Kukundulwa 13 - Ilagano Ipya Lya

Kinwele ichufuma mu nyanza

¹ Huna nali nimila ku maseni ga ku nyanza. Nubona kinwele kilifuma mu nyanza, kili na mapembe ikumi na mitwe mpungati, na ha mapembe gacho kili na ngikili ikumi, na ku mitwe yacho a mina ga buduki.

² Na kinwele icho nukibona kibangile giti subi, na magulu gacho gali giti ga nduba, na nomo gwacho giti nomo gwa shimba: na isota lyuchinha nguzu jalyo, na isumbi lyalyo lya butemi, na budula butale no.

³ Ntwe gwacho gumo nugubona giti gugulajiwa nhondo ya kucha: aliyo nhondo yacho ya kukibulaga yupila: na si yose bakikalalilile budedebala kulwa kinwele chenicho:

⁴ Nabo bulilamya i lisota, ilo lyuchinha kinwele budula, na bukilamya ni kinwele, buhaya giki, uyo abangile giti kinwele cheniki ngʼwene nani? nulu nani uyo wadula kwita bulugu nacho?

⁵ Hangi chinhiwa nomo gwa kuhaya mihayo mitale, na buduki; na chinhiwa budula kwita giko mieji makumi ane na ibili.

⁶ Nacho chasamya nomo gwacho kundukila Mulungu, na kulidukila lina lyakwe, na ihema lyakwe, na kubadukila benabo abikala ngʼwigulu.

⁷ Hangi chinhiwa kwita bulugu na bela, na kubapyena: nacho chinhiwa budula ku ngʼanda, na ku ndimi jose, na ku mahanga gose.

⁸ Nabo bose abikala mu si balakilamya, abo mina gabo gatandikilwe mu kitabo cha bupanga cha Ngʼwana wa ngholo uwali wabulagwa kufuma kubumva kwa si.

⁹ Uyo ali na kutu, igwe.

¹⁰ Uyo udima ndingʼwa, nanghwe alatwalwa ndingʼwa: uyo ulu ubulaga na lilushu, nanghwe chene alabulagwa na lilushu. Huna kwene kwiyumilija na kuzunya kwa bela.

Kinwele ichufuma mu si

¹¹ Huna nubona kinwele kingi kilifuma mu si; chali na mapembe abili giti mapembe ga ngʼwana wa ngholo, aliyo chulungalunga giti isota.

¹² Nacho chubutumamila budula bose wa kinwele cha kwandia mu butongi wacho. Chuyita si yose, nabo abikala mo, bakilamye kinwele cha kwandia, ichupila nhondo yacho ya kucha.

¹³ Nacho kikwitaga mabulolelo matale, kikugwichaga moto ku si kufuma ngʼwigulu mu miso ga banhu.

¹⁴ Kikubalembalembaga bose abikala mu si na mabulolelo genayo kili na nguzu kwita mu miso ga kinwele chenicho; chubalagila abikala mu si giki, bakibegeje chikolile cha kulamya kinwele ichali chutengʼwa nhondo na lilushu hangi chikala kipanga.

¹⁵ Huna chinhiwa budula kukituulila chikolile cha kinwele miuyi, chikolile cha kinwele kilungalunge; hangi babulagwe bose abulema kukilamya chikolile cha kinwele.

¹⁶ Nacho chubita banhu bose, bado na batale, na basabi na bahabi, na bana ba banhu na basese, giki, bose bamenghwe lumengho ku nkono gwabo gwa bulyo, nulu ku bushu wabo;

¹⁷ Hangi giki, munhu ose atuzunilijiwa kugula nulu kuguja, ulu ati nalo u lumengho, lwene lina lya kinwele nulu bukumi wa lina lyacho.

¹⁸ Henaha hagongile masala. Uyo ali na witegeleja abale bukumi wa kinwele; iki bukumi wacho wene bukumi wa kimunhu; hangi bukumi wacho wene magana atandatu na makumi atandatu na itandatu.