Kukundulwa 18 - Ilagano Ipya Lya

Nsango gwa ku Babeli

¹ Hanuma yeniyi numona malaika ungi wika kufuma ngʼwigulu, ali na budula kutale no; na si yakilwa pe kulwa ikujo lyakwe.

² Nanghwe uhamuka no na ilaka lya nguzu, uhaya giki, Lyagwaga, lyagwaga i Libabeli itale, lyabizaga wikalo wa masamva, na ipilinga lya buli moyo nsoso, na luzumba lwa huli noni nghaali na ya malofu.

³ Iki mahanga gose gaangʼwaga kangala ya bupelanu wa bujingi wakwe; na batemi ba si bijingila nanghwe, na bakwabi ba si busabila kulwa wingi wa shimile shakwe sha nyadoshi.

⁴ Nigwa ilaka lingi kufuma ngʼwigulu, lyuhaya giki, Ingagi kuli wei bingʼwe banhu bane, mutizisangija mu shibi shakwe, muleke kukubilwa na sha kuluhaluhiwa shakwe:

⁵ Iki shibi shakwe shashikaga kushisha ngʼwigulu, na Mulungu wizukagwa buhunga wakwe.

⁶ Malagi shili kuli wei gitumo wali ungʼwitila bingʼwe, ngʼwinhagi nghangala ibili kulenganila na Shitwa shakwe: mu kikombe icho waamusamigijaga mo, ningʼwe munsamigije mo nghangala ibili.

⁷ Gitumo wali wikumilija, na wita ya nyadoshi, mungʼwinhe hangi giko kuluhaluhiwa na bupina: iki akuhayaga mu ngholo yakwe giki, Nene nigashije ndi ntemi nkima, nati nchilwa yaya, hangi natalabona bupina nulu na hado.

⁸ Kulwa iyo shilashikila sha kuluhaluhiwa shakwe lushiku lumo duhu, kuchilwa na bupina na nzala; nanghwe alapemva na moto; iki Seba Mulungu Uyo unekanya ali wa nguzu.

Batemi na bakwabi bunila Babeli

⁹ Na batemi ba si abali bijingila nanghwe na bikala nyadoshi hamo nanghwe, balampinihalilwa, bunila nghungu, aho balabona lyochi lya kupya kwakwe,

¹⁰ Bimilile kule kulwa boba wa kuluhaluhiwa kwakwe, balihaya giki, Wasangwa, wasangwa, bebe linzengo itale, Babeli, linzengo itale na lya nguzu! iki nsango gwako gwashikaga mu saa imo.

¹¹ Bakwabi ba si nabo balalila, na kumpinihalilwa, iki kuduhu munhu wa kugula alia buguji wabo hangi:

¹² Buguji wa zahabu, na feza, na mawe ga mpango, na lulu, na bafta ya kitani, na mienda ya malaluku, na ya halili, na yaza, na miti yose ya ngazu, na shiseme shose sha mapembe ga mbuli, na shiseme shose sha manti ga mpango ngʼwingi, na sha chuma chaza, na sha kisinza, na sha iwe idimu,

¹³ Na dalasini, na ngazu, na maguta ga kwibila, na bubani, na minzi ga mizabibu, na maguta, na busu wa wiza, na ngano, na ngʼombe, na ngholo, na falasa, na magali, na basese, na bupanga wa banhu.

¹⁴ Hangi na matwajo ayo wali ugigongela mu moyo gwako nago gakwingaga; na shinhu shose shinonu na sha wiza shakwingaga, utalashibona hangi yaya.

¹⁵ Na bakwabi ba shinhu shenishi, abali busabiwa nanghwe, balimila kule kulwa lyogohya lya kuluhaluhiwa kwakwe, kulila shisoji na kupinihala;

¹⁶ Balihaya giki, Wasangwa, wasangwa, bebe linzengo itale, ilyali lyuzwikwa na bafta ya kitani, na mienda ya malaluku na yaza; hangi lyali lyubelejiwa na zahabu na tuwe twa mpango na lulu!

¹⁷ Iki mu saa imo duhu busabi ubu wingi bujimiji wa pye. Na buli ngobi wa meli, na bose abakashiminzilaga mu meli, na batumami bose ba mu meli, na bose abakatumamaga mu nyanza, benabo bose bimila kule,

¹⁸ Bulila no aho bulilolela lyochi lya kupya kwakwe, buhaya giki, Linzengo lili he ililenganilile na linzengo itale ili?

¹⁹ Butuula lububu ha mitwe yabo, buhayila higulya, bulila shisoji na kupinihala, buhaya giki, Wasangwa, wasangwa, bebe linzengo itale, ilyali lyabasabya bose abali na mameli mu nyanza kulwa sabo jakwe ningi! iki mu saa imo lyubiza nsaka. Babeli yucha

²⁰ Liyegelage, bebe igulu; na bingʼwe bela, na batungʼwa, na bahangi; iki Mulungu wanekanyaga nsango gwa kulekanya kwingʼwe kuli wei.

²¹ Hunaho malaika wa nguzu akabucha iwe itale giti iwe lya kushela, uliponeja mu nyanza, uhaya giki, Giko Babeli, i linzengo itale, lilagwishiwa na kugwa kutale, nulu litalilonga hangi na hado.

²² Nulu ilaka lya batuji ba shita, nulu bimbi, nulu bafuji ba filimbi na bafuji ba mhembe, gataligwiwa hangi muli bebe nulu na hado. Nulu koli wa nimo gose atalilonga hangi muli bebe; nulu kidinhimo cha sho kitaligwiwa hangi muli bebe;

²³ Nulu isana lya tala litalaka hangi muli bebe, nulu ilaka lya ntoji na lya ntolwa litaligwiwa hangi muli bebe, iki bakwabi bako bali bali batale ba si; iki mahanga gose gali gulembalemva na bulogi wako.

²⁴ Na mugati yakwe gali gilonga mo mininga ga bahangi, na ga bela, na ga bose abali bubulagwa mu si.