Kukundulwa 21 - Ilagano Ipya Lya

Shinku shipya mpungati Igulu ipya; Si mhya

¹ Hangi nubona igulu ipya na si mhya: iki igulu lya kwandia na si ya kwandia shali shabita, nyanza nayo yali iti ko hangi.

² Nubona linzengo lyela, Yerusalemi mhya, lyika kufuma ngʼwigulu kuli Mulungu, lyubejabejiwa giti ntolwa wagalililwa ngoshi wakwe.

Banhu bapya

³ Hangi nigwa ilaka itale kufuma ngʼwigulu lyuhaya giki, Lolaga, hekalu ya ihema ya Mulungu ili hagati ya banhu, nanghwe akwikala hamo nabo, nabo balabiza banhu bakwe, na Mulungu ngʼwenekele alabiza hamo nabo, Mulungu wabo;

⁴ Nanghwe alashipyagula shisoji shose mu miso gabo; nulu kucha kutalabiza ho hangi; nulu bupina, nulu kulila nghungu, nulu butalabiza ho hangi busatu: iki mihayo ya kwandia yaabita.

⁵ Nanghwe uwigashije ha isumbi lya butemi uhaya giki, Lolaga, nayibeja yose kubiza mipya. Hangi uhaya giki, Andikaga; iki mihayo iyi yene ya nghana na ya wishigwa.

⁶ Hangi uni wila giki, yashikilijiwagwa lulu. Nene ndi Alfa na Omega, ndi wandijo na nghalikijo. Uwakolwa nota Nene nakungʼwinha kungʼwa dalali ku lwinzi lwa minzi ga bupanga.

⁷ Uwapyena alingila mu wingiji wa mihayo yeniyi; na Nene nakubiza Mulungu wakwe, nanghwe akubiza ngʼwana wane.

⁸ Aliyo abo abogohile, nabo abatazunije, na basoso, na babulagi, na bajingi, na balogi, na abalamya shikolile na balomolomo bose, bene balabiza na ngabo gwabo mu nyanza iyibakile moto na bugota wa kibiliti; uku kwene kucha kwa kabili.

Nke wa Ngʼwana wa ngholo; Yerusalemi mhya

⁹ Huna akiza umo wa bamalaika benabo mpungati, abali balina nzweso jenijo mpungati ijokalile na sha kuluhyaluhya mpungati sha kumalija, ulungalunga na nene uhaya giki, Nzugu kunu nakolekeje ntolwa, u nke wa Ngʼwana wa ngholo.

¹⁰ Huna unitwala, ndi mu ki-moyo, ku lugulu lutale na lulihu, unolekeja linzengo lyela, i Yerusalemi, lyika kufuma ngʼwigulu kuli Mulungu,

¹¹ Lilina ikujo lya Mulungu; kungʼwekangʼweka kwalyo kwikolile iwe lya mpango ngʼwingi no, giti iwe lya yaspi ilyungʼwekangʼweka giti bilauli:

¹² Kangi lili na ndugu nhale na ndihu; ili na mibita ikumi na ibili, na ku mibita yeniyo bamalaika ikumi na babili; mina nago gandikilwe ho, a gene mina ga ngʼanda ikumi na ibili ja bana ba Israeli;

¹³ Kwipande lya kiya mibita idatu; kwipande lya ibano mibita idatu; kwipande lya dakama mibita idatu; na kwipande lya ngʼweli mibita idatu.

¹⁴ Hangi na ndugu ya linzengo ili na misingi ikumi na ibili, hangi mu misingi yeniyo gandikilwe mo mina ikumi na abili ga batungʼwa ikumi na babili ba Ngʼwana wa ngholo.

¹⁵ Nanghwe uwali ulungalunga na nene walali na ibingo lya zahabu alipimile i linzengo na mibita yalyo, na ndugu yalyo.

¹⁶ I linzengo lyenilo a mapande galyo ane galenganilile, bulihu walyo na bugali walyo bulenganilile; nanghwe ulipima i linzengo na ibingo lyenilo, mailo 1,500: bulihu walyo na bugali na bugunguhu bulenganilile.

¹⁷ Upima hangi ndugu yalyo mikono igana limo na makumi ane na ine, kapimilwe ka munhu umo kali, kene ka malaika.

¹⁸ Na kazengele ka ndugu yeniyo kali ka mawe ga yaspi: i linzengo nalyo lili lya zahabu ya wiza, iyikolile giti bilauli nela no.

¹⁹ I misingi ya ndugu ja linzengo igalililwe na mawe ga buli mbika ga mpango ngʼwingi. Musingi gwa kwandia guli yaspi; gwa kabili safiro;

²⁰ Gwa kadatu kalkedoni; gwa kane sumaradi; gwa katano sardonuksi; gwa katandatu sardio; gwa mpungati kerisoletio; gwa kanane berilo; gwa kenda topazio; gwa ikumi krisopraso; gwa ikumi na gumo gwa yakintho; gwa ikumi na ibili ametisto.

²¹ I mibita ikumi na ibili ili lulu ikumi na ibili; buli mita guli gwa lulu imo; na ipalapala lya linzengo lili lya zahabu ya wiza, giti ilole lyape no.

Hekalu mhya

²² Na nene natabonile hekalu mugati yalyo: iki Seba Mulungu wa budula bose na Ngʼwana wa ngholo, bene hekalu yalyo.

Isana ipya

²³ I linzengo lyenilo litigongaga limi, nulu ngʼweji, kulyakila; iki ikujo lya Mulungu likalyakilaga, na Ngʼwana wa ngholo ngʼwene tala yalyo.

²⁴ A ba mahanga abakomolilwe balashiminzila ngʼwisana lyalyo: na batemi ba si balyenhela mo ikujo lyabo.

²⁵ Na mibita yalyo italalugalwa limi na hado; iki bujiku buti ko kwenuko;

²⁶ Nabo balalyenhela mo magaka na ikujo ga mahanga:

²⁷ Nulu kitalingila mo na hado kinhu chose chose cha busoso, nulu uyo ose akwitaga cha malofu nulu bulomolomo: aliyo benabo bike baandikwa mina gabo mu kitabo cha bupanga cha Ngʼwana wa ngholo.