Bakolose 4 - Ilagano Ipya Lya

¹ Bingʼwe baseba, binhagi basese bingʼwe iyili ya butungilija na ya kulenganila; iki mumanile na bingʼwe ningʼwe muli na Seba ngʼwigulu.

Gitumo igelile kulomba na kulungalunga

² Komelagi mu kulomba, ngʼwikale miso mo hamo na kulumba;

³ Tulombelagi nu biswe, Mulungu atulugulile nyango gwa kutemela mhayo, kuyihaya ya kwigeniha ya ngʼwa Kristo, iyo kulwa nguno yayo ndi mu butungwa;

⁴ Niyoleche hape gitumo shinigelile kuhaya.

⁵ Shiminzagi kisala mu butongi wabo abali hanze, mubizukomola makanza.

⁶ Kalungalungile kingʼwe kabize ka kigongo gwa, kalunge na munu, mumane umo igelile kunshokeja buli munhu.

Paulo utuma amane mhola yabo

⁷ Mihayo yane yose gitumo ili akungʼwitegeleja Tukiko u ndugu ntogwa, na ntumami ngʼwishigwa na ntumami ngʼwichane muli Seba:

⁸ Uyo nantumaga ku bingʼwe kulwa nguno yeniyo duhu giki, amane mhola yingʼwe, hangi amutimbye ngholo jingʼwe;

⁹ Nuntuma kihamo na Onesimo ndugu ngʼwishigwa na ntogwa, uyo ali munhu wa ku bingʼwe. Benabo bakumumanikija mihayo yose ya kunu.

Kigisije

¹⁰ Aristarko, ntungwa ngʼwichane, wamugisha, na Marko, u ngʼwipfa wa ngʼwa Barnabas (uyo ngʼwamala kulagilwa ya kungʼwitila; ulu alashika ku bingʼwe, ngʼwegelejagi),

¹¹ Na Yesu, uyo witanwa Yusto, abali ba mu basalwa. Bene bike hali batumami bichane mu nimo gwa butemi wa Mulungu, aba banilungugije.

¹² Epafra, uyo ali munhu wa ku bingʼwe, nsese wa ngʼwa Kristo Yesu, wamugisha, akujangilaga kulwingʼwe gwa mu kulomba kwakwe giki, muhandikile, mushikane mu iyo yose Mulungu atogilwe.

¹³ Iki nankanila giki, ali na bukalalwa butale kulwingʼwe, na kulwabo abali mu Laodikia, na kulwabo abali mu Hierapoli.

¹⁴ Luka, u mfumu ntogwa, na Dema, bamugisha.

¹⁵ Bagishagi badugu abali mu Laodikia, na Numfa, na kanisa iyili mu numba yakwe.

¹⁶ Nyaluba iyi ulu yamala kusongʼwa ku bingʼwe, huna isongʼwe nu mu kanisa ya Laodikia; na bingʼwe isomagi nyaluba ya Laodikia.

¹⁷ Ngʼwilagi Arkipo giki, Kulanghanage kwinhilija uko winhiwa muli Seba akushikilije.

¹⁸ Kugisha kwane nene Paulo na nkono gwane ngʼwenekele. Wizukagwi butungwa wane. Kigongo kibize hamo na bingʼwe. Amina.