Bafilipi 2 - Ilagano Ipya Lya

Bazunya babize gitumo ali Yesu

¹ Kulwa iyo ulu kuli ho kuganikilwa kose muli Kristo, ulu kulungujiwa kose kwa butogwa, ulu kusangila kose kwa Moyo Ngʼwela, ulu kisa na wisatwi,

² Kokalilijagi kuyega kwane giki, mubize na ngholo imo, na butogwa wenubo duhu, ngʼwigwindanije, mubize ba moyo gumo;

³ Mutizita mhayo gose mu halali nulu kwikumilija dalali, aliyo mu widoheleja wa ngholo, buli munhu angʼwiganike ngʼwiye ali wa wiza kutinda wei ngʼwenekele;

⁴ Buli munhu mu bingʼwe atizudilila yakwe duhu, aliyo buli munhu ayidilile ni ya bangi.

Kwidohya na kugunguhiwa kwa ngʼwa Yesu

⁵ Bizagi na iganiko ili mu bingʼwe, ilyubiza muli Kristo Yesu:

⁶ Uyo nulu walali mu suso ya Mulungu, walatidedekanya giki, a kalenganilile kakwe na Mulungu guli mhayo gwa kumiila,

⁷ Aliyo akigayisha ikujo lyakwe, na uzwala suso ya kisese, na akabejiwa mu kikolele ka banhu;

⁸ Na aho ubonwa ali mu suso ya banhu, akidohya ngʼwenekele na ubiza nyehu nulu kushisha mu kucha, hu kwene kucha kwa ha nsalaba.

⁹ Kulwa iyo Mulungu akangunguhya no, na ungʼwinha i lina ilikilile mina gose;

¹⁰ Giki, ku lina lya ngʼwa Yesu buliizwi lilatuja, lya shibumva ishili ngʼwigulu, nulu ishili mu si, nulu ishili hasilili ya si,

¹¹ Na buli lulimi lulatambula giki, Yesu Kristo ngʼwene Seba, kwikujo lya Mulungu Ise.

Katumamile ka mu bupiji

¹² Kulwa iyo batogwa bane, gitumo ngʼwali mulyehela na kale, iti aho nali ndi ho gwike, aliyo kutinda no i haha aho nene nhi ko, tumamagi kushikilija bupimi wingʼwe mu kogoha na kuzuguma,

¹³ Iki ali Mulungu Uyo akutumamaga mu bingʼwe kulagila na kwita iyo atogilwe Wei.

¹⁴ Itagi mihayo yose muti na kuduguma nulu halali;

¹⁵ Mubize muti na kilingo nulu buhwiganu, mubize muli bana ba Mulungu, abati na buka hagati ya kibyalilwe ichigomagomile na kitigwa, mubo bingʼwe mukwakaga mu si giti sonda;

¹⁶ Mukolechaga mhayo gwa bupanga giki, nabize nago gwa kwikumilija, mu lushiku lwa ngʼwa Kristo giki, natupelaga dalali nulu natutumamaga dalali.

¹⁷ Ali chene, nulu nutambilwa ha kitambo na kwinhilija sha kuzunya kwingʼwe, nahene nuyega, hangi nayegela hamo na bingʼwe bose:

¹⁸ Na bingʼwe hangi giko, yegagi, na muyegelage hamo na nene.

Paulo utuma nhungʼwa amane mhola yabo

¹⁹ Aliyo nisagilwa muli Seba Yesu kumutumila Timoteo wangu, nalungujiwe aho numana mhola yingʼwe umo muli.

²⁰ Iki nati na munhu ungi wa kiganikile kamo na nene, uyo wei ngʼwenekele akumudilila gete.

²¹ Iki bose bakalalilwe shabo sha benekele, iti sha ngʼwa Yesu Kristo.

²² Aliyo bingʼwe mumanile kukanilwa kwakwe giki, gitumo ngʼwana akatumamilaga ise, giko wei akutumamaga hamo na nene mu nimo gwa evangeli.

²³ Kulwa iyo nisagilwa kuntuma uyu, aho nalamanaga iyo ilanigwila;

²⁴ Aliyo nisagilwa muli Seba giki, natudila kwiza nene ngʼwenekele.

²⁵ Aliyo nali nubona inigelile kumutumila ndugu wane Epafrodito, ntumami ngʼwichane na nshilikale ngʼwichane, na ntungʼwa wingʼwe na ngʼwinhilija wa mu kugayiwa kwane.

²⁶ Iki wei wali umukumbula no bingʼwe bose na hangi walali na bupina, iki ngʼwali mungʼwigwa giki, asatile;

²⁷ Na nghana walasatile hihi kucha, aliyo Mulungu akanchila kigongo; nulu iti wei wike aliyo nu nene, natizubiza na bupina hangi na hangi.

²⁸ Kulwa iyo niyanguhilijaga kuntuma giki, muyege aho mukwibona nanghwe, hangi nane bupina wane bugehe.

²⁹ Kulwa iyo, ngʼwegelejagi muli Seba na kuyega kose, na mubinhe ishima abali chene:

³⁰ Iki kulwa nguno ya nimo gwa ngʼwa Kristo walali hihi kucha, walatubudilila bupanga wakwe, ashikilije iyo iyali yuleba mu kwinhilija kwingʼwe kuli nene.