Kukundulwa 11 - Ilagano Ipya Lya

Yohana ulagilwa kupima hekalu

¹ Hanuma lulu ninhiwa ibingo likelile na nanga, nuwilwa giki, Bukaga upime hekalu ya Mulungu na ngʼwalilo, na benabo abakalamijaga mo.

² Aliyo kibuga ikili hanze ya hekalu chene, kilekage, utizukipima; iki chene chaabalekelwa bana mahanga: na nzengo ngʼwela balagupandagila mieji makumi ane na ibili. Bakaniji babili

³ Na Nene nakubinha budula bakaniji bane babili, nabo balabyuhanga shiku 1,260, bazwalile shizwalo sha magunila.

⁴ Benabo bene miti yeniyo ibili ya mizeituni na tala ibili ijimilile mu butongi wa Mulungu wa si jose.

⁵ Munhu ose ulu uhaya kubitila kibi, moto gufuma mu milomo yabo, gubabocha banishi babo: na munhu ose ulu uhaya kubitila kibi, ngʼwenuyo akubulagwa giko.

⁶ Benaba bali na budula kulugala igulu, mbula ituzutula mu shiku ja buhangi wabo: hangi bali na budula ku minzi kugagalucha kubiza mininga, hangi na kutula si na mahuya gose, nghangala ningi gitumo batogelilwe.

⁷ Aho balamalija bukaniji wabo, huna lulu kinwele ichufuma ngʼwichongo iliti na ngelelo kilita bulugu nabo, nacho kilabapyena na kubabulaga.

⁸ Na mibimba yabo ilalambalala ngʼwipalapala lya nzengo ntale, uyo ugwitanwa mu ki-moyo Sodoma na Misri, hangi hu kwene Seba wiswe wali ukomelwa.

⁹ Na banhu ba mu ndugu, na ba mu ngʼanda, na ba mu ndimi, na ba mu mahanga, nabo balayibona mibimba yabo shiku idatu na nusu; nulu batalazunilija mibimba yabo kugungʼwa mu shigila.

¹⁰ Nabo abazengile mu si balayega kulwabo, na kusangabala no, hangi balabinongha benekele na benekele; iki bahangi benabo babili bali bubyubaluhya abazengile mu si.

¹¹ Hanuma ya shiku idatu na nusu moyo gwa bupanga ugufumile kuli Mulungu gubingila, nabo bimila na magulu gabo wima; na boba butale bubadima abo abubilolela.

¹² Huna lulu bigwa ilaka itale kufuma ngʼwigulu lilibawila giki, Linhagi ngʼwize kunu. Nabo bulinha lulu ngʼwigulu ngʼwilunde; na banishi babo bubilolela.

¹³ Ngʼwikanza lyenilo yubiza ho nyahinga nhale, na ibudika lya ikumi lya nzengo lyugwa; na banhu 7,000 nabo bubulagwa na nyahinga yeniyo: nabo abali busaga ho budingʼwa na boba, bungʼwinha ikujo Mulungu wa ngʼwigulu.

¹⁴ Kusangwa kwa kabili kwamala kubita: lolaga, kusangwa kwa kadatu kuliza wangu.

Ipembe lya mpungati

¹⁵ Malaika wa mpungati utuula ipembe; huna gubiza ho malaka matale ngʼwigulu, guhaya giki, U butemi wa si wabizaga wa Seba wiswe, na wa ngʼwa Kristo wakwe: nanghwe alatema kushisha welelo na welelo.

¹⁶ Nabo a banamhala benabo makumi abili na bane, abigashije ku butongi wa Mulungu ha masumbi gabo ga nyatemi, bugwa bachimigije bushu, bunamya Mulungu,

¹⁷ Buhaya giki, Twakulumba, Ee Seba Mulungu wa nguzu jose, Uyu uli ho, na wali uli ho, hangi ulabiza ho; iki Bebe wadimaga budula wako butale, na watema.

¹⁸ Huna bana mahanga bupelana, na bupelanu wako washikaga, na ngelo ya kubalekanya nsango bafu, na ngelo ya kubinha mhela basese bako a bahangi, na bela, na benabo abalyogohile lina lyako, a bado na batale; hangi na ngelo ya kubakenagula benabo abakuyikenagulaga si.

¹⁹ Huna lulu hekalu ya Mulungu yigulwa ngʼwigulu; na isandiko lya ilagane lyakwe lyubonwa mu hekalu yakwe; huna lulu jubiza ho ndabi, na malaka, na nghuba, na nyahinga, na mbula nhale ya mawe.