2 Timoteo 3 - Ilagano Ipya Lya

Gitumo ilabiza mu shiku ja ku mhelo

¹ Hangi managa uyu giki, mu shiku ja ku mhelo, galiza makanza ga kwihiga.

² Iki banhu balabiza bitogilwe benekele, batogilwe sabo, bikumilija, badoshi, badalahi ba Mulungu, batubigwa babyaji babo, bati na kulumba, bati bela,

³ Bati na kwitogwa, babulagi ba bulagane, balembekeja, bati na kwilinda, bakali, babyedi ba ba wiza,

⁴ Bijomboki, balambu, bihayi, abatogilwe kwiyeja benekele kutinda kuntogwa Mulungu;

⁵ Bali na shimile sha wela, aliyo balema budula wakwe: abali giko isundage mubo.

⁶ Iki mu benabo bali mo abakushepaga kwingila mu manumba, na bubadima bakima bachiluchilu ababunwa na mashibi, abadutwa na kwikumva kungi na kungi,

⁷ Bakwilangaga gwa, nulu kushika mu kwitegeleja kwa nghana yaya.

⁸ Gitumo Yanne na Yambre bali bunghangija Musa, nabo chene balihangija i nghana; bali banhu bakenaguku mu masala gabo, batuzunilijiwa mu mihayo ya kuzunya.

⁹ Aliyo batongeja no; iki buchiluchilu wabo buligengeleka ku banhu bose, gitumo wa ba kale wali buli.

Gitumo Paulo walali mu nimo gwa Mulungu

¹⁰ Aliyo bebe ukalondelaga kulanga kwane, na kashiminzile, na kasolele, na kuzunya, na bulyehu, na butogwa, na kwiyumilija,

¹¹ Na kunyajanyajiwa, na kuluhiwa uku kwali kunigwila Antiokia, na Ikonio, na Lustra; makoye matale ayo nali nugiyumilija: aliyo Seba akanipija mu genayo gose.

¹² Chene na bose abatogilwe kwikala bela muli Kristo Yesu balabona kunyajanyajiwa.

¹³ Aliyo banhu ba bubi na balembalembi balongeja kukula mu bubi, balalembalemba, na balilemvalemva.

Shandikwa Shela na nimo gwasho

¹⁴ Aliyo bebe, ikalaga mu mihayo iyo wamala kulangwa na kwitegelejiwa, iki umanile uyo ukulanga umo ali;

¹⁵ Na hangi giki, kufuma mu buyanda wako umanile Shandikwa Shela, ishili na budula kukwinha masala kushika mu bupiji kulwa kuzunya ukuli muli Kristo Yesu.

¹⁶ Shandikwa Shela shose shiinhwa na miuyi ya Mulungu, shigelile ku nimo gwa kulanga, na kuganikila, na kuhugula bakenaguji, na kulela mu butungilija;

¹⁷ Munhu wa Mulungu abize nshikanu, amalililwe no ku nimo gose gwa wiza.