Bagalatia 3 - Ilagano Ipya Lya

Kwinhiwa kwa Moyo Ngʼwela kuli ho kulwa kuzunya gwike

¹ Bingʼwe Bagalatia, aba muti na masala, nani wali umuloga muleke kuyigwa i nghana, bingʼwe aba Yesu Kristo waatendwa mu butongi wingʼwe giki, akomilwe?

² Natogilwe munitegeleje mhayo uyo gumo duhu giki, u Moyo ngʼwaangʼwanukula kulwa Shitwa sha shilagilo nulu kulwa kwigwa kwa kuzunya?

³ Ni buli ngʼwabuuliha giko? Mukandia mu Moyo, haha lulu mutogilwe kushikanyiwa mu ki-mili?

⁴ Himba ngʼwali ngʼuluhiwa mihayo mingi giko dalali? ulu nghana ili dalali.

⁵ Ali Uyo akumugabilaga bingʼwe u Moyo, na kwita shamahano mu bingʼwe, himba akwitaga giko kulwa Shitwa sha shilagilo, nulu kulwa kigwile ka kuzunya?

⁶ Gitumo Abrahamu waanzunya Mulungu, hu kwene ubalilwa butungilija.

Kukomolwa mu kizumo cha shilagilo kuli ho kulwa kuzunya gwike

⁷ Kulwa iyo managi giki, abali ba kuzunya, ha bene bali bana ba ngʼwa Abrahamu.

⁸ Na Shandikwa, iki shali shatonga kubona giki, Mulungu akubatungiligija bana mahanga kulwa kuzunya, shunomela Abrahamu evangeli kale, shuhaya giki, Muli bebe mahanga gose galasungulilwa lubango.

⁹ Giko nabo abali ba kuzunya binhiwa lubango hamo na Abrahamu uwali na kuzunya.

¹⁰ Iki abo bose abali ba Shitwa sha shilagilo basugilwe na izumo: iki yaandikwa giki, Wazumagwa buli munhu uyo atukomela mu mihayo yose iyaandikwa mu kitabo cha shilagilo, kwiyita.

¹¹ Ali mhayo uyu gumanikile hape giki, ati ho munhu uyo utungiligijiwa mu butongi wa Mulungu kulwa shilagilo: iki, U ntungilija alikala mpanga kulwa kuzunya;

¹² Na shilagilo shitiziilile mu kuzunya, aliyo, Uyo akashitaga akubiza mpanga musho.

¹³ Kristo waatukomola ngʼwizumo lya shilagilo, iki akabiza izumo kulwiswe, iki yaandikwa giki, Wazumagwa buli munhu uwasungwa ha linti.

¹⁴ Giki, u lubango lwa ngʼwa Abrahamu lushike ku bana mahanga muli Kristo Yesu; giki, twinhiwe kwisagija kwa Moyo kulwa kuzunya. U kwisagija kwali kutinjiwa na shilagilo

¹⁵ Badugu, nalihaya ki-munhu, giki, nulu ilagane libize lili lya munhu duhu, aliyo ulu lyamala kudimiwa, ati ho munhu walyita hubiza dalali, nulu kulyongegeja mhayo.

¹⁶ Kwisagija kuhayiwa kuli Abrahamu na ku bubyile wakwe. Walatuhaya giki, ku babyalwa, giti bali bingi; aliyo giti umo giki, Na kuli myalwa wako, ngʼwene Kristo.

¹⁷ Iyo ndihaya ili giki, Ilagane ilyali lyatonga kudamiwa na Mulungu, i shilagilo ishali shiza hanuma ya miaka magana ane na makumi adatu, shitudula kulyinja ilagane, nulu kwita kwisagijiwa kubize dalali,

¹⁸ Iki ulu wingiji bufuma mu shilagilo, butufuma hangi mu kwisagijiwa: aliyo Mulungu akangʼwinha Abrahamu u wingiji mu kwisagijiwa.

Nimo gwa shilagilo

¹⁹ Kulwa iyo, shilagilo shili ki? Shali shongegejiwa kulwa nguno ya bukenaguji, kushisha aliza u myalwa Uyo wali winhiwa kwisagijiwa, nasho shulagilwa na bamalaika mu nkono gwa nsangija.

²⁰ Ali u nsangija ati nsangija wa umo; aliyo Mulungu ali umo.

²¹ Angu, shilagilo shili na wilwisha na kwisagija kwa Mulungu? Nulu na hado yaya: iki ulu ni shali shubiza ho shilagilo ishadula kwinha bupanga, nahene butungilija ni wali bufuma mu shilagilo.

²² Aliyo Shandikwa shuyilugalila yose mu busugwa wa shibi, giki, a bazunya binhiwe kwisagija kulwa kuzunya kwa muli Yesu Kristo.

²³ Aliyo kuzunya aho kwali kutali kwiza, twali tulindwa na shilagilo, twali tulugalilwa kushisha kwize kuzunya u kwali kwahaya kukundulilwa hanuma.

²⁴ Giko shilagilo shabiza nangi wiswe kutwenha kuli Kristo, giki, twitwe kutungiligijiwa mu kuzunya.

²⁵ Aliyo haha iki kuzunya kwamala kwiza, tutasugilwe hangi na nangi.

Kugaluka kubiza bana ba Mulungu kuli ho kulwa kuzunya gwike

²⁶ Iki bingʼwe bose muli bana ba Mulungu kulwa kuzunya kwa muli Kristo Yesu.

²⁷ Iki bingʼwe bose abo ngʼubatigijiwa muli Kristo, ngʼwanzwalile Kristo.

²⁸ Umo ati ho hangi Nyudaya nulu Ngriki, ati ho nsese nulu ngʼwana wa banhu, ati ho ngosha nulu nkima, iki bingʼwe bose muli umo muli Kristo Yesu.

²⁹ Na ulu muli ba ngʼwa Kristo, nahene muli bubyile wa Abrahamu na bingiji gitumo u kwisagija umo kuli.