Kukundulwa 22 - Ilagano Ipya Lya

Ngunda mpya gwa Mulungu

¹ Huna lulu unolekeja mongo gwa minzi ga bupanga, malabangizu giti bilauli, gufumile ngʼwisumbi lya butemi lya Mulungu na Ngʼwana wa ngholo,

² Hagati ya ipalapala lyalyo, na ipande na ipande lya mongo gwenuyo guli ho uti gwa bupanga, ugukatwajaga matwajo mbika ikumi na ibili, gukutwajaga matwajo gago buli ngʼweji; na madutu ga nti gwenuyo gene ga kugapija mahanga.

³ Nulu litalabiza mo hangi izumo lyose; isumbi lya butemi lya Mulungu na lya Ngʼwana wa ngholo lilabiza mo: na batumami bakwe balantumamiia;

⁴ Nabo balamona ihanga lya bushu wakwe; na lina lyakwe lilabiza ha bushu wabo.

⁵ Nulu bujiku butalabiza ko hangi, nulu bataligonga tala nulu isana lya limi; iki Seba Mulungu alabamulikila isana: nabo balatema welelo na welelo.

⁶ Na akaniwila giki, Mihayo yene ya wishigwa na ya nghana; Seba Mulungu wa mioyo ya bahangi wantumaga malaika wakwe kubolekeja batumami bakwe mihayo iyahaya kubiza ho wangu.

⁷ Lolaga, nizile wangu. Ali wa lujango uwayidima mihayo ya buhangi wa kitabo iki.

Bumaligijo

⁸ Hu na nene Yohana uyo nuyibona nigwa yeniyi yose. Aho nuyigwa na nuyibona, nugwa kunamya ku butongi wa mhambala ja malaika ngʼwenuyo uwanolekeja mihayo yeniyi.

⁹ Nanghwe uniwila giki, Yaya, utizita giko: nene ndi nsese ngʼwiyo, na ngʼwichabo wa badugu bako a bahangi, na wa benabo abayidima mihayo ya kitabo iki: namyage Mulungu.

¹⁰ Uniwila giki, Utizutuula itungijo ku mihayo ya buhangi wa kitabo iki; iki ikanza lili hihi.

¹¹ Uyo ati ntungilija, ikale ati ntungilija: na uyo ali nsoso, ikale ali nsoso: na uyo ali ntungilija, ikale ali ntungilija: na uyo ali ngʼwela, ikale ali ngʼwela.

¹² Lolaga, nizile wangu; hangi ndi najo mhela, kumpela buli munhu gitumo milimo yakwe umo ili.

¹³ Nene ndi Alfa na Omega, wa kwandia na wa kumalija, ndi wandijo na nghalikijo.

¹⁴ Bali ba lubango abashifulile shizwalo shabo, bazunilijiwe kushika ku nti gwa bupanga, na kwingila mu mibita ya kwingila mu linzengo.

¹⁵ Aliyo hanze jili ho mva, na balogi, na bajingi, na babulagi, na abo abalamya shikolile, na buli munhu uyo atogilwe bulomolomo na kuwita.

¹⁶ Nene Yesu nantumaga malaika wane kumukanila mihayo yeniyi mu kanisa. Nene ndi itina na bubyile wa ngʼwa Daudi, ndi sonda i ya nyakabusinze, iyungʼwekangʼweka mu makingo.

¹⁷ U Moyo na Ntolwa buhaya giki, Nzugu. Nanghwe uyo akwigwaga ahaye giki, Nzugu. Nanghwe uyo ali na nota ize, na uyo ose atogilwe, atwale dalali minzi ga bupanga.

¹⁸ Nene namanikija buli munhu ose uyo akwigwaga mihayo ya buhangi wa kitabo iki, giki, Munhu ose uyo alongejaga ko ku mihayo iyi, Mulungu nanghwe alangʼongegeja sha kuluhaluhiwa ishandikilwe mu kitabo iki;

¹⁹ Na munhu ose uyo alinja ho ku mihayo ya mu kitabo cha buhangi wenubu, Mulungu nanghwe alangʼwingija ngabo gwakwe gwa ku nti gwa bupanga, na gwa linzengo lyela, na gwa yose iyandikilwe mu kitabo iki.

²⁰ Uyo ukanila mihayo iyi, wahaya giki, Ali chene nizile wangu. Amina: Ali chene, Seba Yesu, nzugu.

²¹ Kigongo cha Seba wiswe Yesu Kristo kibize hamo na bingʼwe hose. Amina.