Bahebrania 7 - Ilagano Ipya Lya

Kristo ali ngabiji ntale wa mu mbika ya ki-Melkizedeki

¹ Iki Melkizedeki ngʼwenuyo, ntemi wa Salemi, ngabiji wa Mulungu ali higulya no, uyo wali umanhya na Abrahamu aho walashokile kufuma mu kubulagwa kwa batemi, na unsungulila lubango,

² Kuli wei hangi Abrahamu ungʼwinha imo ya ngʼwikumi ya shose; (na kunshomeleja, kwandia walali Ntemi wa butungilija, na hangi walali Ntemi wa Salemi, makulu gaho giki, Ntemi wa mhola;

³ Walati na ise nulu nina, nulu walati na luganda, walati na kwandia kwa shiku, nulu nghalikijo ya bupanga, aliyo wikolanijiwa na Ngʼwana wa Mulungu); akikalaga ngabiji welelo bose.

⁴ Nahene, idedekanyagi butale wa munhu uyo gitumo walali, uyo Abrahamu u nkulugenji wiswe akangʼwinha imo ya ngʼwikumi ya sha kusonzwa.

⁵ Na nghana bana ba Lawi abo abinhiwa nimo gwa bugabiji, bali na kilagilo kutwala imo ya ngʼwikumi ya banhu gitumo shilagilo shuhaya, bene bali badugu babo, nulu bali bufuma mu nkimbili gwa ngʼwa Abrahamu:

⁶ Aliyo ngʼwenuyo, luganda lwakwe lutubalwa kufuma mu benabo, akanukula imo ya ngʼwikumi ya ngʼwa Abrahamu, na unsungulila lubango uyo uwalali na kwisagijiwa.

⁷ Mhayo uyu guti na kuhalalilwa giki, ndo akusungulilagwa lubango na ntale.

⁸ Na kunu banhu abakuchaga banukula imo ya ngʼwikumi; aliyo uko, munhu uyo wakanilwa giki, ali mpanga.

⁹ Hangi nadula kuyihaya giki, Lawi nanghwe uyo waanukulaga imo ya ngʼwikumi, akafunya imo ya ngʼwikumi muli Abrahamu.

¹⁰ Iki wei walatali mu nkimbili gwa ngʼwa gukuye aho Melkizedeki umanhya nanghwe.

Bugabiji wa ngʼwa Aroni winjiwa

¹¹ Nahene, ulu bushikanu ni wali bubiza ho mu bugabiji wa ki-Lawi (iki mu busugi ubu banhu bali binhiwa shilagilo), kulwa kinahe igelile ngabiji ungi kubuka hanuma, wa mbika ya ki-Melkizedeki, atabalilwe wa mu mbika ya ngʼwa Aroni?

¹² Iki bugabiji aho bugaluchiwa, shigelile shilagilo nasho shigaluchiwe.

¹³ Iki Uyo wali uhayiwa mihayo iyi ali wa luganda lungi, nulu kuduhu munhu wa luganda ulo uwali winhilija ha ngʼwalilo.

¹⁴ Iki ili hape giki, Seba wiswe akafuma mu Yuda, luganda lwenulo Musa walataluhayile mhayo gwa bugabiji.

¹⁵ Na iyo tukuhayaga ili hape kutinda, giki, wabuka ngabiji ungi wa mbika ya ki-Melkizedeki,

¹⁶ Uyo atatuulilwe mu bugabiji mu kalagilile ka ki-mili, aliyo mu budula wa bupanga butushila:

¹⁷ Iki yakanilwa kuli Wei, Bebe uli ngabiji wa welelo na welelo, wa mbika ya ki-Melkizedeki.

¹⁸ Iki kuli ho kwinjiwa kwa shilagilo ishali shutonga kulwa nguno shali shiti na nguzu nulu solobo.

¹⁹ Iki shilagilo shali shitushikanya mhayo gose; aliyo ha lwande lwasho kwingijiwa kwisagilwa kwa wiza kutinda: mu uko twangʼwegela Mulungu.

Bugabiji wa ngʼwa Kristo bulalashila

²⁰ Hangi gwali gutitwa ulu iti kulwa kilahilo:

²¹ Iki abo bali bitwa bagabiji bali batulahililwa; aliyo Ngʼwenuyu wiitwa na kilahilo cha Ngʼwenuyo uwali wangʼwila giki, Seba akalahila, nanghwe atugaluka, Bebe uli ngabiji wa welelo na welelo, (wa mbika ya ki-Meikizedeki.)

²² Kulwa iyo Yesu wabizile ngʼwipiga ibili wa ilagane ilili lya wiza kutinda.

²³ Nabo bali bubiza bagabiji bingi iki kulwa kucha bali bujijiwa kushinga ho.

²⁴ Aliyo Wei, kulwa akwikalaga mpanga shiku jose, ali na bugabiji ubutingaga ho.

²⁵ Kulwa iyo Wei wadula kubapija gete abungʼwegela Mulungu muli Wei, iki akwikalaga mpanga shiku jose kubalombela.

²⁶ Iki itubelelile biswe kubiza na ngabiji ntale giti Wei, Uyo ali ngʼwela, ati na buhwiganu, ati na kilingo, ukomanyiwa na abali na shibi, hangi ugunguhiwa kukilila igulu;

²⁷ Uyo ati na nguno buli lushiku giti bagabiji benabo kufunya shitambo, kwandia kulwa shibi shakwe sha ngʼwenekele, na hanuma kulwa shibi sha banhu: iki mhayo uyu wali wita lukangala lumo aho wali wiyinha ko ngʼwenekele.

²⁸ Iki shilagilo shubatuula ho banhu kubiza bagabiji batale abali na bugokolo; aliyo mhayo gwa kilahilo, uyo ugwali gwiza hanuma ya shilagilo, gwantuula ho Ngʼwana, ngʼwene nshikanu wa welelo bose.