Bahebrania 2 - Ilagano Ipya Lya

Kwihiga kwa abatunzunya Yesu

¹ Kulwa nguno iyi shitwigelile kuyilanghana kutinda no mihayo iyo tuyigwa, tutizuyibitiila nulu kamo.

² Iki ulu mhayo ugwaahayiwa na bamalika gwali ndimu, na buli busobya na buli bakitigwa wali winhiwa nsango ugwigelile,

³ A biswe tulapila kinahe, ulu tutudilila bupiji butale giti ubu? Ubo wali wandia kuhayiwa na Seba, na waadimiwa ku biswe na benabo abigwile;

⁴ Mulungu nanghwe ukanila hamo nabo mu shimanikijo na sha kukumya, na mu shitile sha budula shingi na shingi, na mu kagabanhije ka Moyo Ngʼwela, gitumo atogilwe Wei ngʼwenekele.

I nguno ya kwidokeleja kwa ngʼwa Yesu

⁵ Iki ku bamalaika atisugigije si iyahaya kwiza, iyo tukuyihayaga.

⁶ Aliyo umo akakanila hape halebe, uhaya giki, Munhu ali ki, Bebe ungʼwizukwe? nulu ngʼwana wa munhu nanghwe ki, Bebe ungenihe?

⁷ Bebe ukangʼwita ndo, akililwe na bamalaika ikanza ido; waanzwika ngikili ya ikujo na kukumilijiwa, waantuula ho kushisuga Shitwa sha makono gako;

⁸ Waashisugija shose hasilili ya ma gula gakwe. Na kulwa nguno akashisugija shose hasilili yakwe, atashilekelaga kinhu nulu kimo ikitasugijiwe. Aliyo tutali kubona shinhu shose shisugigije hasilili yakwe.

⁹ Aliyo twamona Yesu Uyo wali witwa akililwe na bamalaika ikanza ido, kulwa nguno ya kuluhaluhiwa kwa kucha, waazwalichiwa ngikili ya ikujo na kukumilijiwa; giki, kulwa kigongo cha Mulungu shingʼwigelile kuloja kucha kulwa buli munhu ose.

¹⁰ Iki yali ingʼwigelile Wei, Uyo shinhu shose shili ho kulwakwe, hangi shinhu shose shabiza ho muli Wei, aho wenha bana bingi ngʼwikujo, kunshikanya Ntongeji ntale wa bupiji wabo mu kuluhaluhiwa.

¹¹ Iki Uyo akwejaga na benabo abakwejiwagwa bose bali ba muli umo: kulwa mhayo uyu Wei atudingʼwa minala kubitana baduguye,

¹² Uhaya giki, Nakukomela lina lyako ku badugu bane. Nakukwimbila mu kulumba mugati ya kwibilinga.

¹³ Na hangi giki, Nakubyunsanya Wei. Na hangi giki, Lolaga, Nene ndi ho na bana abo Mulungu waaninha:

¹⁴ Nahene iki bana busangijiwa mu mili na mininga, Wei nanghwe giko ushidima isho giki, kulwa kucha ansupye uyo walali na budula wa kucha, ngʼwene Shetani;

¹⁵ Hangi abataligule abo bose baadimagwa mu busese kulwa kogoha kucha shiku jose ja bupanga wabo.

¹⁶ Iki walatukisola kitungilwe cha bamalaika aliyo akasola bubyile wa ngʼwa Abrahamu.

¹⁷ Kulwa iyo shali shingʼwigelile Wei kwikolanijiwa na baduguye mu mihayo yose, giki, abize ngabiji ntale wa kuchila kigongo na ngʼwishigwa mu mihayo ya kuli Mulungu, ite kihongelo kulwa shibi sha banhu.

¹⁸ Iki Wei ngʼwenekele wali uluhiwa na kugengʼwa, wadula kubaguna abakugemagwa.