Bakolose 2 - Ilagano Ipya Lya

¹ Iki natogilwe mumane kwigwiyambija kutale uko ndi nako kulwingʼwe na kulwabo ba mu Laodikia, na kulwabo bose abatinanibona bushu wane mu mili;

² Giki, ngholo jabo jilungujiwe, balunganyiwe mu butogwa, na bashike mu busabi bose wa kokala kwa kwitegeleja, bakumane gete kwigeniha kwa Mulungu, kwene Kristo;

³ Uyo muli Wei bubiki bose wa masala na wa bumani bubisile.

Buhuguji kulwa malange ga masala ga si

⁴ Nahaya giki, munhu ose atizumulembalemba na mihayo ya bukongakongi.

⁵ Iki nulu nati ko mu mili, aliyo ndi hamo ningʼwe mu moyo, nakuyegaga na kububona widomanija wingʼwe, na buhandikiji wa kuzunya kwingʼwe muli Kristo.

⁶ Kulwa iyo gitumo ngʼwaangʼwanukula Kristo Yesu Seba, shiminzagi giko muli Wei,

⁷ Mukomile miji na ngʼwazengwa muli Wei, mujamiwe mu kuzunya, gitumo ngʼulangwa, kulumba kongeje kukwila.

⁸ Ilanghanagi, munhu ose atizumugwasha na busimbi wa masala, na bulembalembi wa dalali, nulu gitumo iyalekwa hakulu umo ili, na gitumo malange ga si umo gali, aliyo iti gitumo kalangile ka ngʼwa Kristo umo kali.

Bupiji bose butangʼanhile muli Kristo

⁹ Iki muli Wei buzengile mo bushikanu bose wa Bumulungu mu mili.

¹⁰ Na bingʼwe ngʼwashikanile muli Wei, Uyo ali ntwe gwa busugi bose na budula bose.

¹¹ Muli Wei mukasalwa na kasalilwe akatitwa na makono, kene kuguzula mili gwa shibi sha kimili mu kusatwa kwa ngʼwa Kristo;

¹² Mukajikwa hamo nanghwe mu kubatijiwa, muko ngʼwaajuchiwa hamo nanghwe kulwa kukazunya kitile ka Mulungu Uyo waanjucha mu bafu.

¹³ Na bingʼwe aba ngʼwali muchile kulwa bukenaguji wingʼwe na butusalwa wa ki-mili chingʼwe, ungʼwita bingʼwe kubiza bapanga kihamo nanghwe, aho umukuulilwa bukenaguji wingʼwe;

¹⁴ Iki wamala bujimya i chandikile ichali chandikwa kutubula, ichali kili wanishi ku biswe: i chene uchinja na ukikoma ha nsalaba;

¹⁵ Ugatagija mabusugi na mabudula shilanga shago, ugatenda hape, ugapyena mu nzila ya nsalaba.

¹⁶ Kulwa iyo munhu ose aleke kumulekanya mu mihayo ya sha kulya na sha kungʼwa, nulu mu mihayo ya lushiku lutale nulu ya bafumile ka ngʼweji, nulu ya lushiku lwa Sabato:

¹⁷ Mihayo iyo yene nengeji gwa yeniyo iyali yuhayiwa giki, iliza; aliyo mili gwene gwa ngʼwa Kristo.

¹⁸ Munhu ose atizumutagija mhela yingʼwe kulwa kidohelegeje kakwe ka ngʼwenekele, na kulamya bamalaika, na kwigungunika mu iyo atinibona, na kudosela dalali mu kigambile kakwe ka ki-mili.

¹⁹ Atudimana na Ntwe, Uyo mugo mili gose gulishiwa na gulunganigijiwa hamo mu malungilo na matimba gago, gukula nghulile ya kufuma kuli Mulungu.

²⁰ Kulwa iyo ulu ngʼwamala kucha hamo na Kristo ku malange ga si, ni buli mukushilyehelaga shilagilo giti muli bazengi ba mu si giki,

²¹ Mutizudima iki, nulu mutizuloja ishi, nulu mutizukuumya aya.

²² (Shinhu isho shose shikukenaguka aho shutumamilwa) ngʼulondela shilagilo na malange ga ki-munhu?

²³ Mihayo yeniyi hene yalolwa ili ya wenge mu kalamije ako ngʼwibegeja benekele na mu widoheleja, na mu kwigumanija kwa mili; aliyo yeniyo yose ili dalali, nulu itudula kugulemeja mili.