Kukundulwa 2 - Ilagano Ipya Lya

Nyaluba ja ku kanisa mpungati (1) Ya ku kanisa ya Efeso

¹ U malaika wa kanisa ya mu Efeso, ngʼwandikilage giki, Uyo ajidimile sonda mpungati mu nkono gwakwe gwa bulyo, Uyo akushiminzaga hagati ya tala jenijo mpungati ja zahabu, wahaya giki,

² Nene namanile Shitwa shako, na kukoyakoya kwako, na kwiyumilija kwako; hangi giki, utudula kubagoyela banhu ba bubi, hangi ukabagema abali bihaya giki, bali batungʼwa, aliyo bati bene, hangi wali ubamana giki, bali bamama;

³ Hangi wiyumiligije na wagoyelile no ku nguno ya lina lyane, aliyo walutanogile.

⁴ Aliyo ndi nago mhayo kuli bebe, giki, waaleka butogwa wako wa kwandia.

⁵ Ali lulu, izukagwa kufuma uko wagwilile, oye, ushoke ushite hangi shitile sha kwandia; aliyo ulu utita giko, nakwiza kuli bebe wangu, nakuyinja tala yako mu wikalo wayo, ulu utoya.

⁶ Aliyo uli nago mhayo uyu giki, ukushikolagwa shitile sha Banikolaiti, shenisho nu Nene nashikolilwe.

⁷ Uyo ali na kutu igwe mihayo iyi Moyo akujiwilaga kanisa. Uwapyena nalanzunilija kulya ko ku nti gwa bupanga uguli hagati ya ngunda gwa Mulungu.

(2) Ya ku kanisa ya Smurna

⁸ U malaika wa kanisa ya mu Smurna, ngʼwandikilage giki, Uyo ali wa kwandia na wa nghalikijo, Uyo wali ucha hangi ubiza mpanga, Ngʼwenuyo wahaya giki,

⁹ Nene namanile shitile shako, na kunyajanyajiwa kwako, na buhabi wako, (aliyo uli nabo busabi); hangi namanile nu buduki wabo abihaya bali Bayudaya, aliyo bati bene, aliyo bali ibilingilo lya ngʼwa Shetani.

¹⁰ Utizogoha kulwa kunyajanyajiwa ukuhaya kukwilongela: lolaga, muji ngʼwenuyu alihaya kubaponya bamo ba mu bingʼwe mu jela, giki, mugengʼwe; ningʼwe mulabona kunyajanyajiwa shiku ikumi. Komelaga ubize ngʼwishigwa kushisha kucha, na nene nalakwinha ngikili ya bupanga.

¹¹ Uyo ali na kutu igwe mihayo iyi Moyo akujiwilaga kanisa. Uwapyena atalagulajiwa na kucha kwa kabili.

(3) Ya ku kanisa ya Pergamo

¹² U malaika wa kanisa ya mu Pergamo, ngʼwandikilage giki, Uyo ali na lilushu lya bugi bubili wahaya giki,

¹³ Namanile uko ukikalaga, hu kwene isumbi lya butemi lya ngʼwa Shetani lili: hangi ukumiilaga lina lyane, na utakulemile kuzunya kwane, nulu mu shiku ja ngʼwa Antipa, nkaniji wane ngʼwishigwa, uyo wali ubulagwa mu bingʼwe, uko akikalaga Shetani.

¹⁴ Aliyo ndi nayo mihayo yimo kuli bebe, iki uli nabo uko banhu bamo abadimile kulanga kwa ngʼwa Balaamu, uyo wali unanga Balaka kutuula ho ishiki lya kwigumha mu butongi wa bana ba Israeli, giiti, bashilye shinhu ishufunyiwa shitambo ku shikolile, na kwita bujingi.

¹⁵ Giko hangi uli nabo banhu abadimile bulangi wa Banikolaiti, ubo nabukolilwe.

¹⁶ Oyaga; aliyo ulu utoya nakwiza kuli bebe wangu, nilwishe nabo bulugu na lilushu lya mu nomo gwane.

¹⁷ Uyo ali na kutu igwe mihayo iyi Moyo akujiwilaga kanisa. Uwapyena nalangʼwinha kulya ku emanu iyibisile, hangi nalangʼwinha iwe lyape, na ha iwe ilo lina ipya lyandikwa ho, ilo atalimanile munhu ose ulu ati uyo winhiwa.

(4) Ya ku kanisa ya Thuatira

¹⁸ U malaika wa kanisa ya mu Thuatira, ngʼwandikilage giki, Ngʼwana wa Mulungu, Uyo ali na miso giti lulali lwa moto, na magulu gakwe gikolile giti chuma chape kigusile, wahaya giki,

¹⁹ Namanile shitile shako, na butogwa wako, na kuzunya kwako, na kwinhilija kwako, na kwiyumilija kwako; hangi shitile shako sha hanuma shene shingi kutinda i sha kwandia.

²⁰ Aliyo ndi na mhayo kuli bebe, giki, u nkima ngʼwenuyo Yezebeli, uyo wihaya giki, ali nghangi, ukunzunilijaga kubalanga na kubahubya basese bane bite bujingi, na kulya shinhu ishufunyiwa shitambo ku shikolile.

²¹ Na Nene nali nungʼwinha ngʼwanya gwa koya bujingi wakwe; nanghwe atuhayaga koya.

²² Lolaga, nakungwisha ha bulili, nabo abakushihaja nanghwe nakubagwisha mu kuluhaluhiwa kutale, ulu batoya shitile shabo.

²³ Hangi na bana bakwe nakubabulaga na lufu; hunaho kanisa jose jilamana giki, Nene ndi Ngʼwenuyo akugisilijaga mhigo na ngholo ja banhu; na Nene nalampeela buli munhu mu bingʼwe gitumo Shitwa shakwe umo shili.

²⁴ Ali bingʼwe abali mu Thuatira, abatadimile kulangwa uku, abo abatamanile mishimu ya ngʼwa Shetani, gitumo bakuhayilaga; namuwila bingʼwe giki, Nene natungʼwidwicha nigo gungi hangi.

²⁵ Aliyo iyo muli nayo iyumiilagi kushisha naliza.

²⁶ Uyo uwapyena na ushita Shitwa shane kushisha ku mhelo, ngʼwenuyo ndangʼwinha budula kugasuga mahanga:

²⁷ Nanghwe alabasuga na nanga gwa chuma, gitumo nungu ja mumbi jutobagulwa; gitumo na Nene ninhiwagwa na Baba.

²⁸ Na Nene ndangʼwinha sonda ya dilu.

²⁹ Uyo ali na kutu igwe mihayo iyi Moyo akujiwilaga kanisa.