Bakolose 1 - Ilagano Ipya Lya

Kugisha na kulumba kwa ngʼwa Paulo

¹ Paulo, ntungʼwa wa ngʼwa Yesu Kristo kulwa iyo Mulungu atogilwe, na Timoteo ndugu wiswe,

² Ku bela na badugu bishigwa muli Kristo abali mu Kolose: kigongo kibize ku bingʼwe na mhola ishufuma kuli Mulungu Siswe.

³ Twanumba Mulungu Ise wa Seba wiswe Yesu Kristo, tukumulombelaga gwa.

⁴ Iki twigwile nghulu ja kuzunya kwingʼwe muli Kristo Yesu na butogwa ubo muli nabo ku bela bose,

⁵ Kulwa nguno ya kwisagilwa uko ngʼwaabikilwa ngʼwigulu, uko nghulu jako ngʼwali ngʼwandia kwigwa mu mhayo gwa nghana gwa evangeli;

⁶ Iyashikile ku bingʼwe, gitumo yashikile numu si jose; ikutwajaga matwajo na kwiyongeja, gitumo ikwitaga nu mu bingʼwe kufuma lwise lwene aho ngʼuchigwa na ngʼukimana kigongo cha Mulungu mu nghana;

⁷ Gitumo ngʼulangwa na Epafra u ntumami ngʼwichiswe ntogwa, uyo ali ngʼwinhilija ngʼwishigwa wa ngʼwa Kristo kulwingʼwe.

⁸ Nanghwe akatusombolela butogwa wingʼwe wa mu Moyo Ngʼwela.

Kulomba kwa ngʼwa Paulo kulwabo

⁹ Kulwa nguno iyo na biswe, kufuma lushiku ulo aho twali twigwa mihayo iyi, tutuleka kumulombela na kulomba kulwingʼwe giki, ngʼwizujiwe na bumani wa iyo atogilwe Wei mu masala gose ga ki-moyo na mu kwitegeleja kose.

¹⁰ Mushiminze gitumo igelelilwe kuli Seba, munyeje mu yose, mutwaje matwajo mu buli nimo gose gwa wiza, ngʼongeje mu kumana Mulungu;

¹¹ Muguzuhiwe na budula bose, gitumo budula wa ikujo lyakwe umo buli giki, mubize mu kugoyela kose na kwiyumilija kose na buyegi;

¹² Munumbe Siswe Uyo waatubeja tubize abigelile kwanukula ngabo gwa wingiji wa bela ngʼwisana;

¹³ Uyo waatupija twinge mu budula wa giiti, na utusamya na utwingija mu butemi wa Ngʼwana wakwe wa butogwa:

¹⁴ Uyo muli Wei tuli na kukomolwa kwiswe, kwene kukuuliiwa kwa shibi shiswe.

Kugunguhiwa kwa ngʼwa Kristo

¹⁵ Uyo ngʼwene ali suso ya Mulungu Uyo atabonagwa, ali ngʼwana tangi wa shisengʼwa shose;

¹⁶ Iki muli Wei shinhu shose shusengʼwa, ishili ngʼwigulu ni ishili mu si, shinhu ishabonwa ni ishitubonwa, nulu gali mabutemi, nulu mabusugi, nulu mabutale, nulu mabudula; shinhu shose shaasengʼwa nanghwe, na hangi kulwakwe;

¹⁷ Nanghwe walali ho aho shinhu shose shali shiti ho, na muli Wei shinhu shose shidimanigije.

¹⁸ Nanghwe ali ntwe gwa mili, gwene Eklezia: Uyo ali wandijo, myalwa wa kwandia wa kufuma mu bafu, giki, mu mihayo yose Wei abize ntale:

¹⁹ Iki inyegije Ise giki, kokala kose kwikale mo muli Wei:

Milimo ya ngʼwa Kristo

²⁰ Na muli Wei kushisangija shinhu shose shibize busangi nanghwe, iki wamala kubeja mhola kulwa mininga ga nsalaba gwakwe; muli Wei nulu shinhu ishili mu si, nulu ishili ngʼwigulu.

²¹ Na bingʼwe aba mu shiku ja kale ngʼwali ngʼukomanyiwa na ngʼwali muli banishi mu kiganikile kingʼwe kuhva Shitwa shingʼwe sha bubi,

²² Aliyo haha waamusangija mu mili gwakwe gwa kimunhu kulwa kucha, giki, angʼwenhe ko ku butongi wakwe muli bela na abati na kilingo nulu mhayo gwa kudonholwa:

²³ Ulu ngʼushinga mu kuzunya, ngʼuzengelwa ha itale na ngʼuma kulu, na mutuhumbulwa kwinga mu kwisagija kwa evangeli iyo ngʼuyigwa, iyulomelwa ku shisengʼwa shose ishili hasilili ya igulu; iyo nene Paulo nutuulwa kubiza ngʼwinhilija wayo.

Wilwisha wa ngʼwa Paulo kulwa kanisa

²⁴ Uyo nene haha nakukuyegelaga kuluhiwa kwane kulwa nguno yingʼwe, nashikilije mu mili gwane iyishigilile ya kuluhiwa kwa ngʼwa Kristo kulwa nguno ya mili gwakwe, gwene Eklezia;

²⁵ Iyo nutuulwa kubiza ngʼwinhilija wayo gitumo kali kalongeje ka Mulungu aka ninhiwa kulwa nguno yingʼwe, kutangʼanhya mhayo gwa Mulungu,

²⁶ U gwene gwa kwigeniha ugwali gubiswa kufuma makanza ga kale na ga shibyalilwe: aliyo haha gwaakundulwa ku bela bakwe;

²⁷ Abo Mulungu yuntoga kubamanikija busabi wa ikujo lya kwigeniha uku mu bana mahanga gitumo kuli, kwene giki, Kristo mu bingʼwe, kwisagilwa kwa ikujo:

²⁸ Uyo tukulomelaga yakwe tunghugula buli munhu, na kunanga buli munhu mu masala gose giki, tungʼwenhe buli munhu ashikanile muli Kristo Yesu:

²⁹ Nakoyakoya milimo kulwa nguno yeniyi, nigwiyambija gitumo kali kitile kakwe, ako akitaga muli nene na nguzu.