Baefeso 5 - Ilagano Ipya Lya

(5) Bashiminze mu kwitogwa na wela

¹ Kulwa iyo bizagi balondeji ba Mulungu, gitumo bana batogwa;

² Hangi shiminzagi mu butogwa, gitumo nu Kristo nanghwe waamutogwa bingʼwe, na wiiyinha ko ngʼwenekele kulwa biswe, ubiza cha kwinha na kitambo kuli Mulungu, kulwa kubiza ngʼwaso gwa kunungha chiza.

³ Aliyo bujingi na ya busoso yose, nulu kwikumva shikolo shenishi shitizuhayiwa mu bingʼwe, gitumo ikubelaga mu a bela;

⁴ Nulu ya minala, nulu kuhoya kwa nyachiluchilu, nulu wimeji, yene itigelile; aliyo hambuhambu bulumbi.

⁵ Iki mumanile mhayo uyu giki, njingi, nulu munhu nsoso, nulu ngʼwikumva wa shikolo, hu na ngʼwene namya wa shikolile, ngʼwenuyo ati na wingiji mu butemi wa ngʼwa Kristo na Mulungu.

⁶ Munhu atizumulembalemba na mihayo iyili ya dalali; iki kulwa mihayo yeniyi bupelanu wa Mulungu bukubiziilaga bana ba bukitigwa.

⁷ Kulwa iyo mutizubiza ba kwisangija hamo nabo;

⁸ Iki kale ngʼwali muli giiti, aliyo haha muli isana muli Seba; shiminzagi gitumo muli bana ba isana.

⁹ (Iki matwajo ga isana gali mu wiza bose na butungilija na nghana),

¹⁰ Mubone kumana iyo iyili ya kunyeja Seba;

¹¹ Mutizita busangi na shitile sha giiti ishitatwajaga matwajo, aliyo hambuhambu shihamagi;

¹² Iki ili ya minala nulu kuyihaya mihayo ikwitagwa nabo mu kwigeniha.

¹³ Aliyo mihayo yose aho yuhangʼwa, yigengelechiwa na isana: iki yose iyo ikwigengelechaga mihayo yene isana.

¹⁴ Kulwa iyo uhaya giki, Mishaga, bebe ulishutula, na jukaga kufuma mu bafu, huna Kristo akukwakila bebe.

¹⁵ Kulwa iyo ilanghanagi chiza umo mukushiminzilaga, iti gitumo abati na masala, aliyo gitumo abali na masala;

¹⁶ Mubizukomola ikanza, iki shiku iji jili ja buhunga.

¹⁷ Kulwa mhayo uyo mutizubiza bachiluchilu, aliyo abo mukwitegelejaga iyo Seba atogilwe.

(6) Bizulwe na Moyo Ngʼwela

¹⁸ Hangi mutizukolwa na minzi ga mizabibu, iki mugo kili mo kikoji; aliyo ngʼwizulwe na Moyo;

¹⁹ Ngʼwilunjalunjage benekele na benekele mu zaburi na mimbo, na kwimba kwa ki-moyo, ngʼwimbage na kugongola mu ngholo jingʼwe kuli Seba;

²⁰ Munumbage gwa Mulungu Ngʼwene Siswe kulwa mihayo yose, mu lina lya Seba wiswe, Yesu Kristo.

(7) Biyitile benekele na benekele ya wiza

²¹ Ngʼwilyehelage benekele na benekele mu lyogohya lya ngʼwa Kristo.

²² Bakima ilyehyagi ku bagoshi bingʼwe, gitumo kuli Seba.

²³ Iki ngoshi ali ntwe gwa nkima gitumo Kristo ali ntwe gwa kanisa, Wei ngʼwenekele ali Mpija wa mili.

²⁴ Aliyo gitumo kanisa inyehelile Kristo, giko bakima babize ku bagoshi babo mu mihayo yose.

²⁵ Bagosha mubatogagwe bake bingʼwe, gitumo nu Kristo nanghwe waayitogwa kanisa, na wiiyinha ko ngʼwenekele kulwayo,

²⁶ Ayikomanye heke, iki waamala kuyeja na kogeje ka minzi mu mhayo,

²⁷ Ayenhe kuli Wei ngʼwenekele, kanisa ya ikujo, iyiti na kabado nulu wikunakuni nulu kinhu chingi giti isho; aliyo ibize nela, na buka nduhu.

²⁸ Giko hangi shibigelile bagosha kubatogwa bake babo giti mibili yabo benekele. Uyo untogwa nke wakwe ngʼwenekele witogwa ngʼwenekele.

²⁹ Iki ati ho munhu uyo ukolwa mili gwakwe ngʼwenekele; aliyo ugulisha na ugulinda gitumo Kristo akuyilindaga kanisa;

³⁰ Iki tuli mabudika ga mili gwakwe, ga nofu yakwe na ga maguha gakwe.

³¹ Kulwa mhayo uyu munhu akubaleka ise na nina, na akudimana na nke wakwe; nabo bubili wabo bakubiza mili gumo.

³² Cha kwigeniha iki kili kitale: aliyo nalihaya mihayo ya kuli Kristo na ya ku kanisa.

³³ Nahene buli munhu antogwe nke wakwe ngʼwenekele, gitumo witogwa ngʼwenekele; na nkima nanghwe angʼogohe ngoshi wakwe.