Bahebrania 6 - Ilagano Ipya Lya

¹ Kulwa iyo, tuleke kalangile ka kwandia ka ngʼwa Kristo, tuhahalile kushika ku bushikanu, tutizutuula ho hangi musingi gwa koya mu Shitwa shichile, na kuzunya kuli Mulungu,

² Na kulanga kwa kubatija, na kutuulihva makono, na kujuchiwa kwa bafu, na nsango gwa welelo na welelo.

³ Na iyi tukwita, ulu Mulungu utuzunilija.

Kutula mu kuzunya kuli na kwihiga kutale

⁴ Iki abo abamala kwelelwa, na kuloja cha kwinhiwa cha ngʼwigulu, na bitwa basangijiwa ba Moyo Ngʼwela,

⁵ Na buloja mhayo gwa wiza gwa Mulungu na budula wa ikanza lyuhaya kwiza,

⁶ Ulu butala kwinga mu yeniyo, itudulika kubadoganya bupya hangi kushika mu koya; iki bushokela kunkoma hangi Ngʼwana wa Mulungu kubo benekele, na bandimya minala hape.

⁷ Iki si ikangʼwaga mbula iyi ikatulaga ho nghangala ningi, na ikazwishaga makubi agabigelile benabo abakayilimaga, ikinhagwa lubango ulufuma kuli Mulungu:

⁸ Aliyo ulu yuzwisha mihwa na masaka ga bubi, yulengʼwa lulu, nayo ili hihi kuzungʼwa; ku nghalilo yaho kupemva.

⁹ Aliyo nahene, batogwa, nulu twahaya giko, tungʼwiganikila bingʼwe mihayo ya wiza kutinda yeniyo, yene mihayo iyudimana na bupiji:

¹⁰ Iki Mulungu ali ntungilija, atibaga milimo yingʼwe, na butogwa ubo ngʼwali ngʼolecha mu lina lyakwe, iki ngʼwali ngʼubinhilija a bela, ni gisi mutali mubinhilija.

¹¹ Na biswe tutogilwe giki, buli munhu ose mu bingʼwe oleche bukomezu wenubo mu bushikanu wa kwisagilwa kushisha ku nghalilo.

¹² Muleke koloha, aliyo mubize balondeji ba benabo abingila mu kwisagijiwa kulwa kuzunya na kwiyumilija. Bazunya bakomelejiwa na kwisagija kwa Mulungu

¹³ Iki Mulungu aho akangʼwisagija Abrahamu, iki walati ho ungi ntale kutinda Wei wa kunahilila, wiilahilila Wei ngʼwenekele,

¹⁴ Uhaya giki, Nghana kusungulila lubango, nakukusungulila lubango, na kongeja, nakukongeja bebe.

¹⁵ Na giko, iki wali wiyumilija, winhiwa kwisagijiwa.

¹⁶ Iki banhu bakulahililaga ku batale: na kilahilo cha kudimya mhayo chene imalilo lya halali yose mu banhu.

¹⁷ Mu mhayo uyu Mulungu, iki walatogilwe no kubolekeja bingiji ba kwisagijiwa giki, longʼwe yakwe itagalukaga, utuula ho kilahilo kuyidimya;

¹⁸ Giki, kulwa mihayo ibili iyitagalukaga, mu iyo Mulungu walatudula kuhaya bumama, tubize na butimbyangholo wa nguzu, biswe abamala kupelela kudima kwisagilwa ukwatuulwa ho ku butongi wiswe:

¹⁹ Uko tuli nako giti nanga ya moyo, ya gete gete na ndimu na iyingilaga mu iyo ili mo mugati ya iselema;

²⁰ Umo Yesu wiingila mo kulwa biswe, u ntongi wiswe, waabiza ngabiji ntale wa welelo na welelo wa mbika ya ngʼwa Melkizedeki.