Baefeso 1 - Ilagano Ipya Lya

Mbango ja ki-moyo ja Bakristo

¹ Paulo, ntungʼwa wa ngʼwa Yesu Kristo, mu iyo Mulungu atogilwe, ku bela abali ko mu Efeso, na ku bishigwa muli Kristo Yesu:

² Kigongo kibize ku bingʼwe na mhola kufuma kuli Mulungu Siswe, na Seba Yesu Kristo.

³ Akumilijiwe Mulungu, Ise wa Seba wiswe Yesu Kristo, Uyo waatusungulila buli lubango lose lwa ki-moyo mu kikalile ka ngʼwigulu muli Kristo:

⁴ Gitumo waatukoma muli Wei aho si itali kubumva, tubize bela, na abati na kilingo mu butongi wakwe mu butogwa;

⁵ Iki waatutuula ho biswe kufuma kale twitwe kubiza bana kuli Wei mu nzila ya Yesu Kristo, gitumo kuli kuyega kwakwe kwa iyo atogilwe,

⁶ Kulwa kulilumba i likujo lya kigongo chakwe, mucho waatwita bazunilijiwa muli Ntogwa:

⁷ Muli Wei tuli nako kukomolwa kwiswe mu mininga gakwe, kulekejiwa kwa mabusobya giswe, gitumo busabi wa kigongo chakwe umo buli,

⁸ Icho waatukwigija biswe mu masala gose na kwitegeleja kose.

⁹ Iki waatumanikija cha kwigeniha cha iyo atogilwe, gitumo kuli kuyega kwakwe, uko umalila muli Wei ngʼwenekele:

¹⁰ Giki, mu kalongeje ka bushikanu wa makanza, ashibilinge shinhu shose muli Kristo, shinhu ishili ngʼwigulu, i nasho ishili mu si; shose muli Wei;

¹¹ Hangi muli Wei twiinhiwa wingiji, iki twaatuulwa ho kufuma kale, gitumo kuli kumalila kwa Ngʼwenuyo, akutumamaga mihayo yose gitumo buli bupimi wa iyo atogilwe ngʼwenekele;

¹² Biswe aba twaandia kungʼwisagilwa Kristo, tubize ba kulilumba i likujo lyakwe:

¹³ Muli Wei bingʼwe hangi, aho ngʼwaagwigwa mhayo gwa nghana, evangeli ya bupiji wingʼwe, muli Wei: aho ngʼwaazunya, ngʼwaatuulilwa himengho lwa Moyo Ngʼwela wa kwisagija,

¹⁴ Ngʼwenuyo ali ngumili ya wingiji wiswe, kushisha kukomolwa kwa iyo yagulwa ya Mulungu, kulwa kulilumba i likujo lyakwe.

Gitumo Paulo ubalombela Bakristo

¹⁵ Kulwa mhayo uyo nu nene hangi, iki nigwile nghulu ja kuzunya muli Seba Yesu, uko muli nako na butogwa ubo muli nabo ku a bela bose,

¹⁶ Natukijaga kulumba kulwa; bingʼwe, hangi nakumuhayaga mu kulomba kwane giki,

¹⁷ Mulungu wa Seba wiswe Yesu Kristo, Siswe wa ikujo, angʼwinhe i bingʼwe moyo gwa masala na gwa i kukundula, mu kumana Wei,

¹⁸ Miso ga maganiko gingʼwe gitilwe isana kushisha ngʼwitegeleje giki, kwisagilwa kwa kwitana kwakwe gitumo kuli, busabi wa ikujo lya wingiji wakwe mu a bela gitumo buli,

¹⁹ Na hangi butale no wa budula wakwe gitumo buli wa ku biswe abazunya, gitumo katumamile umo kali ka makaya ga nguzu jakwe,

²⁰ Ako utumamila muli Kristo, aho waanjucha kufuma mu bafu, na ungʼwigasha ku nkono gwakwe gwa bulyo mu kikalile ka ngʼwigulu.

²¹ Higulya no kutinda buli butale bose, na busugi bose, na budula bose, na buseba bose, na buli lina lyose ililitanwa, iti ngʼwikanza ili duhu, aliyo hangi mu ilo lyuhaya kwiza:

²² Na ushituula ho shinhu shose hasilili ya bupandijo wakwe, hangi ungʼwinha kubiza ntwe higulya ya shinhu shose ku kanisa,

²³ Iyili mili gwakwe, kokala kwa Ngʼwenuyo akokalaga shose mu shose.