Kukundulwa 4 - Ilagano Ipya Lya

Kolechiwa kwisumbi lya Butemi ngʼwigulu

¹ Hanuma ya yeniyi nali nulola, lolaga, nubona luwigi ngʼwigulu lwigulile, na ilaka lya kwandia ilo nali nandia kuligwa, lili giti ilaka lya mhembe, lyulungalunga na nene, lyuhaya giki, Linnaga kunu, na Nene nakukolekeja mihayo iyahaya kubiza ho hanuma ya yeniyo.

² Haho na haho nali nubiza mu kimoyo: lolaga, isumbi lya butemi lyutuulwa ho ngʼwigulu, na hisumbi lyenilo igashije ho ume.

³ Nanghwe Uyo igashije ho ulu wanola ikolile giti iwe lya Yaspi na lya Sardio: na ita-lya-bashi lilipindije isumbi lya butemi, likolile giti iwe lya Zumalidi.

⁴ Hangi masumbi makumi abili na ane ga kitemi, galipindije isumbi lya butemi: ha masumbi genayo nali nubabona banamhala makumi abili na bane bigashije ho bazwalile shizwalo shape; na ngikili ja zahabu ku mitwe yabo:

⁵ Na hisumbi lya butemi jufuma ho ndabi na kupalaluka na malaka. Na matala mpungati ga moto gubyubaka mu butongi wisumbi lyenilo lya butemi, ha gene Mioyo mpungati ya Mulungu.

⁶ Na mu butongi wisumbi lyenilo lya butemi, yali ili ho giti nyanza ya ilole, iyikolile giti bilauri; na hagati ya isumbi lya butemi na hapindiligije shali shili ho shibumva shipanga shine shokalile miso ku butongi na kunuma.

⁷ I kibumva kipanga cha kwandia chikolile giti shimba, na kibumva kipanga cha kabili chiikolile giti ndama, na kibumva kipanga cha kadatu chali na bushu giti wa munhu, na kibumva kipanga cha kane chiikolile giti mbeshi ililala.

⁸ I shibumva shipanga shenisho shine, buli kimo chali na manana atandatu, hangi shokalile miso mapande gose na mugati: nasho shiti na kwifula limi na bujiku kuhaya giki: Ngʼwela, Ngʼwela, Ngʼwela, Seba Mulungu wa budula bose, Uyu uwalali ho, na Uyu ali ho, na Uyo alabiza ho.

Mulungu ulamiwa na ukumilijiwa

⁹ Hangi shibumva shipanga shenisho aho shungʼwinha ikujo na kunkumilija na kunumba Ngʼwenuyo wigashije ho hisumbi lya butemi, Uyo ali mpanga welelo na welelo,

¹⁰ Hunaho lulu banamhala benabo makumi abili na bane bugwa ku butongi wa Ngʼwenuyo wigashije ho hisumbi lya butemi, bunamya Uyo akikalaga mpanga welelo na welelo, buponeja ngikili jabo ku butongi wisumbi lya butemi, buhaya giki,

¹¹ Ee Seba Mulungu wiswe, Bebe wigelelilwe kwinhiwa ikujo na kukumilija na budula: iki Bebe waashisema shinhu shose, nasho shubiza ho, hangi shusengʼwa kulwa butogwa wako.