Baefeso 2 - Ilagano Ipya Lya

Bakristo gitumo hali bati kale nu shibi

¹ Nanghwe waamugalucha kubiza bapanga, abo ngʼwali muli bafu kulwa mabusobya gingʼwe na shibi shingʼwe,

² Musho ngʼwali ngʼushiminza kale gitumo ikanza umo lili lya si iyi, gitumo ali u ntale wa busugi wa mu miuyi ya higulya, ngʼwene moyo uyo akutumamaga haha mu bana ba bukitigwa:

³ Mu benabo na biswe bose twali twikala bapanga kale mu kwikumva kwa nhungwa ya ki-mili gwiswe, twali tubyita katogelwe ka nhungwa ya kimili na maganiko, hangi twali tuli bana ba bupelanu mu kitungilwe, gitumo na bangi:

Bakristo gitumo hali haha kulwa kigongo

⁴ Aliyo Mulungu, iki ali nsabi mu kuchila kigongo, kulwa butogwa wakwe wingi ubo waatutogwa nabo,

⁵ Aho twali tuli bafu mu mabusobya giswe, waatugalucha kubiza bapanga hamo na Kristo (ngʼwaapijiwa na kigongo),

⁶ Hangi utujucha hamo nanghwe Yesu, na utwigasha hamo nanghwe mu kikalile ka ngʼwigulu muli Kristo Yesu;

⁷ Giki, mu makanza agahaya kwiza, Wei oleche busabi butale kutinda wa kigongo chakwe mu wiza wakwe ku biswe muli Kristo Yesu:

⁸ Iki ngʼwaapijiwa na kigongo mu nzila ya kuzunya, hangi iti kufuma mu bingʼwe benekele, ili cha kwinha cha Mulungu;

⁹ Iti kufuma mu Shitwa, munhu nulu umo atizikumilija.

¹⁰ Iki tuli milimo yakwe, abo twaasengʼwa muli Kristo Yesu twite shitile sha wiza, isho Mulungu ushimalila kale, tushiminze musho.

¹¹ Kulwa iyo ngʼwizukwe giki, bingʼwe abo ngʼwali muli bana mahanga kale mu nhungwa ya ki-mili, abitanwa batasalilwe na abo bitanwa basalwa mu mili, kusalwa ukubejiwa na makono;

¹² Giki, ngʼwikanza lyenilo ngʼwali muti na Kristo, ngʼwali muli bashomha kwihanga lya Israeli, na bageni ku malagane ga kwisagija, ngʼwali muti na kwisagilwa, hangi ngʼwali muti na Mulungu mu si umu.

¹³ Aliyo haha muli Kristo Yesu, bingʼwe abo ngʼwali muli kule na Mulungu kale, ngʼweegelejiwa mu mininga ga ngʼwa Kristo.

Bakristo a Bayudaya na bana mahanga bati mili gumo

¹⁴ Iki Wei ali mhola yiswe, Uyo waababeja bubili wabo kubiza bumo, hangi usambula isenge ilyali lyutukomanya.

¹⁵ Iki mu ki-mili chakwe waabugalucha kubiza dalali wanishi, u wene kilagilo cha malagilo mu isho shilagililwe, abaseme benabo babili muli Wei ngʼwenekele kubiza munhu umo mpya, giko ubeja mhola;

¹⁶ Nanghwe abasangije bubili wabo mu mili gumo kuli Mulungu mu nsalaba, iki waabubulaga wanishi mugo;

¹⁷ Nanghwe wiza ubyulomela mihayo ya mhola ku bingʼwe ngʼwali muli kule, na mhola kubo abali hihi:

¹⁸ Iki muli Wei biswe babili tuli na nzila yiswe ya kwingila kuli Siswe mu Moyo umo.

Bakristo hali hekalu ya Mulungu

¹⁹ Huna lulu muti bageni na bashomha haha, aliyo muli bazengi bichabo ba a bela, na muli ba mu kaya ya Mulungu,

²⁰ Ngʼwaazengwa ha musingi gwa batungʼwa na bahangi, Kristo Yesu ngʼwenekele ali iwe itale lya ha lungʼongo;

²¹ Muli Wei numba yose ngima yudimanyiwa chiza, ikongejaga kukula kubiza hekalu nela muli Seba;

²² Muli Wei hangi bingʼwe mulizengwa hamo, kubiza wikalo wa Mulungu mu Moyo.