Bahebrania 12 - Ilagano Ipya Lya

Yesu ali ntale na nshikilija wa kuzunya kwiswe

¹ Kulwa iyo na biswe, iki tupindiwa na ilunde itale giko lya bakaniji, tuzule buli kinhu ichatudidohya, na bubi ubututaligija wangu, tupele na kwiyumilija mu kwishiganilwa ukwatuulwa ho ku butongi wiswe,

² Tunolile Yesu u ntale na nshikilija wa kuzunya kwiswe, Uyo kulwa buyegi ubo wali butuulwa ho ku butongi wakwe, ugwiyumilija nsalaba, udalaha minala, na wiigasha ku nkono gwa bulyo gwa isumbi lya butemi i lya Mulungu.

Abayugulwa bakomelejiwa

³ Kulwa iyo ngʼwidedekanyagi Uyo wali wiyumilija mu buhalali butale ubu wali uhalalijiwa na ba shibi, mutizudedeleha na kugwa ngholo mu mioyo yingʼwe.

⁴ Mutinita bulugu wa kuhangija shibi kushisha kwiita mininga;

⁵ Hangi ngʼwibile kuganikila ukukulungalungaga na bingʼwe giti na bana, giki, Ngʼwana wane, utizudalaha kutula kwa Seba, nulu utizugwa ngholo aho uhangʼwa nanghwe;

⁶ Iki uyo Seba antogilwe, hu ngʼwene akuntulaga, nanghwe akuntulaga buli ngʼwana uyo anzunije.

⁷ Iyumilijagi mu kutulwa; iki Mulungu akungʼwitilaga giti bana; iki ngʼwana ali he, uyo ise atantulaga?

⁸ Aliyo ulu muti na kutulwa, uko bose bakusangilile, numho muli bana ba nda ya bu, muti bana ba nghana.

⁹ Hangi, twali na basiswe ba mu mili abali bututula, twali tubakuja: angu, shitatwigelile kutinda kunyehela Siswe wa mioyo, na kwikala bapanga?

¹⁰ Iki nghana benabo bali bututula shiku ndo gitumo bali bubona chiza boi benekele: aliyo Wei kulwa solobo yiswe, giki, twisangije mu wela wakwe.

¹¹ Hene, i haha kutulwa kose kutubalwa giki, guli mhayo gwa buyegi, aliyo gwa bupina; aliyo hanuma kutwaja gukubatwagija abo abulangwa nako matwajo ga mhola, gene butungilija.

¹² Kulwa iyo gololagi makono aganogolekile na mazwi agahamalalile;

¹³ Gabegejagi magulu gingʼwe nzila ngololoku, uyo ali nema atizinga mu nzila, aliyo hambuhambu apijiwe.

¹⁴ Kubijagi mhola na banhu bose, na wela ubo ulu munhu ati nabo atalamona Seba:

¹⁵ Langhanagi no munhu ose atizuleba mu kigongo cha Mulungu; itina lya bululu litizufuluma kumukoyakoya, na banhu bingi basosohajiwe nalyo;

¹⁶ Atizubiza ho njingi, nulu uyo atangʼogohaga Mulungu, giti Esau, uyo ujinja wingiji wakwe wa kwandia kubyalwa kulwa nguno ya kiliwa kimo.

¹⁷ Iki mumanile giki, hanuma yaho, aho walatogilwe kwingila mu lubango lwenulo, ulengʼwa; iki walatubona hangi ngʼwanya gwa koya, nulu wali ulukoba no na shisoji.

Bazunya bati mu ya kale, bali na shipya

¹⁸ Iki mutashikile ku lugulu ulwadula kukuumiwa, ulubaka moto, nulu ku buupi, na giiti, na nyaga ntale no,

¹⁹ Na kulila kwa ipembe, na ilaka lya mihayo; nose abali bigwa ilaka lyenilo bikumbilija giki, mhayo uyo gutizuhayiwa kubo hangi;

²⁰ Iki bali batudula kwiyumilija na mhayo uyo bulagilwa, Nulu ndimu ulu yulukuumya lugulu, yupondwa mawe nulu yuchingʼwa ichimu;

²¹ Iyo yali yilonga yali ili ya lyogohya no no no, nose Musa uhaya giki, Nogoha kutinda na kuzuguma:

²² Aliyo bingʼwe ngʼwaashika ku lugulu lwa Sayuni, na ku nzengo gwa Mulungu mpanga i Yerusalemi ya ngʼwigulu, na ku mabita agati na bubalilwe ga bamalaika,

²³ Na ku kwibilinga kutale na kanisa ya babyalwa ba kwandia bandikilwe ngʼwigulu, na kuli Mulungu Nekanya wa bose, na ku bupanga wa banhu batungilija abashikanile,

²⁴ Na kuli Yesu nsangija wa ilagane ipya, na ku mininga gusesebelwa agakuhayaga mihayo ya wiza kutinda ga ngʼwa Abeli.

Kakomelegeje ka kungʼwigwa Uyo akuhayaga

²⁵ Langhanagi mutizunema Uyo akuhayaga. Iki ulu benabo bali batupila abali bunema uyo wali uhaya mu si, kutinda no tutupila biswe ulu tungʼwinhila ngongo Uyo waahaya ku biswe kufuma ngʼwigulu;

²⁶ Uyo ilaka lyakwe lyali lyuzugumya si lushiku lwenulo: aliyo haha wiisagija uhaya giki, Lukangala lungi hangi natalizugumya si gwike, aliyo na igulu nalyo.

²⁷ Mhayo uyu, Lukangala lungi hangi, gulolecha kwinjiwa kwa isho shadula kuzugumiwa, giti shinhu shali shubejiwa, hunaho shinhu isho ishituzugumiwa shikale ho.

²⁸ Kulwa iyi, iki twinhiwa butemi ubutudula kuzugumiwa, tubize na kigongo, tumfunije Mulungu kalamije akantogije mu bulyehu na boba.

²⁹ Iki Mulungu wiswe ali moto ugukubugilijaga.