Kukundulwa 3 - Ilagano Ipya Lya

(5) Ya ku kanisa ya Sardi

¹ U malaika wa kanisa ya mu Sardi, ngʼwandikilage giki, Uyo ali nayo Mioyo mpungati ya Mulungu, na sonda jenijo mpungati, wahaya giki, namanile shitile shako giki, uli na lina giki, uli mpanga, aliyo uchile.

² Mishaga, uyilambye mihayo iyo yasaga ho, iyi ilenda kucha: iki natabonaga shitwa shako giki, shishikile mu butongi wa Mulungu wane.

³ Ali lulu, izukagwa gitumo wali wanukula na wigwa, iyumiilage yeniyo, oye. Ali, ulu utumisha na wikala miso, nakwiza kuli bebe giti ngʼwibi, nangho utalalimana ikanza ilo ndizila kuli bebe.

⁴ Aliyo uli nago mina magehu mu Sardi, abatasosohagije shizwalo shabo; nabo balashiminzila hamo na Nene bazwalile shizwalo shape, iki bene bigelelilwe.

⁵ Uyo uwapyena alazwalichiwa shizwalo shape; na Nene natalalijimya lina lyakwe mu kitabo cha bupanga; aliyo nakulitambula lina lyakwe mu butongi wa ngʼwa Baba, na mu butongi wa bamalaika bakwe.

⁶ Uyo ali na kutu igwe mihayo iyi Moyo akujiwilaga kanisa.

(6) Ya ku kanisa ya Filadelfia

⁷ U malaika wa kanisa ya mu Filadelfia, ngʼwandikilage giki, Uyo ali ngʼwela na wa nghana, Uyo ali na lufungulo lwa ngʼwa Daudi, uwalugula nulu kuduhu wa kulugala ho, uwalugala nulu kuduhu wa kulugula ho, Ngʼwenuyo wahaya giki,

⁸ Namanile shitwa shako, lolaga, natuulaga nyango guli ngʼwaje mu butongi wako, nulu kuduhu wa kugulugala; iki bebe uli najo nguzu ndo, aliyo waagudima mhayo gwane, nulu wali utulilema lina lyane.

⁹ Lolaga, nakwita giki, benabo abali ba ibilingilo lya ngʼwa Shetani, abihaya giki, bali Bayudaya, aliyo bati bene, aliyo balihaya bulomolomo; lolaga, ndabenha bize kulamya mu butongi wa mhambala Jako, nabo balamana giki, Nene nakutogilwe.

¹⁰ Iki waagudima mhayo gwane gwa wiyumilija, nu Nene nane nakukubalada upile ngʼwikanza lya kugengʼwa, ilyuhaya kwiza ku si jose, kubagema abikala mu si;

¹¹ Nizile wangu: iyumiilage iyo uli nayo, munhu ose atizukutagija ngikili yako ya nyatemi

¹² Uyo uwapyena ndangʼwita kubiza ikingi lya mu Hekalu ya Mulungu wane, nanghwe atalinga mo hangi; na Nene ndangʼwandika lina lya Mulungu wane, na lina lya ikulu lya Mulungu wane, lyene Yerusalemi mhya, iyo iliika kufuma ngʼwigulu kuli Mulungu wane, na lina lyane ipya.

¹³ Uyo ali na kutu igwe mihayo iyi Moyo akujiwilaga kanisa.

(7) Ya ku kanisa ya Laodikia

¹⁴ U malaika wa kanisa ya mu Laodikia, ngʼwandikilage giki, U Amina, u nkaniji ngʼwishigwa na wa nghana, Uyo ali wa kwandia kwa shisengʼwa sha Mulungu, wahaya giki,

¹⁵ Namanile shitwa shako giki, uti nyilizu nulu uti nsebu; hambuhambu ulu ni wabiza nyilizu nulu nsebu.

¹⁶ Aliyo, iki wabiza uli nunguzu duhu, uti nyilizu nulu uti nsebu, nakukuswa mu nomo gwane.

¹⁷ Iki ulihaya giki, Nene ndi nsabi, nikwigigije sabo ningi, natugayiwa kinhu yaya; aliyo utamanile giki, uli nsunduhazu, na mpinihalilwa, na ngayiwa, na moku, na hangi uli duuhu:

¹⁸ Nene nakwinha masala giki, Gulaga kuli Nene zahabu iyejiwa mu moto, hunaho ubize nsabi; na shizwalo shape ushizwale, minala ya duuhu yako itizilonga; ugule na bugota wa kwibila ku miso gako, hunaho ubone.

¹⁹ Abo bose nabatogilwe, bene nakabahugulaga na nakabatulaga: ali lulu, kalalagwa, oye.

²⁰ Lolaga, nimilaga ha nyango ndikomagula: munhu ose ulu wigwa ilaka lyane na wigula luwigi, nakwingila kuli wei, nakulya hamo nanghwe, nanghwe hamo na nene.

²¹ Uyo uwapyena, ngʼwene ndanzunilija kwigasha kihamo na Nene hisumbi lyane lya butemi, gitumo na Nene nupyena nigasha kihamo na Baba hisumbi lyakwe lya butemi.

²² Uyo ali na kutu igwe mihayo iyi Moyo akujiwilaga kanisa.