Luka 1 - Ilagano Ipya Lya

Mbuki ya mihayo iyi

¹ Iki bingi batuulile ho makono gabo kutunga mu kwihela kasombolele ka mihayo iyo yazunyiwa gete mu biswe,

² Gitumo benabo abali bali baboni na bitumamija ba mhayo uyu kufuma kwandia, bututuulila ho mihayo iyi,

³ Nu nene nubona ili ya wiza kukwandikila mu kwihela bebe, Theofilo wa wiza, iki nene nayikomela mihayo iyi yose wima kufuma kwandia;

⁴ Umane nghana ya mihayo iyo waalangwa. Buhangi wa kubyalwa kwa ngʼwa Yohana Matija

⁵ Mu shiku ja ngʼwa Herode, ntemi wa Buyudaya, walali ho ngabiji lina lyakwe Zakaria, wa ngʼwigele lya Abiya: na nke walali wa bana ba ngʼwa Aroni, lina lyakwe Elizabeti.

⁶ Nabo bubili wabo bali bali batungilija mu miso ga Mulungu, bubyushiminza mu shilagilo shose na mu shitile sha Seba, bali bati na kilingo.

⁷ Nabo bali bati na ngʼwana, iki Elizabeti walali ngumba, nabo bubili wabo bali bakulile mu bulamu wabo.

⁸ Yubiza giki, aho akwitaga nimo gwakwe gwa bugabiji mu butongi wa Mulungu, mu kwihela kwa igele lyakwe,

⁹ Gitumo chimile cha nimo gwa bugabiji, mbale yungwila ya kwingila mu hekalu ya Seba, na kuzukija ngazu.

¹⁰ Na ibita lyose lya banhu lyali lyulomba hanze ngʼwikanza lya kuzukija ngazu.

¹¹ Ungʼwilongela malaika wa Seba imilile ha ipande lya bulyo lya ngʼwalilo gwa kuzukigija ngazu.

¹² Na Zakaria aho umona ukoyakoyiwa, na boba butale bungwila.

¹³ Aliyo malaika ungʼwila giki, Utizogoha Zakaria; iki kulomba kwako kwigwiwagwa; na nke wako Elizabeti alakubyalila ngʼwana ngosha, na ulangʼwilika lina lyakwe Yohana.

¹⁴ Nangho ulabiza na kuyega na busangabazu, na bingi balayegela kubyalwa kwakwe.

¹⁵ Iki wei alabiza ntale mu butongi wa Seba; nanghwe atalangʼwa minzi ga mizabibu nulu kikoji, na alizula na Moyo Ngʼwela kufumila mu nda ya ngʼwa nina.

¹⁶ Na bingi ba bana ba Israeli alabagalucha kuli Seba Mulungu wabo.

¹⁷ Nanghwe alatonga ku butongi wakwe mu moyo na budula wa ngʼwa Eliya, kujigalucha ngholo ja basabo ku bana babo; na bakitigwa ku masala ga batungilija, na kunongeja Seba banhu abamalilile.

¹⁸ Na Zakaria ungʼwila malaika giki, Nakumana kinahe mhayo uyu? iki nene ndi namhala, na nke wane wagiguluhile.

¹⁹ Na malaika unshokeja ungʼwila giki, Nene ndi Gabrieli, uyo nakwimilaga mu butongi wa Mulungu; nane natumagwa kulungalunga na bebe, na kukumanikija mihayo iyi ya wiza.

²⁰ Na lolaga, ukubiza kimumu na utudula kulungalunga kushisha lushiku ulo mihayo iyi ilabiza ho, iki utazunije mihayo yane, iyilashikilijiwa ngʼwikanza lyayo.

²¹ Na banhu hali bunindila Zakaria, bukukumya kudila kwakwe mu hekalu.

²² Aho utuma walatudula kulungalunga nabo; bitegeleja giki, wabonaga kolechiwa mu hekalu; nanghwe ubyubagemelela na makono, na wikala kimumu.

²³ Na yubiza, aho shiku ja butumami wakwe jali jushila, uja ku kaya yakwe.

