2 Timoteo 1 - Ilagano Ipya Lya

Kugisha kwa ngʼwa Paulo

¹ Paulo, ntungʼwa wa ngʼwa Yesu Kristo, gitumo Mulungu atogilwe, gitumo kuli u kwisagija kwa bupanga ubuli muli Kristo Yesu,

² Kuli Timoteo, ngʼwana wane ntogwa no, Kigongo, na kuchila kigongo, na mhola, ishufuma kuli Mulungu na kuli Kristo Yesu Seba wiswe, shibize kuli bebe.

Paulo unkomeleja Timoteo

³ Nanumba Mulungu, Uyo nakantumamilaga kufuma mu baguku bane na wiyanguji wela giki, natukijaga kukwizukwa gwa mu kulomba kwane limi na bujiku;

⁴ Nakukumbulaga no kwibona nangho iki nashiganika shisoji shako, nokajiwe na buyegi;

⁵ Aho nizukwa kuzunya ukuti na wibeleja ukuli muli bebe, ukwali kwabiza muli mamayo Loisi kwandia, na muli noko Eunike, na hangi namanile nghana giki, nu muli bebe kuli mo.

⁶ Kulwa iyo nakwizukija giki, usosele cha kwinha cha Mulungu ikili muli bebe kulwa kutuulilwa makono gane.

⁷ Iki Mulungu atatwinhile moyo gwa kogoha, aliyo gwa budula, na gwa butogwa, na gwa kulingisila.

⁸ Kulwa iyi utizudingʼwa minala kulwa bukaniji wa Seba wiswe, nulu kulwa nene ntungwa wakwe; aliyo isangijage mu kululiiwa kwa mu evangeli, gitumo budula wa Mulungu umo buli;

⁹ Uyo waatupija, na utwitana na kwitana kwela, iti kulwa shitile shiswe gitumo shali shili, aliyo utwitana gitumo usola Wei ngʼwenekele, na gitumo kigongo chakwe umo kili, icho waatwinha muli Kristo Yesu aho si yali itali kubiza ho,

¹⁰ Aliyo haha yolechiwa hape kulwa kwilonga kwa Mpija wiswe Yesu Kristo, Uyo akajimija kucha, na welecha hape bupanga na butucha kulwa evangeli:

¹¹ Ku yeniyo nene naasolwa kubiza nomeji, na ntungʼwa, na nangi wa ku bana mahanga.

¹² Kulwa nguno iyo nakuluhaluhiwagwa mihayo iyi: aliyo natudingʼwa minala; iki namanile Uyo naanzunya, namanile nghana giki, Wei ali na budula kukilinda icho naabika kuli Wei kushisha lushiku ulo.

¹³ Umicliaga kalangile ka mihayo mipanga iyo wiyigwa kufuma kuli nene, mu kuzunya na mu butogwa ubuli muli Kristo Yesu.

¹⁴ Iyo ya wiza iyo waabikijiwa uyilinde mu Moyo Ngʼwela Uyo akwikalaga mu biswe.

¹⁵ Mhayo uyu umanile giki, bose abali mu Asia banilekaga; mu boi bali mo Fugelo na Hermogene.

¹⁶ Seba abachile kigongo ba mu numba ya ngʼwa Onesiforo, iki nghangala ningi waanifujaga, nulu walatudingʼwa minala kulwa nyololo gwane,

¹⁷ Aliyo aho walali mu Rumi akanikoba na bukomezu kushisha unibona.

¹⁸ Seba angʼwinhe kubona kuchilwa kigongo kwa Seba mu lushiku ulo; na hangi gitumo waaninhilijaga mu Efeso mu mihayo mingi, ni yene uyimanile.