Kukundulwa 1 - Ilagano Ipya Lya

Mbuki ya mihayo

¹ Kukundula kwa ngʼwa Yesu Kristo, uko Mulungu akangʼwinha kubolekeja basese bakwe mihayo iyigelile kutoza ho wangu: akantumila nsese wakwe Yohana, malaika wakwe kumanikija mihayo yeniyo;

² U ngʼwene waagukanila mhayo gwa Mulungu, na bukaniji wa ngʼwa Yesu Kristo, na iyo yose wali uyibona.

³ Ali wa lubango uyo akusomaga, nabo abakwigwaga mihayo ya buhangi ubu, na buyidima mihayo iyandikile mo; iki ikanza lili hihi.

⁴ Nene Yohana ku kanisa mpungati ijili mo mu Asia: Kigongo kibize ku bingʼwe, na mhola, kufuma kuli Ngʼwenuyu ali ho, hangi walali ho, hangi alabiza ho; na hangi kufuma ku mioyo yeniyo mpungati iyili ho mu butongi wa isumbi lyakwe lya butemi;

⁵ Hangi kufuma kuli Yesu Kristo, Uyo ali nkaniji ngʼwishigwa, na Ngʼwana uwabyalwa tangi kufuma mu bafu, na nsugi wa batemi ba mu si. Uyo waatutogwa, hangi ututungula mu shibi shiswe na mininga gakwe,

⁶ Utugalucha kutoza batemi na bagabiji kuli Ise Mulungu; Ngʼwenuyu ikujo lili lyakwe na budula welelo na welelo. Amina.

⁷ Lolagi, izile na malunde; na buli liso lyose lilamona, na benabo abaanchima; na mahanga gose ga mu si galalila shisoji kulwa nguno yakwe. Ali chene, Amina.

⁸ Nene ndi Alfa na Omega, uhaya Seba Mulungu, Uyo ali ho, na walali ho, hangi alabiza ho, Uyo wa budula bose. Yesu ungʼwilongela Yohana

⁹ Nene Yohana, ndugu wingʼwe, na ngʼwichingʼwe mu kunyajanyajiwa, na mu butemi, na mu kwiyumilija kwa ngʼwa Yesu Kristo; nali nubiza ho ngʼwijinga ilitanwa Patmo, kulwa nguno ya mhayo gwa Mulungu, na kulwa nguno ya bukaniji wa ngʼwa Yesu.

¹⁰ Nali nubiza mu ki-moyo ha lushiku lwa Seba, huna nigwa kunuma yane kulunduma kwa ilaka itale, giti lya mhembe,

¹¹ Lyuhaya giki: Nene ndi Alfa na Omega, wa kwandia na wa nghalikijo: iyo ulibona iyandikage mu kitabo, ukitume ku kanisa mpungati ijili mu Asia: ku Efeso, na Smurna, na Pergamo, na Thuatira, na Sardi, na Filadelfia, na Laodikia.

¹² Huna lulu nikibuka nalibone i lilaka ilililungalunga na nene. Aho nikibuka nubona matala mpungati ga zahabu;

¹³ Na hagati ya matala mpungati genayo numona ho munhu ikolile giti Ngʼwana wa munhu, azwalile kizwalo kushisha ku mliambala, itungigije nkoba gwa zahabu mu kikuba.

¹⁴ U ntwe gwakwe na nzwili jakwe jali jape giti boya wape wa ngholo, giti theluji; a miso gakwe nago giti lulali lwa moto;

¹⁵ Na magulu gakwe gabange giti chuma chape kigusile, giti kipembilwe mu luhiza, na ilaka lyakwe giti kulunduma kwa minzi mingi.

¹⁶ Mu nkono gwakwe gwa bulyo walali na sonda mpungati: na lilushu lya bugi bubili lifumile mu nomo gwakwe: na bushu wakwe wali giti limi likwakaga mu budula walyo lyose.

¹⁷ Aho numona, nugwa ha si ku magulu gakwe giti munhu achile. Nanghwe unituulila nkono gwakwe gwa bulyo, uhaya giki, Utizogoha; Nene ndi wa kwandia na wa nghalikijo:

¹⁸ Hangi ndi Uyo ndi mpanga, nali nubiza nachile, na lolaga, ndi mpanga kushisha welelo na welelo, Amina: hangi ndi najo mfungulo ja kucha na ja kulimu.

¹⁹ Iyandikage lulu mihayo iyo wali uyibona, na iyo ili ho, na iyo ilabiza ho hanuma ya yeniyo;

²⁰ I cha kwigeniha cha sonda mpungati ijo wali ujibona mu nkono gwane gwa bulyo, na cha kwigeniha cha tala jenijo mpungati ja zahabu. I sonda jenijo mpungati jene bamalaika ba kanisa mpungati: na tala mpungati ijo wali ujibona jene kanisa mpungati.