2 Timoteo 4 - Ilagano Ipya Lya

Nimo gwa nangi nghana

¹ Nakulagila mu butongi wa Mulungu, na wa ngʼwa Kristo Yesu, Uyo alabalekanya nsango a bapanga na bafu mu kwilonga kwakwe na mu butemi wakwe;

² Lomelaga Mhayo, komelaga ngʼwikanza iligelile na ngʼwikanza ilitigelile; hugulaga, hamaga, ganikilaga mu kwiyumilija kose na kulanga.

³ Iki ikanza liliza aho balatema kalangile kabyedeku; aliyo gitumo kwikumva kwabo umo kuli balikwigija balangi abali na matu gababile;

⁴ Nabo balagagalucha matu gabo kwinga mu nghana, na balagalukila ngano ja bulomolomo.

⁵ Aliyo bebe lalanghanaga mu mihayo yose, iyumilijage mu kuluhiwa, itaga nimo gwa nomeji wa evangeli, shikilijaga kwinhilija kwako.

Nimo gwa ngʼwa Paulo guhaya kushila

⁶ Iki haha namalilile kufunyiwa giti kitambo, na ngelo ya kwinga kwane yegelaga.

⁷ Nakalwaga kulwa kwa wiza, namallle chanda chane, nakubaladile u kuzunya:

⁸ Haha lulu nabikililwe ngikili ya nyatemi ya butungilija, iyo Seba Nekanya ntungilija alaninha lushiku lwenulo; nulu iti nene gwike, aliyo benabo bose abakutogilwe kwilonga kwakwe.

⁹ Komelaga no kwiza kuli nene wangu:

¹⁰ Iki Dema akaniteka, uyitogwa si ya haha, nanghwe winga uja Thesalonika; Kreske waaja Galatia; Tito waaja Dalmatia.

¹¹ Luka wike ali hamo na nene. Ngʼwenhage Marko, wize hamo nanghwe; iki igelile ku butumami wane.

¹² Aliyo Tukiko nantumile Efeso.

¹³ I likoti lya mbeho ilo nakalileka Troa ha ngʼwa Karpo, aho uliza ulyenhage, na shitabo, na kutinda no sha makunza ga bunuke.

¹⁴ Aleksandro nsuji wa chuma chaza akanitila kibi no: Seba alampela gitumo shitwa shakwe umo shili:

¹⁵ Na bebe ilanghanage kuli ngʼwenuyo; iki wali ujija na nguzu mihayo yiswe.

¹⁶ Mu kushosha kwane kwa kwandia walati ho munhu nulu umo wa kwimila hamo na nene, aliyo bose bunilekanija: batizubalilwa kilingo kulwa mhayo uyu.

¹⁷ Aliyo Seba akanimiila, na akaniguzuhya; bulomeji butangʼanhe kulwa nene; na bana mahanga bose biyigwe: na nene nakapijiwa mu nomo gwa shimba.

¹⁸ Na Seba alanipija mu mhayo gose gwa bubi, hangi alanilinda kushisha mu butemi wakwe wa ngʼwigulu: kuli Wei libize ho ikujo welelo na welelo. Amina.

¹⁹ Nigisijage kuli Priska na Akula na kaya ya Onesiforo.

²⁰ Erasto wikala Korintho: aliyo Trofimo nakaneka Mileto asatile.

²¹ Komelaga no kwiza aho shiku ja mbeho jitali. Bakugisha Eubulu, na Pudene, na Linu na Klaudia, na badugu bose.

²² Seba Yesu Kristo abize hamo na moyo gwako. Kigongo kibize na bingʼwe. Amina.