2 Yohana 1 - Ilagano Ipya Lya

Ya kubagisha

¹ Namhala kuli nkima nsolwa na bana bakwe, abo naabatogwa mu nghana; nulu iti nene wingʼwene, aliyo na benabo bose abayimanile i nghana;

² Kulwa nghana iyo ikwikalaga mu biswe, hangi ilabiza hamo na biswe welelo na welelo;

³ Kigongo, kuchila kigongo, na mhola ishufuma kuli Mulungu Siswe na kuli Seba Yesu Kristo, Ngʼwana wa Siswe, shikubiza hamo na biswe mu nghana na butogwa. Bazunya bashiminzile mu nghana

⁴ Nali nuyega no iki nubabona bamo ba mu bana bako bakushiminzaga mu nghana, gitumo twaanukula kilagilo kuli Siswe.

⁵ Na haha nakwikumbilija, mayu, iti giki, nakwandikila kilagilo kipya, yaya, aliyo icho tuli nacho kufuma kwandia giki, twitogwe.

⁶ Na ubu wene Mitogwa giki, tushiminze gitumo shilagilo shakwe shili. Uku kwene kulagila kwakwe giki, gitumo ngʼwigwa kufuma kwandia, mushiminze muko.

⁷ Iki balembalembi bingi bilongile mu si, abatutambulaga giki, Yesu Kristo wali wiza mu mili. Uyo ngʼwene nembalembi na ngʼwilwisha wa ngʼwa Kristo.

Bazunya bilalanghane, batizujimija cha kwinkwa

⁸ Ilalanghanagi benekele mutizujimija iyo ngʼwamala kwita, aliyo ngʼwanukule cha kwinhwa ikishikanile.

⁹ Uyu ose ukilanija na atikalaga mu kulanga kwa ngʼwa Kristo, ngʼwene ati na Mulungu. Uyo akwikalaga mu kulanga kwa ngʼwa Kristo, ngʼwene ali na Siswe na Ngʼwana.

¹⁰ Munhu ulu wiza ku bingʼwe, nanghwe atenha kulanga kwenuku, mutizungʼwegeleja mu numba yingʼwe, nulu mutizungisha:

¹¹ Iki uyo ungisha wisangija nanghwe mu Shitwa shakwe sha bubi.

¹² Nali ndi nayo mihayo mingi ya kungʼwandikila, natatogilwe kuyandika ha lubapula na wino: aliyo nisagilwa kwiza ku bingʼwe na kulungalunga ningʼwe nomo ku nomo, buyegi wingʼwe bushikilijiwe.

¹³ Bana ba ngʼwanongʼwingʼwe nkima nsolwa bakugisha. Amina.