²⁴ Hanuma ya shiku ijo nke wakwe Elizabeti utunga nda: wibisa mieji itano, uhaya giki,

²⁵ Giko Seba wanitilaga nene mu shiku ijo wanilolela kuningija kudalahwa kwane mu banhu. Buhangi wa kubyalwa kwa ngʼwa Yesu Kristo

²⁶ Mu ngʼweji gwa katandatu malaika Gabrieli utungʼwa na Mulungu ku nzengo gwa mu Galilaya, lina lyago Nazareti,

²⁷ Kuli munhya ngʼwibembu walalunjiwe na ngosha lina lyakwe Yusufu, wa numba ya ngʼwa Daudi; na lina lya munhya ngʼwibembu lyene Mariamu.

²⁸ Na malaika wiza kuli wei, uhaya giki, Mhola, bebe uwinhiwagwa kigongo, Seba ali hamo na bebe.

²⁹ Aho umona, ukoyakoyiwa no na mhayo gwakwe, widedekanya kugishiwa kwenuku kuli kinahe?

³⁰ Na malaika ungʼwila giki, Utizogoha Mariamu, iki wabonaga kigongo kuli Mulungu.

³¹ Na lolaga, ukutunga nda, ulamyala ngʼwana ngosha, ulangʼwilika lina lyakwe Yesu.

³² Wei alabiza ntale, alitanwa Ngʼwana wa Ngʼwenuyo ah higulya no; na Seba Mulungu alangʼwinha isumbi lya butemi lya nkulugenji wakwe Daudi;

³³ Nanghwe alayisuga numba ya ngʼwa Yakobo welelo na welelo; hangi butemi wakwe butalafunda.

³⁴ Mariamu ungʼwila malaika giki, Mhayo uyu gukubiza kinahe, iki natamanile ngosha?

³⁵ Na malaika ushosha ungʼwila giki, Moyo Ngʼwela akukwiziila, na budula wa Ngʼwenuyo ali higulya no bukukufwikija giti nengeji; kulwa iyo kinhu chela icho kilabyalwa na bebe kilitanwa Ngʼwana wa Mulungu.

³⁶ Na lolaga, Elizabeti nduguyo nanghwe waatunga nda ya ngʼwana ngosha mu bugikulu wakwe, na uyu gwene ngʼweji gwa katandatu gwa ngʼwenuyo wiitanagwa ngumba;

³⁷ Iki kuli Mulungu guti ho mhayo ugutudulika.

³⁸ Mariamu uhaya giki, Lolaga, ndi nsese nkima wa Seba; ibize kuli nene gitumo mhayo gwako. Huna lulu malaika winga hali wei.

Mariamu ungeniha Elizabeti

³⁹ Mu shiku jenijo Mariamu wihuta kuja ku si ya magulya, ku nzengo gwa Yuda.

⁴⁰ Na wingila mu kaya ya ngʼwa Zakaria, ungisha Elizabeti.

⁴¹ Na yubiza aho Elizabeti wigwa kugisha kwa ngʼwa Mariamu, ngʼwana mu nda yakwe ubina, na Elizabeti wizula na Moyo Ngʼwela;

⁴² Uhamuka na ilaka itale, uhaya giki, Bebe mu bakima uli ngʼwinhiwa wa lubango, na itwajo lya mu nda yako lyinhiwa lubango.

⁴³ Na mhayo uyo gwanizila kinahe, nina wa Seba wane wizaga kuli nene?

⁴⁴ Iki lolaga, ilaka lya kugisha kw ako aho lyushika mu matu gane, ngʼwana wa mu nda yane ubina kulwa buyegi.

⁴⁵ Ali wa lubango uwazunije, iki mihayo iyo uwilwa na Seba ilashikilijiwa.

Kulumba kwa ngʼwa Mariamu

⁴⁶ Na Mariamu uhaya giki, Bupanga wane bulingunguhya Seba,

⁴⁷ Na moyo gwane gwanyegelaga Mulungu Mpija wane.

⁴⁸ Iki wabulolelaga buhabihabi wa nsese wakwe nkima; iki nghana, kufuma lelo ba shibyalilwe shose balabyunihaya ngʼwinhiwa wa lubango.

⁴⁹ Iki Ngʼwenekele budula wanitilile mihayo mitale; na lina lyakwe Uli lyela;

⁵⁰ Na kuchila kigongo kwakwe kuli ku shibyalilwe na shibyalilwe sha benabo abangʼogoha.

