Bahebrania 3 - Ilagano Ipya Lya

Kristo ali ntale kutinda Musa

¹ Kulwa iyo, badugu bela, abadimanije mu kwitanwa kwa ngʼwigulu, ngʼwudedekanyagi Ntungʼwa na Ngabiji ntale wa kutambula kwiswe, ngʼwene Kristo Yesu;

² Uyo wali ngʼwishigwa kuli Ngʼwenuyo waantuula ho, gitumo Musa nanghwe walali ngʼwishigwa mu numba yakwe yose.

³ Iki Wei waabalwa igelelilwe ikujo itale kutinda Musa, gitumo uyo uzenga numba ali na ikujo itale kutinda numba:

⁴ Iki buli numba yaazengwra na munhu, aliyo uyo waazenga shinhu shose ngʼwene Mulungu.

⁵ Na Musa nghana walali ngʼwishigwa mu numba yakwe yose giti nonja, abize bukaniji wa ku mihayo iyo iyali ya kuhayiwa hanuma;

⁶ Aliyo Kristo ali ngʼwishigwa giti ngʼwana ntale wa mu numba yakwe; nayo numba yakwe ha biswe, ulu tukumiila bugimu wiswe na kukumilija kwa kwisagilwa kwiswe kushisha ku nghalilo.

Abalema kwigwa, na balambu ba moyo, bahugulwa

⁷ Kulwa iyo, gitumo Moyo Ngʼwela waahaya, giki, Lelo ulu mukwigwa ilaka lyakwe,

⁸ Mutizuganghanaja ngholo jingʼwe, giti ngʼwikanza lya bulubi, gitumo mu lushiku lwa kugengʼwa mu bu:

⁹ Aho bakulugenji bingʼwe baanigemaga, bunipima, nabo bubona shitile shane miaka makumi ane.

¹⁰ Kulwa iyo nali nusatiwa na kibyalilwe chenicho, nuhaya giki, Bakahubaga gwa mu ngholo jabo, na nzila jane batajimanile;

¹¹ Gitumo nali nilahila mu bupelanu wane giki, batalingila mu kwifula kwane.

¹² Ilanghanagi, badugu, itizubiza muli munhu ose wa mu bingʼwe ngholo ya bubi ya butuzunya ya kutala kwinga kuli Mulungu mpanga:

¹³ Aliyo ikomelejagi benekele na benekele buli lushiku, aho itali yuhayiwa giki, Lelo; atizuganghanajiwa nulu umo wa mu bingʼwe na bulembalembi wa shibi;

¹⁴ Iki twabiza abadimanile hamo na Kristo, ulu tubumiila wandijo wa kusanya kwiswe na budimu kushisha ku nghalilo:

¹⁵ Aho yuhayiwa giki, Lelo ulu mukwigwa ilaka lyakwe, mutizuganghanaja ngholo jingʼwe, gitumo ngʼwikanza lya bulubi.

¹⁶ Iki banani, aho bali bigwa, bunubya? Bali bati abo bose abali bufuma Misri hamo na Musa?

¹⁷ Na hangi ni banani aho wali usatiwa nabo miaka makumi ane? Bali bati abo abali bakenagula, abo mibimba yabo yali yugwa mu bu?

¹⁸ Hangi banani abo wali ubalahilila giki, batalingila mu kwifula kwakwe, ulu hali bati abo abali bulema kwigwa?

¹⁹ Na biswe twabona giki, bali batudula kwingila mo kulwa butuzunya wabo.