butongi wakwe, ku buli nzengo na buli ipande uko uhaya kuja Ngʼwenekele.

² Ubawila giki, Magesa gene mingi aliyo bagesi bene bagehu: kulwa iyo ngʼwikumbilijagi Seba wa magesa abatume batumami mu magesa gakwe.

³ Jagi lulu: lolagi, namutuma giti bana ba ngholo hagati ya mhuge.

⁴ Mutizubucha kabogoshi, nulu mhinda, nulu shilatu, hangi mutizungisha munhu ose mu nzila.

⁵ Numba yose iyo ngʼwingila mo, hayagi tame giki, Mhola ibize mu numba iyi:

⁶ Na ulu ali mo ngʼwana wa mhola, mhola yingʼwe ikwikala kuli wei; aliyo ulu iti chene, mhola yingʼwe ikushoka ku bingʼwe hangi.

⁷ Ikalagi mu kaya yeniyo, mulyage na mungʼwage isho bakungʼwinha; iki ntumami igelelilwe mhela yakwe. Mu-tizusamasama kuja numba yingi na yingi.

⁸ Na nzengo gose uyo ngʼwingila mo, nabo bungʼwanukula, lyagi isho shutengelwa mu butongi wingʼwe.

⁹ Bapijagi balwile abali mo, bawilagi giki, Butemi wa Mulungu wangʼwegelaga bingʼwe.

¹⁰ Aliyo nzengo gose uyo ngʼwingila mo, nabo batungʼwanukula, jagi mu mapalapala gago, muhaye giki,

¹¹ Nu lububu lwa nzengo gwingʼwe ulwatudamilaga, twamugunghumulila bingʼwe, aliyo nahene managi mhayo uyu giki, butemi wa Mulungu wangʼwegelaga.

¹² Namuwila giki, Ilabiza hambuhambu ku Sodoma kwiyumilija mu lushiku lwenulo kutinda ku nzengo gwenuyo.

Mizengo idatu yuhayiwa nsango

¹³ Ulasangwa bebe Korazini! Ulasangwa bebe Bethsaida! iki shitile sha budula isho shali Shitwa mu bingʼwe ulu ni shali Shitwa mu Turo na Sidoni, ni bali boya kale, bigashije mu mabu, bazwalile magunila.

¹⁴ Aliyo ilabiza hambuhambu ku Turo na Sidoni kwiyumilija mu kulekanyiwa nsango kutinda ku bingʼwe.

¹⁵ Na bebe, Kapernaumu, uwagunguhiwa kushisha ngʼwigulu, uladohelejiwa kushisha kulimu.

¹⁶ Uyo ungʼwigwa bingʼwe, ngʼwene unigwa Nene; na uyo umulema bingʼwe, ngʼwene unilema Nene; na uyo unilema Nene, ngʼwene unema Uyo waanituma.

Kushoka kwa bahemba 70

¹⁷ Na benabo makumi mpungati bushoka na buyegi, buhaya giki, Seba, na masamva gali hasilili ya budula wiswe mu lina lyako.

¹⁸ Nanghwe ubawila giki. Nakamona Shetani aligwa kufuma ngʼwigulu giti lulabi.

¹⁹ Lolagi, nangʼwinha bingʼwe budula wa kupanda nzoka na nghomi, hangi wa higulya ya nguzu jose ja ngʼwanishi, hangi kiti ho kinhu kilangʼwita kibi.

²⁰ Aliyo nahene mutizuyegela mhayo uyu giki, mioyo ili hasilili ya budula wingʼwe; aliyo yegagi iki mina gingʼwe gaandikwa ngʼwigulu.

²¹ Ngʼwikanza lyenilo Yesu uyega no muli Moyo, uhaya giki, Nakulumba, Bebe, Baba, Seba was igulu na si, iki uka-babisila mihayo iyi a balalanghanu na ba masala, na uyikundula ku banigini: ah chene, Baba, iki giko yali yukutoga.