⁵¹ Witile nguzu na nkono gwakwe, waababalasanya badoshi mu kwiganika kwa ngholo jabo.

⁵² Waabagwisha batale mu masumbi gabo ga butemi, na waabagunguhya a bahabihabi.

⁵³ Waabigutya bayala na sha wiza, na basabi wabapeja buyiki.

⁵⁴ Waangunija ntumami wakwe Israeli, wizukilwe kuchila kigongo kwakwe.

⁵⁵ Gitumo wali ubalungalungila bakulugenji biswe, Abrahamu na bubyile wakwe, kushisha welelo bose.

⁵⁶ Mariamu ushinga hamo nanghwe giti mieji idatu, huna ushoka ku kaya yakwe.

Yohana Matija ubyalwa

⁵⁷ Ikanza lya kubyala lya ngʼwa Elizabeti aho lyushikila, umyala ngʼwana ngosha.

⁵⁸ Na bazenganwa biye na baduguye aho bigwa giki, Seba wangʼongegije kigongo chakwe, buyegela hamo nanghwe.

⁵⁹ Na yubiza ha lushiku lwa kanane biza kunsala ngʼwana; buhaya kungʼwilika lina lya ngʼwa ise Zakaria.

⁶⁰ Na nina ushosha uhaya giki, Yaya; aliyo akwilikwa Yohana.

⁶¹ Nabo bungʼwila giki, Ati ho wa ludugu lwako uyo ali na lina lyenili.

⁶² Bungemelela ise na makono giki, atogilwe kungʼwilika lina ki.

⁶³ Nanghwe ulomba lubawa lwa kwandikila ho, wandika giki, Lina lyakwe lyene Yohana. Nabo bukumya bose.

⁶⁴ Haho na haho nomo gwakwe gwiguka, na lulimi lwakwe nalo, nanghwe ulungalunga, unkumilija Mulungu.

⁶⁵ Na boba bubadima bose abazengile hihi nabo; na mihayo iyi yose yukumuka mu si yose ya magulya ya Buyudaya.

⁶⁶ Na bose abali biyigwa buyibika mu ngholo jabo, buhaya giki, Ngʼwana uyu, himba alabiza kinahe? Iki nkono gwa Seba gwali guli hamo nanghwe.

⁶⁷ Na ise Zakaria wizula na Moyo Ngʼwela, uhanga uhaya giki,

⁶⁸ Akumilijiwe Seba Mulungu wa Israeli, iki wabagenihaga banhu bakwe, na kubakomola.

⁶⁹ Hangi watubukigije ipembe lya bupiji mu numba ya ntumami wakwe Daudi.

⁷⁰ Gitumo waalungalungaga mu milomo ya bahangi bakwe bela kufuma kwandia, giki,

⁷¹ Tupijiwe kufuma mu banishi biswe, na mu makono gabo bose abatukolwa;

⁷² Kubitila kigongo a bakulugenji biswe, na kwizukwa ilagane lyakwe lyela.

⁷³ Kilahilo chenicho wali unahilila nkulugenji wiswe Abrahamu,

⁷⁴ Kutuzunilija giki, Biswe tuntumamile tuti na boba aba twapilile mu makono ga banishi biswe,

⁷⁵ Mu wela na mu butungilija ku butongi wakwe shiku jose ja bupanga wiswe.

⁷⁶ Na bebe, ngʼwana, ulitanwa nghangi wa Ngʼwenuyo ali higulya no; iki ulatonga ku butongi wa Seba kunongeja nzila jakwe;

⁷⁷ Kubamanikija banhu bakwe bupiji mu kulekejiwa kwa shibi shabo,

⁷⁸ Kulwa wisatwi wa Mulungu wiswe mubo busana wa kufuma higulya watugenihaga biswe,

⁷⁹ Kubakila abigashije mu giiti na mu nengeji gwa lufu; na kutongela mhambala jiswe mu nzila ya mhola.

⁸⁰ Nanghwe ngʼwana ukula, uguzuhiwa mu moyo; wikala mu bu kushisha lushiku lwa kolechiwa kwakwe ku ba Israeli.