2 Bakolinto 8 - Ilagano Ipya Lya

Kafuttije ka bugunani ka kanisa ja Makedonia

¹ Hangi twamumanikija bingʼwe, badugu, i kigongo cha Mulungu icho kanisa ja Makedonia jali jugabilwa;

² Gitumo mu kugengʼwa kwingi kwa kuluhiwa, u wingi wa buyegi wabo na buhabi wabo butale, wali busesekela kushika mu wingi wa wila wabo.

³ Iki nene nalibakanila giki, gitumo budula wabo wali buli, ali chene, na kutinda budula wabo, bali bufunya batakomigilwe;

⁴ Butwikumbilija na kudaya kutale kulwa cha kwinha chabo giki, bazunilijiwe kusangila mu nimo gwa kubinhilija bela:

⁵ Hangi bali batita gitumo twali twisagilwa, aliyo kwandia bali biyinha ko benekele kuli Seba, na ku biswe gitumo Mulungu atogelilwe.

Paulo ubakonieleja Bakorintho

⁶ Kushisha nose tunkomeleja Tito giki, gitumo wali wandia kwita, i chene ashikilije nu mu bingʼwe kigongo iki.

⁷ Aliyo gitumo mukukwilaga mu yose, mu kuzunya, na mu kuhaya, na mu bumani, na mu bukomezu hose, na mu butogwa wingʼwe ku biswe, giko mukwilage nu mu kigongo iki.

⁸ Natuhayaga giti guli mhayo gwa kilagilo yaya, aliyo kulwa bujangizu wa bangi nageme i nghana ya butogwa wingʼwe.

⁹ Iki mumanile kigongo cha Seba wiswe Yesu Kristo giki, nulu walali nsabi, aliyo kulwa nguno yingʼwe ubiza nghabi giki, bingʼwe mubize basabi kulwa buhabi wakwe.

¹⁰ Nane mu mhayo uyu nalipima giki, imubelelile bingʼwe, aba ngʼwali ngʼwandia kwita ngʼwakizo, iti kwita gwike, aliyo hangi nu kuzunya kwita.

¹¹ Kulwa iyo, shikilijagi nu giki, gitumo ngʼwali mumalilile kutogwa kwita, giko shikilijagi gitumo budula wingʼwe umo buli.

¹² Iki ulu kutogwa kwita kuli ho, yazunilijiwa gitumo munhu ali nasho, iti gitumo kugayiwa kwakwe umo kuli.

¹³ Iki natuhayaga mhayo uyu giki, bangi babupilwe na bingʼwe mudidohelwe;

¹⁴ Aliyo bose babize balenganilile: wingi wingʼwe bubize wa kubagunana mu kugayiwa kwabo ngʼwikanza lya haha, hunaho wingi wabo bubize wa kumugunana bingwe mu kugayiwa kwingʼwe; giko kubize ho kulenganila:

¹⁵ Gitumo yaandikwa giki, Uyo wali ushibilinga shingi walatusaja kinhu, na uyo wali ushibilinga shido walatugehelwa.

¹⁶ Aliyo Mulungu alumve, Uyo akatuula ho bukalalwa butale wenubu mu ngholo ya ngʼwa Tito kulwingʼwe.

¹⁷ Iki wali uzunya kaganikile kiswe; aliyo iki walakalalilwe wei ngʼwenekele, wali wiza ku bingʼwe kulwa butogwa wakwe ngʼwenekele.

¹⁸ Twantumaga hamo nanghwe ndugu uyo, kukumilijiwa kwakwe mu evangeli kukumukile mu kanisa jose;

¹⁹ Nulu iti giko gwike, aliyo wali usolwa na makanisa kuja lugendo kihamo na biswe mu nimo gwa kigongo iki, icho tukwinhilijaga kwikujo lya Seba, na hangi imanike giki, tumalilile kwita;

²⁰ Twilanghanile mu mhayo uyu giki, munhu ose atizutuhaya kibi mu wingi ubu ubukwinhilijiwagwa na biswe:

²¹ Iki tuli na iganiko giki, kwita mihayo yose wima, iti mu miso ga Mulungu gwike, aliyo hangi na mu miso ga banhu.

²² Hangi twantumaga kuja hamo nabo ndugu wiswe, uyo twamala kumona nghangala ningi, ali nkalalwa mu mihayo mingi, aliyo haha ali na bukalalwa kutinda no, kuhva kusanya kutale uko ali nako mu bingʼwe.

²³ Ulu munhu ose ubuja mihayo ya ngʼwa Tito, wei tuli bumo nanghwe, hangi ali ntumami ngʼwichane ku bingʼwe; nulu ubuja mihayo ya badugu biswe, boi bali batungʼwa ba kanisa jose na ikujo lya ngʼwa Kristo.

²⁴ Kulwa iyo, mubolekejage mu butongi wa makanisa, bumaniku wa butogwa wingʼwe, na wa kukumilija kwiswe kulwa nguno yingʼwe.