Baefeso 6 - Ilagano Ipya Lya

¹ Bana, balyehelagi babyaji bingʼwe muli Seba; iki mhayo uyo gutungiligije.

² Bakujage so na noko; iki chene kilagilo cha kwandia ikili nako kwisagija,

³ Giki, ibize mhola kuli bebe, hangi ubize wa kulama shiku ningi ha si.

⁴ Na bingʼwe bababa, mutizubapelanya bana bingʼwe; aliyo mubakugije mu kahugulile na kaganikilile ka Seba.

⁵ Basese, balyehelagi baseba bingʼwe ba ki-mili, na boba na kudetema, mu bulyehu wa ngholo jingʼwe, gitumo kuli Kristo;

⁶ Iti mu katumamile ka kubonwa na miso, gitumo bayeja ba banhu; aliyo gitumo basese ba ngʼwa Kristo, mubizita kufuma mu ngholo iyo Mulungu atogilwe;

⁷ Mutumame na ngholo niza gitumo kuli Seba, iti ku banhu;

⁸ Iki mumanile giki, buli mhayo gwa wiza uyo munhu waagwita, u gwene alinhiwa hangi kufuma kuli Seba, nulu ali nsese nulu ngʼwana wa banhu.

⁹ Na bingʼwe baseba, bitilagi nabo giko, muleke kubakanga; iki mumanile giki, Seba wingʼwe, hangi wabo, ali ngʼwigulu, na kubasolanya banhu kuti ho muli Wei.

Bulugu wa bazunya

¹⁰ Haha lulu, badugu bane, bizagi ba budula muli Seba, na mu makaya ga nguzu jakwe.

¹¹ Zwalagi shilanga shose shigima sha Mulungu, mudule kuhandikila, kugahangija masalasala ga Shetani.

¹² Iki kulwa kwiswe tutalwaga na mili na mininga, aliyo na mabutale, na mabusugi, na batemi ba giiti cha ikanza ili, na mabita ga ki-moyo ga buhunga mu kikalile ka ngʼwigulu.

¹³ Kulwa iyo manulagi shilanga shose shigima sha Mulungu, mudule kuhangija mu lushiku lwa buhunga, na aho ngʼwamala kwita yose, kuhandikila.

¹⁴ Nahene handikilagi lulu, abo ngʼwitungile mikimbili yingʼwe na nghana, na muzwalile cha mu kikuba, chene butungilija.

¹⁵ Na ngʼwitungile magulu gingʼwe na kubejabejiwa kwa evangeli ya bupiji ya mhola:

¹⁶ Kutinda yose manulagi lumuda lwa kuzunya, nalo muladula bujimya masonga gose ga moto ga uyo mi.

¹⁷ Hangi anukulagi ngofila ya bupiji, na lilushu lya Moyo, lyene mhayo gwa Mulungu;

¹⁸ Mu nzila ya kulomba kose na kwikumbilija kose, lombagi buli ikanza mu Moyo, hangi ikalagi miso mu mhayo uyu gete mu kwiyumilija kose na kwikumilija kose kulwa bela bose;

¹⁹ Munilombelage nene giki, ninhiwe kuhaya, nasamye nomo gwane kumanicha na bugimu u kwigeniha kwa evangeli ya bupiji.

²⁰ Iyo kulwayo nene ndi nanghani mu nyololo; muyo nahaye na bugimu, gitumo shinigelile kulungalunga.

²¹ Aliyo bingʼwe ngʼwitegeleje mihayo yane umo ili, iyo nakwitaga, Tukiko, ndugu ntogwa na ngʼwinhilija ngʼwishigwa muli Seba, alamumanikija bingʼwe mihayo yose:

²² Uyo naantuma ku bingʼwe kulwa mhayo uyu duhu, mumane mihayo yiswe, hangi amulunguje ngholo jingʼwe.

²³ Mhola ibize ku badugu, na butogwa hamo na kuzunya, kufuma kuli Mulungu Siswe, na Seba Yesu Kristo.

²⁴ Kigongo kibize hamo nabo bose abantogilwe Seba wiswe Yesu Kristo mu nghana. Amina.