Bafilipi 1 - Ilagano Ipya Lya

Ya kubagisha

¹ Paulo na Timoteo, basese ba ngʼwa Yesu Kristo, ku bela bose muli Kristo Yesu abali mu Filipi kihamo na balindi na binhilija.

² Kigongo kibize ku bingʼwe na mhola, ishufuma kuli Mulungu Siswe, na kuli Seba wiswe Yesu Kristo. Kulumba kwa ngʼwa Paulo na kulomba kwakwe

³ Nanumba Mulungu wane, buli aho nakungʼwizukagwa,

⁴ Gwa mu buli kulomba kwane kulwingʼwe bose, nakulombaga na buyegi,

⁵ Kuhva nguno ya kusangila kwingʼwe mu nimo gwa kuyitangʼanhya evangeli kufuma lushiku aho mukandia kushisha haha;

⁶ Mhayo uyu nasanije giki, Wei Uyo waandia kwita nimo gwa wiza mu mioyo yingʼwe, alagumalija kushisha ku lushiku lwa ngʼwa Yesu Kristo:

⁷ Gitumo igelile kuli nene nangʼwiganike bingʼwe bose chene, iki bingʼwe muli mu ngholo yane, iki mu butungwa wane na mu nimo gwa kuyilwilila evangeli na kuyidimya, bingʼwe bose ngʼwasangila na nene mu kigongo iki.

⁸ Iki Mulungu ali nkaniji wane, gitumo nakumukumbulilaga bingʼwe bose mu moyo gwa ngʼwa Yesu Kristo.

⁹ Uku kwene kulomba kwane giki, butogwa wingʼwe wiyongeje kukwila no mu bumani bose na mu kwitegeleja kose giki,

¹⁰ Muyizunilije mihayo iyili ya wiza; mubize ababonwa hape bali bela, abati na kwipamya kushisha ku lushiku lwa ngʼwa Yesu Kristo;

¹¹ Ngʼokajiwe na matwajo ga butungilija, agabiza ho kuhva Yesu Kristo, kwikujo na kukumilijhva kwa Mulungu. Buyegi wa ngʼwa Paulo mu kuluhiwa kwakwe

¹² Aliyo badugu bane, natogilwe mumane giki, i mihayo iyali yunigwila, yabyagi ya kukwilikanya evangeli;

¹³ Nose butungwa wane muli Kristo wigengelekile ngʼwikulu lya Kaisari na mu bangi bose;

¹⁴ Na bingi ba badugu abali muli Seba butimbiwa ngholo kuhva butungwa wane, babiza na bugimu no kutinda kuhaya mhayo gwa Mulungu bati na boba.

¹⁵ Bangi hene, bakulomelaga ya ngʼwa Kristo kuhva wilu na wilwisha; aliyo bangi kuhva butogwa gete;

¹⁶ Bangi bakulomelaga ya ngʼwa Kristo kulwa butogwa iki bamanile giki, nene natuulwa ho kuhva kwilwilila i evangeli;

¹⁷ Aliyo bangi bakulomelaga ya ngʼwa Kristo mu shiki, iti mu nghana, biganika kunongegeja buluhi ku butungwa wane.

¹⁸ Mhayo guli ho? yaya, leke Kristo alomelwe mu nzila jose, nulu mu wibeleja, nulu mu nghana nahene naliyega mu yeniyi, na hangi nakuyega.

¹⁹ Iki namanile giki, mhayo uyu gulanigalukila kubiza bupiji wane, kuhva kulomba kwingʼwe na kugabihva kwa Moyo wa ngʼwa Kristo Yesu,

Kuhahalila na kukumbula kwa ngʼwa Paulo

²⁰ Gitumo kuhahalila kwane na kwisagilwa kwane giki, nataladingʼwa minala mu mhayo gose, aliyo gitumo kale, giko ni haha, Kristo akukumiligijiwa mu mili gwane na butimbu bose, nulu ibize mu nzila ya kwikala mpanga, nulu mu nzila ya kucha.

²¹ Iki kuli nene u kulama kwene Kristo, na kucha kwene solobo.

²² Aliyo ulu nakulama mu mili, hu gwene matwajo ga milimo yane; aliyo gwa kusola himba nasole ki, natamanile.

²³ Iki nashitilijiwa hagati ya mihayo iyi ibili, ndi na nghumbu kuja kubiza hamo na Kristo; iki hu gwene guli gwa wiza kutinda:

²⁴ Aliyo kushinga mu mili, gwene gwigongile kutinda kulwa nguno yingʼwe.

²⁵ Nene ndi na kwisagilwa uku, namanile giki, nakwikala na nakushinga hamo ningʼwe bose kumusegeja, muyege mu kuzunya;

²⁶ Gild, kwikumilija kwingʼwe muli Kristo Yesu kulwane kukwile, ulu nalize hangi ku bingʼwe. Kusangila mu kuluhiwa kulwa nguno ya evangeli

²⁷ Aliyo kashiminzile kingʼwe kabize gitumo kayigelelilwe evangeli ya ngʼwa Kristo giki, nulu niza kwibona ningʼwe, nulu nukija, nahene, nigwe nghulu jingʼwe giki, mukuhandikilaga mu moyo gumo, mukukulwililaga kuzunya kwa mu evangeli na ngholo imo;

²⁸ Hangi mutogohiwa na banishi bingʼwe mu mhayo gose; ku benabo mhayo uyu guli kimanikijo ikili hape cha kuyagala, aliyo ku bingʼwe guli kimanikijo cha bupiji ubufumile kuli Mulungu;

²⁹ Iki bingʼwe ngʼwinhiwa kulwa nguno ya ngʼwa Kristo, iti kuzunya gwike, aliyo hangi nu kuluhiwa kulwa nguno yakwe:

³⁰ Iki muli na wilwisha wenubo duhu ubo mukabubona kuli nene, na haha ngʼwigwa giki, ndi nabo.