Bafilipi 3 - Ilagano Ipya Lya

Butungilija wa shimile wene dalali

¹ Huna lulu, badugu bane, yegagi muli Seba. Kungʼwandikila bingʼwe mihayo yeniyo ituninojaga, aliyo ku bingʼwe guli mhayo gwa kumuhandikija.

² Ilanghanagi ku mva, ilanghanagi ku biiti ba ya bubi, ilanghanagi ku bichembi:

³ Iki tuli basalwa abakunamyaga Mulungu mu Moyo Ngʼwela, abakwikumiligijaga muli Kristo Yesu, abati na kwisagilwa mu mili:

⁴ Aliyo nene nadula kuhimbila mu mili: ulu munhu ose wibona ali na nguno ya kuhimbila mu mili, nene natindile:

⁵ Nakasalwa lushiku lwa kanane, ndi wa ihanga lya Israeli, wa mu luganda lwa Benyamini, ndi Nghebrania wa Bahebrania; mu mihayo ya shilagilo nali ndi Mfarisayo;

⁶ Mu bukomezu nuyinyajanyaja kanisa, mu butungilija ubulagililwe mu shilagilo, nali nati na kilingo. Paulo wilecha yose kulwa nguno ya kumana Kristo

⁷ Aliyo mihayo iyo iyali ili ya solobo kuli nene, i yene nuyibala ili dalali kulwa ngʼwa Kristo.

⁸ Ali chene, nene nayibala yose ili dalali kulwa nguno ya bugalili wa kumana Kristo Yesu Seba wane, Uyo kuhvakwe nazunya kwilecha mihayo yose, na kuyibala ya mapalala duhu, giki, nampandike Kristo;

⁹ Hangi nilonge muli Wei, nati na butungilija wane wa ngʼwenekele, ubufumile mu shilagilo, aliyo ubo ubukupandikagwa mu kuzunya ukuli muli Kristo, u butungilija ubufumile kuli Mulungu kulwa kuzunya;

¹⁰ Namane Wei, na budula wa bujuko wakwe, na kusangila kwa mu kuluhiwa kwakwe, nikolanijiwe na kucha kwakwe;

¹¹ Giki, ulu yadulika nashike mu bujuko wa mu bafu.

Paulo uhahalila kuyipandika iyo witanilwa

¹² Iti giki napandikile, nulu giki, nashikanile, aliyo nakukubilijaga giki, nakayidime iyo kulwa nguno yayo nane naadingʼwa na Kristo Yesu.

¹³ Badugu, natibalaga ngʼwenekele giki, namala kudima, aliyo nakwitaga mhayo gumo giki, nakwibaga mihayo ya kunuma, nakuyinanamilaga iyili ku butongi,

¹⁴ Nakugangilaga nashikile ku ngelelo ya sha kwinhiwa sha kwitanwa kutale kwa Mulungu muli Kristo Yesu.

¹⁵ Ali lulu, biswe abo tuli bashikanu tubize na iganiko ilili chene: na ulu mu mhayo gose muli na iganiko lingi, nahene Mulungu akumukundulila nu gwene:

¹⁶ Aliyo, umo twagelela, tushiminzilage mu chanda chenicho duhu.

Bujigajiga wa Bakristo buli ngʼwigulu

¹⁷ Badugu, bizagi balondeji bane, balolagi abakushiminzaga giko gitumo mukutubonaga tuli kalolelo ka kashiminzile.

¹⁸ Iki bingi bakushiminzaga, abo nakamuwilaga nghangala ningi, ni haha namuwila nu kulila shisoji giki, a bene banishi ba nsalaba gwa ngʼwa Kristo:

¹⁹ Abo nghalilo yabo kuyagala, mulungu wabo nda jabo, ikujo lyabo lili mu minala yabo, bakuyiganikaga ya si.

²⁰ Iki bujigajiga wiswe buli ngʼwigulu, kufuma kwene tunindilile u Mpija Seba Yesu Kristo:

²¹ Uyo alagalucha mili gwa budohelejiwa wiswe, gwikolanijiwe na mili gwakwe gwa ikujo; gitumo nguzu ijo umo jili, ijo wadula kushilyehya shinhu shose shingʼwigwe.