²² Ubagalukila bahemba bakwe, uhaya giki, Yose ninhiwagwa na Baba; na ati ho uyo amanile Ngʼwana aliyo Baba wike: hangi ati ho uyo amanile Baba aliyo Ngʼwana wike, na uyo ose Ngʼwana atogilwe kunkundula.

²³ Na ubagalukila bahemba bakwe, ubawila mu kwigeniha giki, Gali ga lubango miso agakubonaga iyo mukubonaga.

²⁴ Iki namuwila giki, Bahangi bingi na batemi bali batogilwe kuyibona iyo mukubonaga bingʼwe, aliyo bali batuyibona; na kuyigwa iyo mukwigwaga bingʼwe aliyo bali batuyigwa.

Kigemenghejo cha muna Samaria

²⁵ Na nangi umo wa shilagilo akimila, ungema, uhaya giki, Nangi, nite ki ningile mu bupanga butushila?

²⁶ Ungʼwila giki, Yaandikwa kinahe mu shilagilo? wasoma kinahe?

²⁷ Ushosha uhaya giki, Ulantogagwe Seba Mulungu wako na ngholo yako yose, hangi na bupanga wako bose, hangi na nguzu jako jose, hangi na maganiko gako gose: na kuntogwa nzenganwa ngʼwiyo gitumo witogelilwe ngʼwenekele.

²⁸ Nanghwe ungʼwila giki, Watungilijaga; itaga giko, nangho ulabiza na bupanga.

²⁹ Aliyo iki wei walatogilwe kwiyinha butungilija, ungʼwila Yesu giki, Na nzenganwa ngʼwichane ni nani?

³⁰ Yesu ushosha uhaya giki, Munhu umo akafuma Yerusalemi utulumenha kuja Yeriko, wifumbukijiwa na basambo, bunzuja shizwalo shakwe, bungulaja, buja, buneka ali mandetendete.

³¹ Kwita giki, ngabiji umo utulumenha mu nzila yeniyo, aho umona, ubitila ku mhelo.

³² Nawi nanghwe giko, uyo walali ngʼwipande lyenilo, aho ushika, umona, ubitila ku mhelo.

³³ Aliyo muna Samaria umo mu lugendo ushika aho ali; aho umona, unsatwa;

³⁴ Na ungʼwegela, untunga malonda gakwe, ungʼwitila maguta na minzi ga mizabibu, undamija ha nzobe yakwe, ungʼwenha ku numba ya bageni, unabila.

³⁵ Ku ntondo aho ubuka kuja, usola shilingi ibili, ungʼwinha ngʼwenekele numba ya bageni, ungʼwila giki, Nabilage uyu, na icho chose ukufunya cha kukilanya, nene ngʼwenekele nakukukuulila aho nakushoka.

³⁶ Wabona kinahe lulu, mu benabo badatu nani walali nzenganwa ngʼwiye wa ngʼwenuyo uwali wifumbukijiwa na basambo?

³⁷ Uhaya giki, Uyo akanchila kigongo. Na Yesu ungʼwila giki, Jaga, nangho wite chene.

Martha na Mariamu

³⁸ Ikabiza aho bajile, wingila mu nzengo gumo; na nkima umo lina lyakwe Martha ungʼwanukula mu numba yakwe.

³⁹ Nanghwe walali na ngʼwana wa ngʼwawe, lina lyakwe Mariamu, uyo wali igashije ku mhambala ja ngʼwa Yesu, udegeleka mhayo gwakwe.

⁴⁰ Aliyo Martha wali wita iyanga kulwa kwinhilija kwingi; uja kuli Wei, uhaya giki, Seba, utukalalagwa iki ngʼwana wa ngʼwiswe wanilekanijaga kwinhilija niyene? Ngʼwilage lulu, anigunane.

⁴¹ Aliyo Yesu ushosha ungʼwila giki, Martha, Martha, bebe wikoyakoya na winojanoja na mihayo mingi.

⁴² Aliyo mhayo gumo gwike gugongilwe kwitwa; na Mariamu wakomaga ngabo gwa wiza, uyo atalagwingijiwa.