Bahebrania 1 - Ilagano Ipya Lya

Butale wa Seba Yesu Kristo

¹ Mu mapande mingi na mu nzila ningi Mulungu, mu shiku ja kale, waalungalungaga ku bakulugenji mu bahangi,

² Uyo mu mhelo ya shiku iji waalungalunga na biswe muli Ngʼwana wakwe, Ngʼwenuyo waantuula ho kubiza ngʼwingiji wa shinhu shose, hangi muli Wei akabeja si jose;

³ Uyo Ngʼwene kwaka kwa ikujo lyakwe, hangi ali suso ya bu-Mulungu wakwe gitumo ali, hangi akumiichaga shinhu shose kulwa mhayo gwa budula wakwe, Uyo aho wali wamala kubeja kegeje ka shibi shiswe Wei ngʼwenekele, wiigasha ku nkono gwa bulyo gwa Butale wa magaka ngʼwigulu;

Kristo ali ntale kutinda bamalaika

⁴ Waabejiwa wabakilile no bamalaika, iki wiingila mu lina lya ikujo kutinda boi.

⁵ Iki Mulungu akangʼwila malaika nani nulu lukangala lumo giki, Bebe uli Ngʼwana wane, Nene nakubyalaga Bebe lelo iyi? na hangi giki, Nene nakubiza Ise kuli Wei, nanghwe akubiza Ngʼwana kuli Nene?

⁶ Na hangi aho wali wenha Ngʼwana ntangi mu si, uhaya giki, Bamalaika bose ba Mulungu banamye.

⁷ A bamalaika waabahaya giki, Ubabeja bamalaika bakwe kubiza mioyo, na batumami bakwe kubiza lulali lwa moto:

⁸ Aliyo Ngʼwana unghaya giki, Isumbi lyako lya butemi, Ee Mulungu, lyene lya welelo na welelo: nanga gwa butungilija gwene nanga gwa butemi wako.

⁹ Bebe ukabutogagwa butungilija, hangi ukabukolagwa buhunga; kulwa nguno iyi Mulungu, Mulungu wako, wakwitiilile Bebe maguta ga buyegi kutinda biyo.

¹⁰ Hangi giki, Bebe Seba, kwandia na kwandia ukatuula ho musingi gwa si, igulu nalyo lili milimo ya makono gako.

¹¹ Shenisho shilashila; aliyo Bebe ukubizikala ho; nasho shose shilakuluhala giti kizwalo;

¹² Hangi ulashilinga giti ngʼwenda gwa kwigumiila, nasho shilagaluchiwa; aliyo Bebe uli gitumo uli, na miaka yako italakalika.

¹³ Aliyo Wei akangʼwila malaika nani nulu lukangala lumo giki, Igashaga ku nkono gwane gwa bulyo kushisha nubatuula banishi bako kubiza ipandilo lya magulu gako?

¹⁴ Angu, benabo bose bati mioyo ya butumami, iyatungʼwa kubinhilija benabo abahaya kubiza bingiji ba bupiji?