Filimoni 1 - Ilagano Ipya Lya

Kugisha

¹ Paulo ntungwa wa ngʼwa Yesu Kristo, na Timoteo ndugu wiswe, kuli Filemoni ntogwa wiswe na ntumami ngʼwichiswe;

² Na kuli Appia ilumbu lyiswe, na kuli Arkipo u nshilikale ngʼwichiswe; na ku Kanisa iyili mu numba yako:

³ Kigongo kibize ku bingʼwe, na mhola iyufuma kuli Mulungu Siswe na kuli Seba wiswe Yesu Kristo.

Kulumba kulwa nguno ya ngʼwa Filemoni

⁴ Nanumba Mulungu wane gwa, nakukuhayaga mu kulomba kwane.

⁵ Nigwile mihayo ya butogwa wako na buzunya ubo uli naho kuli Seba Yesu, na ku bela bose;

⁶ U busangi wa kuzunya kwako butumame mu bumani wa buli mhayo gwa wiza uguli mo muli bebe muli Kristo Yesu.

⁷ Iki tuli na buyegi wingi na kwifula kulwa nguno ya butogwa wrako, iki mioyo ya bela yifujiwagwa na bebe, ndugu wane.

Paulo ungʼwikumbilija Filemoni kulwa Onesimo

⁸ Ali lulu nahone, nulu ndi na bugimu muli Kristo kukulagila iyikwigelile,

⁹ Aliyo kulwa nguno ya butogwa nakwikumbilija, iki ndi Paulo, u namhala, na hangi haha ndi ntungwa wa ngʼwa Yesu Kristo:

¹⁰ Nakwikumbilija kulwa ngʼwana wane uyo naamyala mu butungwa wane, u Onesimo,

¹¹ Uyo i kale walati na ngofyolo kuli bebe, aliyo i haha ali na ngofyolo kuli bebe na kuli nene:

¹² Uyo nanshosha kuli bebe wei ngʼwenekele, unzunilije, uyo hu moyo gwane:

¹³ Uyo nali natogihve ikale na nene, anambilije ha ngʼwanya gwako mu butungwa wa evangeli:

¹⁴ Aliyo natatogilwe kwita mhayo bebe utazunije, giki, wizangholo wako buleke kubiza wa buhadiki, aliyo bubize wa kutogwa ngʼwenekele.

¹⁵ Iki hamo kulwa mhayo uyo akakomanyiwa nangho kakanza, huna abize kihamo nangho shiku welelo:

¹⁶ Kufuma haha ati giti nsese, aliyo atindile nsese, haha ali ndugu ntogwa no kuli nene, aliyo kuli bebe kutinda no, mu mili na muli Seba.

¹⁷ Aliyo lulu, ulu unibala ndi ngʼwiyo, ngʼwegelejage giti nene.

¹⁸ Aliyo ulu wakenagulile mhayo gose kuli bebe, nulu ulu ali na bugasa kuli bebe, nahene ububalile kuli nene;

¹⁹ Nene Paulo nandika iyi na nkono gwane ngʼwenekele, nene nalabukuula: aliyo natukutondaga bugasa ubo uli naho kuli nene, wene bebe ngʼwenekele.

²⁰ Ali chene, ndugu wane, leke nabone buyegi muli bebe muli Seba: uyifuje ngholo yane muli Kristo.

Kakomigile na kagisije

²¹ Nakwandikila nakusanije bulyehu wako: namanile giki, ukwita na kutinda iyo nalihaya.

²² Na hangi, unilongeje numba ya kushikila mo: iki nalisagilwa kushoshiwa ku bingʼwe hangi kulwa kulomba kwingʼwe.

²³ Epafra, u ntungwa ngʼwichane muli Kristo Yesu, wakugisha;

²⁴ Na Marko na Aristarko na Dema na Luka, a batumami bichane.

²⁵ Kigongo cha Seba wiswe Yesu Kristo kibize hamo na moyo gwako. Amina.