Bafilipi 4 - Ilagano Ipya Lya

Mihayo ya Euodia na Suntoke

¹ Kulwa iyo badugu bane batogwa na bakumbulwa bane, aba muli kuyega kwane, na ngikili yane ya ikujo, handikilagi giko muli Seba, batogwa bane.

² Nangʼwikumbilija Euodia, hangi nangʼwikumbilija Suntoke giki, babize na iganiko limo muli Seba.

³ Ali chene, nakwikumbilija nu bebe ntumami ngʼwichane nghana, bagunanage bakima benabo, iki bakakoyela hamo na nene mu evangeli kihamo nu Klementi na batumami bichane bangi, abo mina gabo gali mu kitabo cha bupanga.

⁴ Yegagi muli Seba gwa, nahaya hangi, Yegagi.

⁵ Bufula wingʼwe bamanike ku banhu bose. Seba ali hihi.

⁶ Mutiziganilija mu mhayo gose; aliyo mu buli mhayo mumanyage Mulungu iyo mutogilwe mu kulomba, na kwikumilija na kulumba,

⁷ Na mhola ya Mulungu iyikilile kwitegeleja kose, ikukingitila ngholo jingʼwe na maganiko gingʼwe muli Kristo Yesu.

⁸ Ya kumalija, badugu, mihayo yose iyili ya nghana, mihayo yose iyili ya ishima, mihayo yose iyili ya butungilija, mihayo yose iyili miela, mihayo yose iyitogije, na mihayo yose iyili ya lukumo lwa wiza; ulu buli ho bugalili, ulu guli ho mhayo gose gwa kukumilijiwa, idedekanyagi mihayo yeniyi.

⁹ Mihayo iyo ngʼwali ngʼwilanga, na kuyanukula, na kuyigwa, na kuyibona kuli nene, iyitagi yeniyo; na Mulungu wa mhola akubiza hamo ningʼwe.

Paulo ubalumba kulwa cha kwinha chabo kuli wei

¹⁰ Aliyo nali nuyega no muli Seba iki kwiganika kwingʼwe kuli nene kwajukaga hangi, hene ngʼwali ngʼunizukwa aliyo ngʼwali muti na ngʼwanya.

¹¹ Iti giki, ndihaya kulwa kugayiwa: iki nimaniligije kwigelwa na isho ndi nasho.

¹² Namanile kudohelwa, namanile hangi nu kukwililwa; mu chikalile chose na mu mihayo yose naalangwa kwiguta nu kutuba, hangi kukwililwa nu kugehelwa.

¹³ Nene nadula kwita yose muli Kristo Uyo akuniguzuhaja.

¹⁴ Aliyo ngʼwali ngʼwita chiza no kusangila mu kuluhiwa kwane.

¹⁵ Bingʼwe Bafilipi mumanile ningʼwe giki, mu kwandia kwa evangeli aho nali ninga Makedonia, yali iti ho kanisa yingi iyali yusangila na nene mu mhayo gwa kufunya na kwanukula, aliyo bingʼwe bike;

¹⁶ Iki nu mu Thesalonika, nu kwene ngʼwali ngʼunitumila hangi na hangi kulwa kugayiwa kwane.

¹⁷ Iti giki, ndikoba cha kwinhiwa, aliyo nakoba matwajo gongeje kubalilwa ha lwande lwingʼwe.

¹⁸ Aliyo nene ndi nasho sha kutugela na kutinda hoi: nokaiile, naanukula kuli Epafrodito isho shali shufuma ku bingʼwe, shili ngʼwaso gwa kunungha chiza, na kitambo chazunilijiwa, cha kunyeja Mulungu.

¹⁹ Na Mulungu wane akungʼwinha bingʼwe buli kugayiwa kwingʼwe kose gitumo busabi wakwe ngʼwikujo umo buli muli Kristo Yesu.

²⁰ Hambunyu kuli Mulungu Siswe libize ikujo welelo na welelo. Amina. Kigisije

²¹ Nigisijagi ku buli ngʼwela muli Kristo Yesu. Badugu abali hamo na nene bamugisha.

²² Bela bose bamugisha, aliyo kutinda no ba ngʼwikulu lya ngʼwa Kaisari.

²³ Kigongo cha Seba wiswe Yesu Kristo kibize hamo na mioyo yingʼwe. Amina.