Kukundulwa 12 - Ilagano Ipya Lya

Nkima azwalile limi

¹ Na bulolelo butale wali wilonga ngʼwigulu; nkima azwalile limi, na ngʼweji hasilili ya magulu gakwe, na ku ntwe gwakwe ngikili ya sonda ikumi na ibili.

² Nanghwe walali nda, ulila ulungʼwa busungu wa kubyala.

Isota lyaza

³ Bubonwa hangi bulolelo bungi ngʼwigulu, lolaga, isota lyaza itale, ilili na mitwe mpungati na mapembe ikumi, na ha mitwe yalyo ngikili mpungati.

⁴ Na nkila gwalyo gudutila ibudika lya kadatu lya sonda ja ngʼwigulu, gujiponeja ha si: i lisota lyimila mu butongi wa nkima uyo wahaya kubyala giki, aho alabyale, linʼye ngʼwana wakwe.

Ngʼwana ngosha

⁵ Nanghwe ubyala ngʼwana ngosha, uyo alagadima mahanga gose na nanga gwa kisinza: na ngʼwana wakwe upulwa kutwalwa kuli Mulungu na kwisumbi lyakwe lya butemi.

⁶ U nkima nanghwe upelela mu bu, uko ali na lwande aho wabegahegejiwa na Mulungu, banishe kwenuko shiku 1,260.

Bulugu ngʼwigulu

⁷ Bubiza ho lulu bulugu ngʼwigulu: Mikaeli na bamalaika bakwe bulwa na isota; isota nalyo lyulwa kihamo na bamalaika balyo;

⁸ Aliyo bali batupyena; nulu wikalo wabo wali butilonga hangi ngʼwigulu.

⁹ Na isota lyenilo itale lyuponyiwa, i lyene iyoka lya kale, ilitanwa giki, Muji, hangi Shetani, uyo akulembaga si yose, ngʼwene uponejiwa ku si, na bamalaika bakwe nabo buponyiwa kihamo nanghwe.

¹⁰ Hunaho nuligwa ilaka itale ngʼwigulu, lyuhaya giki, Haha lulu washikaga bupiji, na nguzu, na butemi wa Mulungu wiswe, na budula wa ngʼwa Kristo wakwe: iki muji wa badugu biswe waponejiwagwa ha si, uyo wali ubyubabula mu butongi wa Mulungu wiswe limi na bujiku.

¹¹ Nabo bumpyena kulwa mininga ga Ngʼwana wa ngholo, na kulwa mhayo gwa bukaniji wabo; hangi bali batubudilila bupanga wabo kushisha kucha.

¹² Kulwa iyo, yegaga bebe igulu, na bingʼwe mukikalaga mo. Ngʼwasangwa bingʼwe si na nyanza; iki muji ngʼwenuyo wikaga ku bingʼwe, ali na bupelanu wingi no, iki amanile ikanza lyakwe ilyasaga lili ido.

Shetani unyajanyaja u nkima

¹³ Isota lyenilo aho lyubona giki, lyuponejiwa ku si, lyunyajanyaja lulu nkima ngʼwenuyo wali umyala ngʼwana ngosha.

¹⁴ Huna lulu u nkima ngʼwenuyo winhiwa manana abili ga mbeshi nhale giki, alale aje mu bu, ku lwande lwakwe, alishiwe kwenuko ikanza, na makanza na ikanza nusu, alisegenelile iyoka.

¹⁵ Iyoka nalyo lyuswa minzi kufuma mu nomo gwalyo giti mongo kunuma ya nkima, giki, u nkima ahulumiwe na mongo.

¹⁶ Aliyo si yungunana u nkima, si yasamya nomo gwayo, yugukwelela mongo gwenuyo uguswiwa na isota mu nomo gwalyo.

¹⁷ Hunaho lulu isota lyundakila nkima, lyuja lulu lyububukila bulugu u bubyile wakwe uwali busaga ho, abashidimile shilagilo sha Mulungu, hangi abali nabo bukaniji wa kuli Yesu Kristo.