Bahebrania 13 - Ilagano Ipya Lya

Iyo ibigelile bazunya kwita

¹ Kwitogwa kwa badugu kushinge ho.

² Mutiziba kubachumbela bageni; iki mu mhayo uyo bamo bali bubachumbela bamalaika na kumana yaya.

³ Bizukagwi abatungilwe, giti mutungilwe hamo na benabo; nabo abitilwa ya bubi, iki ningʼwe muli mu mili.

⁴ Butoji bukujiwe na banhu bose, na ndalo itizusosohajiwa: iki bajingi na bashihya Mulungu akubalekanya nsango.

⁵ Mutizubiza na shikalile sha butogwa wa feza; muzunye kwigelelwa na isho muli nasho: iki Wei ngʼwenekele wahaya giki, natalakuleka welelo bose nulu kukulekanija yaya.

⁶ Kulwa iyo, twagima kuhaya giki, Seba ali ngunani wane, natalogoha; munhu alanitila ki?

⁷ Bizukagwi abo abali basugi bingʼwe, abumuwila mhayo gwa Mulungu; idedekanyagi kakalikile ka kashiminzile kabo, londelagi kuzunya kwabo.

⁸ Yesu Kristo igolo, na lelo hu na neʼwene, na kushisha welelo na welelo.

⁹ Mutizuhumbulwa na kalangile kangi na kangi na kageni; iki ili ya wiza ngholo ijamiwe na kigongo; iti kulwa shiliwa, isho abo abali bushitumamila batabonile solobo moi.

¹⁰ Biswe tuli na ngʼwalilo, abo abakinhilijaga ihema batuzunilijiwa kulya shago.

¹¹ Iki mibili ya mitugo iyo, mininga gajo genhwa ngʼwipande lyela na ngabiji ntale kulwa nguno ya shibi, mibili yajo ikapembagwa hanze ya nghambi.

¹² Kulwa nguno iyo Yesu nanghwe wali uluhiwa hanze ya mita, giki, abeje banhu na mininga gakwe ga ngʼwenekele.

¹³ Kulwa iyo tujagi kuli Wei hanze ya nghambi, tukubuche kusondagulwa kwakwe.

¹⁴ Iki kunu tuti na nzengo gwa kushinga ho, aliyo twagukoba uyo uguliza.

¹⁵ Muli Wei tufunye gwa kitambo cha kulumba kuli Mulungu, gene matwajo ga milomo iyo ikulikumilijaga lina lyakwe.

¹⁶ Aliyo mutiziba kwita ya wiza na kugaba shikolo: iki shitambo shenisho shikunyejaga Mulungu.

¹⁷ Bigwagi abo abamusuga, mubalyehele: iki boi bakwikalaga miso kulwa bupanga wingʼwe giti banhu abatukija kubujiwa butumami wabo, bashoshe mashosho na buyegi, iti mu bupina; iki ulu yubiza chene itumubelela.

Ya kumalija

¹⁸ Tulombelagi: iki twazunya giki, tuli na wiyanguji wa wiza, tutogilwe kwikala na kashiminzile ka wiza mu mihayo yose.

¹⁹ Na nene nangʼwikumbilija kutinda no kwita giko, giki, nashoshiwe wangu ku bingʼwe.

²⁰ Hambunyu Mulungu wa mhola Uyo waangʼwenha hangi kufuma mu bafu Seba wiswe Yesu, u ndimi ntale wa ngholo, kulwa mininga ga ilagane lya welelo na welelo,

²¹ Amushikanye bingʼwe mu buli mhayo gwa wiza kwita iyo atogilwe, ite mu bingʼwe iyo ya wiza mu miso gakwe muli Yesu Kristo; ikujo libize kuli Wei welelo na welelo. Amina.

²² Nangʼwikumbilija bingʼwe, badugu, gwiyumilijagi mhayo uyu gwa kuganikila: iki nangʼwandikila bingʼwe mihayo mido.

²³ Managi giki, ndugu wiswe Timoteo wamala kutungulilwa; ulu wiza wangu, tukwibona ningʼwe tuli nanghwe.

²⁴ Nigisijagi bose abamusuga, na bela bose. A ba Italia bamugisha.

²⁵ Kigongo kibize hamo na bingʼwe bose. Amina.