2 Batesalonike 2 - Ilagano Ipya Lya

Iyo ilatonga aho Yesu atali kwiza

¹ Ali badugu, mihayo ya kwiza kwakwe Seba wiswe Yesu Kristo na kikumingile kiswe kuli Wei, twangʼwikumbilija giki,

² Mutizulelengetiwa wangu mukaleke kasanije kingʼwe, nulu kwibakijiwa nulu na moyo, nulu na mhayo, nulu na nyaluba giti yafumaga ku biswe ya kuhaya giki, lushiku lwa Seba lwashikaga lulu;

³ Munhu ose atizumulembalemba nulu mu nzila yose: iki lushiku lwenulo lutiza, ulu butandije kubiza ho tame bugomi; na munhu ngʼwenuyo wa shibi atendwe ali ngʼwana wa buyagaji,

⁴ Uyo uhangija na wigunguhya kushubukila shose ishikitanagwa Mulungu, nulu isho shikalamiwagwa kushisha nose wigasha mu hekalu ya Mulungu na wiyolecha ngʼwenekele giki, wei ali Mulungu.

⁵ Angu mutizukagwa giki, aho nali natali hamo ningʼwe, nakamuwila mihayo yeniyi?

⁶ Na haha mugumanile uyo ugukunghangijaga kushisha akundulwe mu ngelo yakwe.

⁷ Iki ya kwigeniha ya bugomi ikwitaga, aliyo ali ho umo Uyo akuhangijaga i haha, kushisha aho alinjiwagwa ho.

⁸ Hunaho lulu aligengeleka ngomi, uyo Seba Yesu alamulagila na miuyi ya nomo gwakwe, na kunyagaja mu kolechiwa kwa kwiza kwakwe;

⁹ Uyo u ngʼwene, kwigengeleka kwakwe kutumainiwa na Shetani mu nguzu jose na mabulolelo na shamahano sha bulomolomo,

¹⁰ Na mu kulembalemba kose kwa buti butungilija ku benabo abakuyagalaga; kulwa nguno iyi bali batuzunya kuyitogwa i nghana babone kupijiwa.

¹¹ Na kulwa nguno iyo, Mulungu ubatumila kahuganile ka nguzu, babuzunye bulomolomo:

¹² Giki, balekanyiwe nsango bose abanzunije i nghana, aliyo bali biyeja mu buti butungilija.

Paulo ulumba hangi na ubajamya

¹³ Aliyo tuli na nimo kunumba Mulungu gwa kulwingʼwe, badugu batogwa ba Seba, iki Mulungu waamukoma kufuma kwandia kushika mu bupiji, mu kwejiwa kwa Moyo, na kuyizunya i nghana:

¹⁴ U wene wangʼwitanila mu evangeli yiswe giki, mupanaike ikujo lya Seba wiswe Yesu Kristo.

¹⁵ Kuhva iyo, badugu, handikilagi, mugadime malange ayo ngʼulangwa, nulu mu nomo nulu na nyaluba yiswe.

¹⁶ Na Seba wiswe Yesu Kristo ngʼwenekele, na Mulungu Siswe Uyo waatutogwa na utwinha kulungujiwa ukutushila na kwisagilwa kwa wiza mu kigongo,

¹⁷ Amulunguje ngholo jingʼwe na amuhandikije mu buli kitile kose ka wiza na mu buli mhayo.