2 Timoteo 2 - Ilagano Ipya Lya

Nangi nghana gitumo ali

¹ Kulwa iyi, bebe ngʼwana wane, bizaga na nguzu mu kigongo ikili muli Kristo Yesu.

² Na mihayo iyo wiyigwa kuli nene mu bakaniji bingi, yeniyo ubinhe banhu bishigwa, abadula kubalanga bangi.

³ Iyumiilage hamo na nene mu kuluhiwa, giti nshilikale wa wiza wa ngʼwa Kristo Yesu.

⁴ Ati ho nshilikale uyo akwitaga bulugu, na hangi akwiyangayangilaga ngʼwenekele mu mihayo ya bupanga ubu; anyeje uyo uwali ungʼwandika kubiza nshilikale.

⁵ Na munhu ulu akukomelaga kulwa kuheba, atinhiwa ngikili ya ikujo numho akuhebelaga gitumo waalagilwa.

⁶ Nimi uyo akulimaga shingʼwigelile kubiza wa kwandia kulya matwajo.

⁷ Iyidedekanyage iyo nahaya; iki Seba alakwinha kwitegeleja mu mihayo yose.

⁸ Ngʼwizukagwe Yesu Kristo uwaajuchiwa mu bafu, wa bubyile wa ngʼwa Daudi, gitumo evangeli yane yuhaya;

⁹ Muyo niyumilija mu kuluhiwa, nose nushika mu butungwa giti ndi miliya; aliyo mhayo gwa Mulungu gutatungilwe.

¹⁰ Kulwa iyo niyumilija mu mihayo yose kulwa basolwa, nabo babone bupiji ubuli muli Kristo Yesu hamo na ikujo litalashila.

¹¹ Mhayo uyu gwene gwa wishigwa giki, Ulu twaacha hamo nanghwe, nahene tulabiza bapanga hamo nanghwe:

¹² Ulu twiyumilija, nahene tulasuga hamo nanghwe: ulu tunema Wei, nanghwe akutulema biswe:

¹³ Ulu tuti bishigwa, Wei akwikalaga ali ngʼwishigwa; atudula kwilema ngʼwenekele.

¹⁴ Ubizukije yeniyi, ubaganikilage mu miso ga Seba giki, batizuhalalila mu mihayo ya dalali iyo iti na solobo, aliyo yubahwiganya abiyigwa.

¹⁵ Komelaga kwiyolecha ngʼwenekele kubiza waazunilijiwa na Mulungu, u ntumami uyo ati na nguno ya kudingʼwa minala, uyo akutumamilaga wima mhayo gwa nghana.

¹⁶ Aliyo ihungage mu kalungalungile ka nyachiluchilu na ka dalali; iki kakwiyongejaga kukwija mu bubi,

¹⁷ Na mhayo gwabo gukulyaga giti ilonda, mu boi Humenayo na Fileto bali mo;

¹⁸ Abo bahubile kwinga mu nghana, bakuhayaga giki, kujuka kwamala kubita ho; bugalucha kuzunya kwa bamo.

¹⁹ Aliyo musingi gwa Mulungu guli ndimu, guli na kimanikijo iki giki, Seba abamanile abali bakwe: na hangi giki, Buli munhu ose uyo akulihayaga lina lya ngʼwa Kristo, ikomanye mu ya bubi.

²⁰ Aliyo mu numba nhale shiti mo shiseme sha zahabu na sha feza shike, aliyo hangi shili mo sha miti na sha mabumba; shingi shili na ikujo, na shingi shiti na ikujo.

²¹ Kulwa iyo, munhu ulu wiyeja na ubihunga benaba, alabiza kiseme cha ikujo, chejiwa, chigelile kuli Seba, ichabejiwa kulwa nimo gose gwa wiza.

²² Aliyo kupelage kwikumva kwa busumba, aliyo londelaga butungilija, kuzunya, butogwa, mhola, hamo nabo abakunililaga Seba mu ngholo yape.

²³ Aliyo mabugilijo ga buchiluchilu na ga butumana ihungage mugo, iki umanile giki, yombo yufuma mo.

²⁴ Na itangʼwigelile nsese wa Seba kubiza na yombo, aliyo abize mpolo ku banhu bose, amalilile kulanga, na ngʼwiyumilija,

²⁵ Mu bulyehu akubalangaga abo abihalalija nanghwe; hamo Mulungu abinhe koya babone kuyimana i nghana,

²⁶ Hangi babamuke, biyinje mu lubeto lwa ngʼwa Shetani, abagwashiwa nanghwe kwita iyo atogilwe wei.