Kukundulwa 14 - Ilagano Ipya Lya

Abakomolwa 144,000

¹ Huna nulola, numona Ngʼwana wa ngholo imilile ku lugulu lwa Sayuni, kihamo na banhu 144,000, abali na lina lyakwe na lina lya ngʼwa Ise lyandikililwe ha bushu wabo.

² Nane nigwa ilaka kufuma ngʼwigulu, giti kulunduma kwa minzi mingi, na giti kulunduma kwa kuluma kutale kwa mbula: hangi ilaka ilo nigwa lyali giti kulila kwa shita ulu batuji butula shita shabo:

³ Nabo bimba lyimbo lyubiza giti ipya mu butongi wisumbi lya butemi, na mu butongi wa shibumva shipanga shine na wa banamhala benabo; walati ho munhu uwadula kwilanga lyimbo lyenilo aliyo benabo bike 144,000, abugulwa kufuma mu si.

⁴ Abo ha bene abatusosohajiwa na bakima, iki bali bibembu. Abo ha bene abunondela Ngʼwana wa ngholo hose hose uko ajile. Bene bugulwa kufuma mu banhu babize matwajo ga kwandia kuli Mulungu na kuli Ngʼwana wa ngholo.

⁵ Na mu milomo yabo butilongile bulomolomo; boi bati na kilingo mu butongi wisumbi lya butemi lya Mulungu.

Evangeli ya butushila

⁶ Numona malaika ungi akulalaga hagati na hagati ya ngʼwigulu, ali na evangeli ya butushila kubalomela abikala mu si, ku buli ihanga lyose, na luganda, na lulimi, na ludugu;

⁷ Nanghwe uhaya higulya na ilaka itale giki, Ngʼogohagi Mulungu, mungʼwinhe ikujo; iki ikanza lya kulekanya kwakwe kwa nsango lyashikaga: namyagi Ngʼwenuyo waashibeja igulu na si, na nyanza na nzwilo ja minzi.

Kugwa kwa Babeli

⁸ Malaika ungi wa kabili unondela, uhaya giki, Lyagwaga, lyagwaga i Libabeli itale ilyali lyubyugangʼwisha mahanga gose kangala ya budaki wa bujingi walyo.

Nsango gwabo abalamya kinwele

⁹ Malaika ungi wa kadatu ubalondela, uhaya na ilaka itale giki, Munhu ose ulu ukilamya kinwele na chikolile chacho, na uzunya kumenghwa lumengho lwacho mu bushu wakwe, nulu ha nkono gwakwe,

¹⁰ Ngʼwenuyo alangʼwa kangala ya budaki wa Mulungu, iyo yasamijiwa, itasanjiwe na minzi mu kikombe cha bupelanu wakwe; hangi alaluhaluhiwa mu moto na bugota wa kibiliti, mu butongi wa bamalaika bela, na mu butongi wa Ngʼwana wa ngholo:

¹¹ Na lyochi lya kuluhaluhiwa kwabo likwinungaga kushisha welelo na welelo: nabo bati na kwifula limi na bujiku, abalamya kinwele na chikolile chacho, kihamo na benabo abazunya kumenghwa lumengho lwa lina lyacho.

¹² Henaha hagongile kwiyumilija kwa bela, abakushidimaga shilagilo sha Mulungu, na kuzunya kwa ngʼwa Yesu.

Lubango lwa bafu bela

¹³ Hangi nigwa ilaka lyufuma ngʼwigulu lyuhaya giki, Andikaga, Bali ba lubango a bafu abacliila muli Seba kufuma haha; Ali chene, wahaya Moyo, leke bifule mu milimo yabo ya makoye; iki shitile shabo shubalondela.

Si yageswa

¹⁴ Nubona, hangi lolaga, ilunde lyape; na ha ilunde lyenilo numona igashije ho umo uwikolile na Ngʼwana wa munhu, azwalile ngikili ya zahabu ku ntwe gwakwe, na mu nkono gwakwe ali na lushu lugi.

¹⁵ Na malaika ungi ufuma mu hekalu, unilila na ilaka itale Uyo igashije ha ilunde, uhaya giki, Temaga lulu na lushu lwako, ugese: iki ikanza lya kugesela lyashikaga, iki magesa ga mu si gumile.

¹⁶ Hunaho Uyo igashije ha ilunde uluponeja lushu lwakwe ku si, i si yugeswa lulu.

¹⁷ Hunaho malaika ungi ufuma mu hekalu iyili ngʼwigulu, nanghwe ali na lushu lugi.

¹⁸ Na malaika ungi ufuma mu nghalilo, ngʼwene ali na budula ku moto; nanghwe unilila na ilaka itale uyo ali na lushu lugi, uhaya giki, Temaga lulu na lushu lwako lugi, ugese mikungo ya nzabibu gwa mu si; iki mizabibu yayo yahile nghana.

¹⁹ Huna lulu malaika uluponeja lushu lwakwe ku si, ugesa nzabibu gwa si, uguponya ngʼwikamilo itale lya bupelanu wa Mulungu.

²⁰ Na ikamilo lya nzabibu lyupandagilwa hanze ya linzengo, na mininga gali gufuma ngʼwikamilo, kushisha ku hatamu ja falasa, gusela gashika kule giti mailo magana abili.