Bahebrania 10 - Ilagano Ipya Lya

¹ Iki shilagilo shene nengeji gwike gwa mihayo ya wiza iyuhaya kwiza, shiti lususo lwayo nghana, kulwa iyi shitambo shenisho shitudula na hado kubashikanya benabo abakwegelaga kushitambila gwa gwa gwa buli ngʼwaka.

² Ulu ni ili giko, angu ni bali batoya kushifunya? Iki abalamya, aho bamala kwejiwa lukangala lumo, ni bali batudidohiwa hangi wiyanguji wabo na shibi.

³ Aliyo mu shitambo shenisho kuli ho kwizukija kwa shibi buli ngʼwaka.

⁴ Iki itudulika mininga ga nzagamba na ga mbuli kwinja shibi.

⁵ Kulwa iyi aho wiza mu si uhaya giki, Shitambo na sha kufunyiwa utashitogilwe, aliyo wanibegegije mili;

⁶ Kufunya kwa kupemva na kufunya kwa shibi utuyejiwagwa nasho.

⁷ Hunaho Nene nali nuhaya giki, Lolaga, (mu bulingilo wa kitabo nandikililwe giki,) nizaga kwita iyo utogilwe, Mulungu.

⁸ Aho wamala kuhaya iyi giki, Shitambo na kufunya na kufunya kwa kupemva na kufunya kwa shibi utushitogagwa, nulu utuyejiwagwa nasho (isho ishafunyiwagwa gitumo kalagilile ka shilagilo kali),

⁹ Hunaho akahaya, Lolaga, nizaga kwita iyo utogilwe Bebe. Wali winja i cha kwandia, akidimye i cha kabili.

¹⁰ Mu iyo atogelilwe Wei tweejiwa kulwa kufunyiwa kwa mili gwa ngʼwa Yesu Kristo lukangala lumo gwike.

¹¹ Hangi buli ngabiji akwimilaga buli lushiku akinhilijaga na akafunyaga shitambo shenisho duhu nghangala ningi, isho ishitudula na hado kwinja shibi.

¹² Aliyo Ngʼwenuyo, aho waamala kufunya kitambo kimo cha welelo na welelo kulwa shibi, wiigasha ku nkono gwa bulyo gwa Mulungu,

¹³ Kufuma henaho akulindilaga kushisha banishi bakwe batuulwe kubiza ipandilo lya magulu gakwe.

¹⁴ Iki kulwa kufunya kumo waabashikanya welelo bose benabo abakwejiwagwa.

¹⁵ Na Moyo Ngʼwela nanghwe akutukanilaga; iki hanuma ya kuhaya giki,

¹⁶ I lyene ilagane ilo nakubeja nabo hanuma ya shiku jenijo, uhaya Seba; nakushituula shilagilo shane mu ngholo jabo, na mu maganiko gabo nakushandika;

¹⁷ Na shibi shabo na buhunga wabo natalashizukwa hangi na hado.

¹⁸ Iki aho kuli ho kulekejiwa kwa ishi, kutalabiza ho hangi kufunya kulwa shibi.

Bazunya badula kungʼwegela Mulungu kulwa mininga gakwe

¹⁹ Kulwa iyi, badugu, iki tuli na bugimu wa kwingila ngʼwipande lyela kulwa mininga ga ngʼwa Yesu,

²⁰ Mu nzila iyo waatubegeja mhya na mhanga, iyubita ngʼwiselema i lyene mili gwakwe;

²¹ Na hangi tuli na ngabiji ntale uwasuga numba ya Mulungu;

²² Twegele na ngholo ya nghana mu bushikanu wa kuzunya, na ngholo jiswe jaasesebelwa twinge mu wiyanguji wa bubi, na mibili yiswe yojiwa na minzi mela,

²³ Tumiilage kutambula kwa kwisagilwa kwiswe kutizulelengeta; iki Wei ali ngʼwishigwa uwatwisagigije;

²⁴ Hangi twidedekanyagi benekele na benekele, twilishe nghali mu butogwa na mu Shitwa sha wiza;

²⁵ Tutizuleka kwibilinga hamo, gitumo chimile cha bangi umo kili, aliyo twikomeleje benekele na benekele; kutinda no, iki ngʼwabona lushiku lwenulo lukwegelaga.

Abatawatawa mu mihayo ya Mulungu bahugulwa

²⁶ Iki ulu twita shibi na makala hanuma ya kuwanukula bumani wa nghana, kitusaga ho hangi kitambo kulwa shibi,

²⁷ Aliyo kulolela kwa lyogohya kwa nsango, na bukali wa moto ubulabalya banishi.

²⁸ Uyo wali udalaha shilagilo sha ngʼwa Musa wali ucha atuchilwa kigongo kulwa bukaniji wa bakaniji babili nulu badatu:

²⁹ Ngʼwiganika kinahe, gutangʼwigelile nsango ntale no kutinda, uyo waampanda Ngʼwana wa Mulungu na magulu gakwe, hangi ubala mininga ga ilagane ayo wejiwa nago giki, gati kinhu, hangi undalaha Moyo wa kigongo?

³⁰ Iki tumanile Wei uwaahaya giki, Kuhwima njigu kwene kwane, Nene nakukuula. Na hangi giki, Seba ala-balekanya nsango banhu bakwe.

³¹ Guli mhayo gwa boba no kugwa mu makono ga Mulungu Uyo ali mpanga.

³² Aliyo izukagwi shiku ja kwandia aho ngʼwali ngʼwandia kwelelwa, ngʼwali ngʼwiyumilija mu wilwisha butale wa kuluhiwa:

³³ Ipande limo ngʼwali ngʼwilolelwa mu kusondagulwa na kuluhiwa; na ipande lingi ngʼwali ngʼwisangija na benabo abali bitwa giko:

³⁴ Iki ngʼwali ngʼubasatwa benabo abali butungwa, hangi mukazunya na kuyega kusonzwa shikolo shingʼwe, iki mumanile bingʼwe benekele giki, muli na sabo ja wiza kutinda ngʼwigulu, i ja kushinga ho.

³⁵ Kulwa iyi mutizuponya bugimu wingʼwe, ubo ubuli na mhela ningi.

³⁶ Iki shingʼwigelile kubiza na kwiyumilija giki, aho ngʼwamala kwita iyo Mulungu atogilwe, mubone iyo ngʼwisagijiwa.

³⁷ Iki kasaga ho kakanza kado gwike, U ngʼwizi aliza, na ataladila.

³⁸ Nahene ntungilija alikala mpanga kulwa kuzunya: aliyo uwishishimulwa, bupanga wane buti na buyegi nanghwe.

³⁹ Aliyo tuti benabo abishishimulwa kushika mu kujimila, aliyo tuli benabo abali na kuzunya kushika mu bupiji wa bupanga.