Bahebrania 4 - Ilagano Ipya Lya

Kwifula ukuli ho ku bazunya

¹ Kulwa iyo, iki kwisagija kwa kwingila mu kwifula kwakwe kutali kuli ho, togohe atizigela umo wa mu bingʼwe uyo walebaga kwingila mu kwifula kwakwe.

² Iki nghana na biswe twali tulomelwa evangeli giti boi: aliyo mhayo uyo bali bigwa gwali gutubabelela, iki gwali gutusanjiwa na kuzunya mu benabo abali bugwigwa.

³ Iki biswe aba twazunije twingila mu kwifula kwenuku; gitumo akahaya giki, Gitumo nali nilahila mu bupelanu wane giki, batalingila mu kwifula kwane; aliyo milimo yali yamalwa kufuma kubumva kwa si.

⁴ Iki ngʼwipande limo akaluhaya lushiku lwa mpungati giki, Mulungu akifula lushiku lwa mpungati mu milimo yakwe yose;

⁵ Na ngʼwipande ili hangi giki, Batalingila mu kwifula kwane.

⁶ Kuhva iyo, gutali guli ho mhayo uyu giki, bali ho abigelile kwingila mo, na benabo abali bulomelwa evangeli kwandia bali batingila mo kuhva bukitigwa wabo.

⁷ Huna utuula ho hangi lushiku lulebe, uhaya muli Daudi hanuma ya ikanza itale giki, Lelo, gitumo yali yuhayiwa kale giki, Lelo, ulu mukwigwa ilaka lyakwe, mutizuganghanaja ngholo jingʼwe.

⁸ Iki ulu Yoshua ni wali ubinha kwifula, ni walatahayile lushiku lungi hangi.

⁹ Kulwa iyo kwifula kutali kuli ho ku banhu ba Mulungu.

¹⁰ Iki uyo wingila mu kwifula kwakwe, ngʼwene wamala kwifula mu milimo yakwe, gitumo Mulungu akifula mu yakwe.

¹¹ Kulwa iyo, tukomelage kwingila mu kwifula kwenuko, munhu ose atizugwa mu kwikola kwa bukitigwa giti ubo.

¹² Iki mhayo gwa Mulungu guli mpanga na gwa nguzu; hangi guli na buugi kutinda lilushu lya bungi bubili, gukuchimaga kushisha kukomanya bupanga na moyo, hangi bulungilo na mhongo, hangi guli ngʼwangu kugitegeleja maganiko na iyo ngholo itogilwe.

¹³ Hangi kiti ho kisengʼwa ikibisile mu miso gakwe: aliyo shinhu shose shili duuhu, hangi shakundulwa mu miso ga Ngʼwenuyo, Uyo ali nonja wa mihayo yiswe.

Kristo ali ngabiji ntale

¹⁴ Kulwa tuli na ngabiji ntale, uyo wiingila ngʼwigulu, ngʼwene Yesu, Ngʼwana wa Mulungu, tumiilage no kutambula kwa kuzunya kwiswe.

¹⁵ Iki tuti na ngabiji ntale Uyo atudula kutusatwa mu mabugokolo giswe: aliyo Uyo wali ugengʼwa mu mihayo yose giti biswe, aliyo walati na shibi.

¹⁶ Kulwa iyo, twegele na bugimu kwisumbi lya kigongo, twinhiwe kuchilwa kigongo, hangi tuhone kigongo cha kutugunana ngʼwikanza lya kugayiwa.