2 Batesalonike 3 - Ilagano Ipya Lya

Paulo atogilwe kulombelwa; kasanije kakwe

¹ Ya kumalija, badugu, tulombelagi, mhayo gwa Seba gusambale wangu na kukujiwa gitumo gukukujiwagwa nu ku bingʼwe;

² Na hangi giki, tupijiwe mu banhu abali buyagabuyaga na ba bubi; iki iti bose bali na kuzunya,

³ Aliyo Seba ali ngʼwishigwa, Uyo akumulambya na kumukingitila muli ngʼwenuyo u mi.

⁴ Niswe tulinsanya Seba kulwingʼwe giki, mukwiyitaga iyo twaamulagila na hangi muliyita.

⁵ Seba amutongele ngholo jingʼwe mu butogwa wa Mulungu, na mu kwiyumilija kwa ngʼwa Kristo.

⁶ Aliyo twamulagila, badugu, mu lina lya Seba wiswe Yesu Kristo giki, ngʼwikomanye na buli ndugu ose uyo akushiminzaga buyagabuyaga, uyo atulondelaga kulanga uko ngʼwaanukula ku biswe;

⁷ Iki bingʼwe benekele mumanile gitumo shingʼwigelile kutulondela; iki biswe twali tutikala buyagabuyaga mu bingʼwe,

⁸ Nulu kulya twali tutable shiliwa sha munhu ose dalali, aliyo mu mamilimo na mu makoye limi na bujiku twali tutumama milimo, tutizunubyalubya munhu ose mu bingʼwe:

⁹ Iti giki, tuti na budula, aliyo kulwa kwiyita benekele kubiza chilolelo ku bingʼwe giki, mutulondele.

¹⁰ Iki nulu aho twali tuli ku bingʼwe tumulagila mhayo uyu giki, Ulu munhu atatogilwe kutumama milimo, nahene aleke nu kulya.

¹¹ Iki twigwile giki, bali ko banhu ku bingʼwe abali buyagabuyaga, batatumamaga milimo, aliyo bali bishatya.

¹² Ali lulu abali giko twabalagila na kubahugula muli Seba wiswe Yesu Kristo giki, butumame milimo yabo mu bulendu, babyulya shiliwa shabo benekele.

¹³ Aliyo bingʼwe badugu, mutizunoga kwita shitile sha wiza.

¹⁴ Na ulu munhu ali ho uyo walema kwigwa mhayo gwiswe gwa mu nyaluba iyi, kangukagi munhu ngʼwenuyo, nulu mutizisangija nanghwe, adingʼwe minala.

¹⁵ Aliyo mutizungʼwiganika ali ngʼwanishi, aliyo nghugulagi giti ndugu.

Kugisha kwa kumalija

¹⁶ Haha lulu Seba wa mhola ngʼwenekele angʼwinhe mhola shiku jose mu mihayo yose. Seba abize hamo ningʼwe bose.

¹⁷ Kugisha kwane nene Paulo na nkono gwane ngʼwenekele: iki chene kimanikijo cha buli nyaluba iyo nandika.

¹⁸ Kigongo cha Seba wiswe Yesu Kristo kibize hamo na bingʼwe bose. Amina.