2 Bakolinto 9 - Ilagano Ipya Lya

Bakorintho bukomigwa bikale bamalilile kufunya

¹ Aliyo mu mihayo ya kubinhilija bela, nati na nguno hangi ya kungʼwandikila:

² Iki namanile kumalila kwingʼwe uko nikumiligija ku ba Makedonia giki, Akaya imalilile kufuma ngʼwakizo; na bukalalwa wingʼwe waabakomeja bingi.

³ Aliyo nabatumaga badugu, giki, kwikumiligija kwiswe mu bingʼwe kutizubiza dalali mu mhayo uyu; chene gitumo nali nuhaya, mubize mumalilile:

⁴ Itizubiza giki, hamo ulu biza ba Makedonia kihamo na nene, na kumusanga mutamalilile, biswe (tutuhaya bingʼwe), tutizugoka kulwa kwisagilwa kwenuku.

⁵ Huna nali nubona giki, shigelile nabakomige badugu aba, batonge kushika ku bingʼwe, na kushibilinga kuko tutali kwiza, sha kwinha isho ngʼwali ngʼwandia kwisagija, giki, shibize shimalilile, kufuma mu butogwa, iti mu buhadiki.

A kafunije na solobo yako

⁶ U mhayo uyu ndihaya guli giki, Uyo ubiba mu bugugu, nu kugesa alagesa budo; na uyo ubiba mu wila, nu kugesa, alagesa mu wila.

⁷ Buli munhu ite gitumo waasola kwita mu ngholo yakwe: iti mu bujimbi, nulu ya buhadiki: iki Mulungu antogilwe uwafunya na buyegi.

⁸ Na Mulungu wadula kumukwigija mu buli kigongo chose giki, bingʼwe mubize na sha kwigelelwa shose shose gwa mu mihayo yose, mukwile mu buli chitile chose cha wiza:

⁹ (Gitumo yaandikwa giki, wabalasanyaga hose hose, wabinhaga bahabi, butungilija wakwe bukwikalaga welelo bose.

¹⁰ Nanghwe uyo akangʼwinhilijaga mibi mbiyu na migati ya kulya, akungʼwinhilija na kujikwija mbiyu jingʼwe ja kubiba, hangi akungʼongegeja matwajo ga butungilija wingʼwe;)

¹¹ Ningʼwe musabiwe mu mihayo yose kulwa nguno ya wila bose, ubu bukungʼwityaga Mulungu kulumva kulwa kwinhilija kwiswe.

¹² Iki kinhiligije ka nimo uyu, iti giki, kakugelelaga kubigeja kugayiwa kwa bela gwike, aliyo kakukwilaga mu bulumbi wingi kuli Mulungu;

¹³ Iki kulwa kugengʼwa kwingʼwe mu kwinhilija uku, boi bunkumilija Mulungu kulwa wigwi wa kazunije kingʼwe ku lwande lwa evangeli ya ngʼwa Kristo, na kulwa nguno ya wila wa kafunije kingʼwe kubo, na ku banhu bose;

¹⁴ Hangi nabo bakumulombelaga bingʼwe, bakumukumbulaga kulwa nguno ya kigongo kitale cha Mulungu ikili mu bingʼwe.

¹⁵ Mulungu alumve kulwa nguno ya cha kwinha chakwe ikitudula kuhayiwa.