Baefeso 4 - Ilagano Ipya Lya

Kashiminzile ha bazunya (1) Balondele bamo wa Moyo

¹ Kulwa iyo nene ntungwa muli Seba nangʼwikumbilija bingʼwe giki, Mushiminzage gitumo ikudalaga kwitanwa uko ngʼwiitanilwa mo,

² Na bulyehu bose na bufula, na kwiyumilija, ngʼwikondelile benekele na benekele mu butogwa;

³ Mukomelage kutinda bumo wa Moyo mu katutigile ka mhola.

⁴ Gwene mili gumo, na Moyo umo, chene gitumo bingʼwe ngʼwiitanwa mu kwisagilwa kumo kwa kitanilwe kingʼwe;

⁵ Seba umo, kuzunya kumo, kubatija kumo,

⁶ Mulungu umo na Siswe wa bose, Uyo ali higulya ya bose, akwitaga mu bose, na ah mu bingʼwe bose.

(2) Batumamile sha kwinhiwa shabo

⁷ Aliyo buli umo wa mu biswe wiinhiwa kigongo, gitumo ili ngelekelo ya cha kwinha cha ngʼwa Kristo:

⁸ Kulwa iyo wahaya giki, Aho wiinunga ngʼwigulu ubatwala badingʼwa abali budingʼwa, nanghwe ubinha banhu sha kwinha.

⁹ (Aliyo mhayo uyu, wiinunga, guli kinahe, ulu guti giki, Wei wali wika tame kwingila mu mabudika ga hasilili ga mu si.

¹⁰ Ngʼwenuyo uwali wika ali Uyo wiinunga higulya kukila igulu lyose, Wei okale mu shinhu shose.)

¹¹ Nanghwe ubinha bamo, batungʼwa; na bamo, bahangi; na bamo, balomeji ba evangeli ya bupiji; na bamo, badimi ba kanisa na balangi;

¹² Kulwa kubashikanya bela; kushika mu nimo gwa kwinhilija, mili gwa ngʼwa Kristo guzengwe;

¹³ Kushisha biswe bose tulashikila mo mu bumo wa kuzunya, na wa bumani bushikanu wa Ngʼwana wa Mulungu, kushisha tubiza ngosha akulile gete, kushisha tushika mu ngelekelo ya butale wa kokala kwa ngʼwa Kristo:

¹⁴ Giki, kufuma lelo tutizubiza banigini, ababuchabuchiwa na kutwalatwalwa kunu na kunu na buli nyaga gose gwa kalangile, mu masalasala ga banhu, mu butegitegi, kulwa kalondelele ka bulembalembi,

¹⁵ Aliyo tubize tukuhayaga i ya nghana mu butogwa, tukuliile muli Wei mu mihayo yose, Uyo ngʼwene ntwe, Kristo;

¹⁶ Kufuma muli Wei mili gose gulilunganyiwa chiza na kudimanyiwa hamo, mu nzila ya bugunani wa buli bulungilo, gitumo katumamile kali ka ngelekelo ya buli ibudika lyose, mili gukiyongejaga kukula kushika mu kwizenga gwenekele mu butogwa.

(3) Bashiminze gitumo hali banhu bapya muli Kristo

¹⁷ Nahene nahaya mhayo uyu, hangi nakanila muli Seba giki, kufuma haha mutizushiminza gitumo bana mahanga bangi bakushiminzaga, mu budoshi wa iganiko lyabo,

¹⁸ Biitihva giiti mu kwitegeleja kwabo, bikomanije kule na bupanga wa Mulungu, kulwa butumana ubuli mo mubo, kulwa bugunu wa ngholo jabo,

¹⁹ Benabo iki boya kusatwa mu mioyo yabo, biyiinha ko benekele ku wimilizu, kulwa kwita kwa busoso bose mu kwikumva shikolo.

²⁰ Aliyo bingʼwe mutalangilwe ya ngʼwa Kristo giko;

²¹ Ulu nghana ngʼwamala kwigwa na kulangwa muli Wei, gitumo nghana ili muli Yesu;

²² Giki, mu mihayo ya chimile chingʼwe cha kale munzule munhu nkulukulu, uyo akubolaga gitumo kwikumva kwa bulembalembi umo kuli;

²³ Hangi giki, mudoganyiwe bapya mu moyo gwa iganiko lyingʼwe.

²⁴ Hangi munzwale munhu mpya uyo waasengʼwa mu kungʼwikola Mulungu mu butungilija na wela wa nghana.

²⁵ Kulwa iyo, iki ngʼwaazula bulomolomo, hayagi ya nghana buli munhu na nzenganwa ngʼwiye; iki tuli mabudika ga benekele na benekele.

²⁶ Pelanagi, aliyo mutizita shibi; mutizulizunilija limi kumulokela mu bupelanu wingʼwe.

²⁷ Nulu mutizungʼwinha Shetani ngʼwanya.

²⁸ Ngʼwenuyo akibaga, atiziba hangi; aliyo hambuhambu ite milimo, atumamage na makono gakwe iyo ya wiza, abize nasho sha kungʼwinha uyo ali na kugayiwa.

²⁹ Mhayo gose gose gwa malofu gutizufuma mu nomo gwingʼwe, aliyo uyo gwa wiza gwa kuzenga gitumo kugayiwa umo kuli, gubinhe kigongo abakwigwaga. (4) Batizumpinihaja Moyo Ngʼwela

³⁰ Na mutizumpinihaja Moyo Ngʼwela wa Mulungu, muli Wei ngʼwaatuulilwa lumengho kushisha lushiku lwa kukomolwa.

³¹ Bululu bose, na budaki, na bupelanu, na buyombo, na buduki, shenisho shinjiwe ho mu bingʼwe, hamo na isubi lyose:

³² Bizagi na kigongo benekele na benekele, ngholo niza, ngʼwikuulilwe benekele na benekele, gitumo Mulungu waamukuulilwa bingʼwe muli Kristo.